1 तीमुथियुस 2 - लाहौली बाइबिल

अराधनाओ थल्जी निर्देश

¹ भत्ते बे ज़रूरी गप्पा तोह कि, केरे भत्ते मीहतु थल्जी प्रार्थना, निवेदन, विनती ए धन्यवाद लोह।

² दंङ रज्ज़ा तु ए दुह भत्ते मीहतु थल्जी प्रार्थना लंहि अंऊ हेंदु अधिकारी तोतोर, ताकि दोरे हेंदु शांति ए सुरक्षा रंङ साते बंङज़िमी थल्जी हेंदु मदत लोहर कि हेनर परमेश्वरो अराधना लेह तरपोंई दंङ ऊईतु थल्जी हमेशा रूठे व्यवहार लोंहि।

³ झांह ठ्रोह प्रार्थना लहज़ी ठीक तोह, दंङ हेंदु उद्धारकर्ता परमेश्वरे दोबि ग्रहण लहज़ा।

⁴ दोई जुंज़ा कि, कि भत्ते मीहतु उद्धार शुहबी जूंस; दंङ दोरे सच्चाई बि रूठे रंङ सेहषी तरपोर।

⁵ छना कुचे परमेश्वर सिर्फ इच्च़ा ए तोह, दंङ इच्च़ा मीह अंऊ परमेश्वर ए मीहतु बिचंङ मेल-मिलाप लेह तरपोतो, दुह इच्च़ा ए तोह मतलब यीशु मसीह अंऊ मीह बणेंके दि संसारारिंङ अति,

⁶ अच़ि पाप ए सिमी शाक्ति ओ दोरच़ी भत्ते मीह तिंङ आज़ाद लेह च़रच़िमी थल्जी एनाबि बलिदान लेह केहई दोऊ मौतो दोरच़ी, परमेश्वरे ठीक टेमारिंङ दि सबूत रें च़रति कि दुह भत्ते मीहतिंङ बचाएच़ी जुंज़ा।

⁷ दिए वहज़ा ज़ि रूठे खबरो प्रचार ए प्रेरितो रूपारिंङ ऊईजाति तिंङ विशवास ए सच्चाई ऊ शिक्षा रंड्रीमी थल्जी गेह अंङषी शुगाह, गेह हप्सी माह कुट्रातग, पर हेले कुट्रातग।

कलीसिया रिंङ मेच़िमी ए गंङमी तिंङ हुकुम

⁸ गेह जुंज़ातग कि हर सभारिंङ गंङमी अंऊ रूठे जीवन श्रींङमातोर, रोहष मेह ए झगड़ा मेह केनातु गुह्ट्र खेका लहच़ी प्रार्थना लोहवा लंहि।

⁹ ध्यांए गेह जुंज़ातग कि मसीही मेच़िमीतिंङ रूठे रंङ साते खमज़ेर लहज़ी जूंशी तोह, झांह ठ्रोह खमज़ेरे अंऊ रूठे ए ग्रहण लहच़िमी जोगे शोर। माह कि सिर्फ क्रा लहज़ी ए ज़ंङ लेह्चा या मुतिकरे लेह्चा या माहङे खमज़ेर लहज़ा एनाबि सलटे लोहतो।

¹⁰ दिऊ वहज़ा ज़ि दोतिंङ ऊई मीहतु थल्जी रूठे कम लहच़ी एनाबि सलटे लेह जूंशी तोह। छना कुचे परमेश्वरो भक्ति लहज़ा मेच़िमी ऊ थल्जी दिए ठीक तोह।

¹¹ अपेहल गंङमी मीहरे विशवासी तिंङ सिखाएपोर, दंङ भत्ते मेच़िमी तिंङ बि चुपे बंङज़ा भत्ते अधीनता रंङ साते सीखेसी जूंशी तोह।

¹² गेह मेच़िमीतिंङ दि अनुमति माह रंड्रातग कि दोरे गंङमी तिंङ शिक्षा रमोर, या दोतु टोहकठे राज लोहर। अपेहल केरे अराधना ओ थल्जी ठ्रोका शवातंई दंङ मेच़िमी तिंङ चुपे बंङज़ी जूंशी तोह।

¹³ गेह दि दिऊ थल्जी कुट्रातग छना कुचे परमेश्वरे तुहई आदम (गंङमी) बणाएक्ते दंङ दोऊ थल हव्वा (मेच़िमी) बि बणाएक्ते।

¹⁴ दंङ आदम शेतानो दोरच़ी बहकाएति माह पर हव्वा शेतानो बहकावारिंङ अच़ा अति, दंङ परमेश्वरो हुकुम माह मनेके पाप लेह च़रति।

¹⁵ तांला मेच़िमीर अगर ज़हके ते विशवास, दाह ए पवित्रता रंङ साते पक्‍का शुहचे बंङज़ोर, दंङ परमेश्वर मेच़िमी बि कटु जेह्कपिमी दोरच़ी बचाके च़रपोतो।