1 थिस्सलुनीकियों 4 - लाहौली बाइबिल

जीवन दुह शुह अंऊ परमेश्वर बि खुश लोहतो

¹ हे गिऊ प्यारे साथी विशवासी रे, थल मुखंङ ञेंरे प्रभु यीशु मसीहू मिंदंङ केतंङ साते बिनती लहज़ातंई दंङ केतिंङ समझाएक्च़तंई, कि केरे झांह ठ्रोह चाल ज़ोई अंऊ परमेश्वराबि खुश लोहतो। अंऊ गेह केतिंङ सिखाएकातग केरे तुहई बेहच़ी ध्यांए ठ्रोह तोहई, दंङ ञेंरे केतिंङ ध्यांए लहच़िमी थल्जी ऊई ला उत्साहित लोहनि।

² केहच़ी ञेंच़ातंई, कि ञेंहच़ी प्रभु यीशु मसीह ज़ि हेंदिंङ छि अधिकार रांहषी ततो, दोऊ दोरच़ी ञेंहच़ी केतिंङ हुकुम रांहषी तातंई

³ परमेश्वरो हिटी दि तो कि केरे पवित्र बणेक्तेंई मतलब कुकम थालांई।

⁴ दंङ केहतु बिचंङ हर इच्च़ा मीह सहन लहज़ा केनोह फुक पवित्र बणाके तऊ, दंङ दोऊ आदर लोहू।

⁵ केतिंङ ऊईजाति तु ठ्रोह अंऊ परमेश्वराबि माह ञेंहच़ातोर, मांजी कमो हिटी लेह माह जूंस।

⁶ दंङ केरे केनातु फुको हिटी पूरा लहज़िमी थल्जी केनातु विशवासी न्वारे तंङ खिलाप पाप थालांई, दंङ माह ए दोऊ थल्जी छा चाल लंहि, छना कुचे प्रभु यीशु दोतिंङ सज़ा रमतो अंऊ झांह ठ्रोह कम लहज़ा तोर। छना कि ञेंहच़ी मुण्डारिंङ ए केतंङ साते कुहषी तातंई दंङ हिद ला लाहतंई।

⁷ छना कुचे परमेश्वरे हेन्दिंङ अशुद्ध शुहबिमी थल्जी मशत, पर पवित्र ज़िंदगी श्रींङमी थल्जी बुलासी शुई।

⁸ झांह लेह अंऊ ला दि कानूनो भाषे माह लहज़ा, दोई मीहतिंङ मशत पर परमेश्वरो कानून माह ञेंहच़ा, अच़ि एनोह पवित्र आत्मा केतिंङ रांहषी ततो।

⁹ दंङ विशवासी भाईचाराऊ दाह ओ पाहठी दि ज़रूरी माह कि गेह केतिंङ छा च़ेओग, छना कुचे केनातु बिचंङ दाह तहच़ि केहच़ी केनाच़ि ए परमेश्वरो दोरच़ी सीखेसी तातंई;

¹⁰ दंङ मकिदुनिया प्रदेशो भत्ते विशवासी न्वा तंङ साते दाह लहज़ातंई। पर हे गिऊ प्यारे साथी विशवासी रे, ञेंहच़ी केतंङ साते विनती लहज़ातंई, कि दिरंङ ऊई ला बड़ेकी इलांई,

¹¹ दंङ छना ञेंहच़ी केतिंङ समझाच़ी तातंई, कि केतिंङ शांति रंङ साते केनातु ज़िंदगी श्रींङमी जूंशी तोह दंङ हर इच्च़ा एनोह कमरिंङ लेहकी बंङज़ु दंङ एनोह गुह्ट्र कमाएच़िमी कोशिश लोह।

¹² दंङ अविशवासी मीह दि खंड्रा कि केहच़ी हर इच्च़ा ध्याड़ा छना ठ्रोह व्यवहार लहज़ातंई, केहतु आदर लोहर ताकि केरे केनातु ज़रुरतो थल्जी अतु ला टोहकठे बोझ शुहबी मेस

यीशु यह्च़ा अपि

¹³ हे गिऊ प्यारे साथी विशवासी रे, ञेंहच़ी दि ञेंच़ातंई कि केहच़ी दि ञेंई च़रतेंई कि दुह विशवासी तंङ साते छि शोतो अंऊ तुहई ए सिए इलोर। झांह शुहबी मेस, कि केरे ऊईतु ठ्रोह शोक लंहि अंऊ दोतिंङ उम्मीद ए माह, कि सिमी थल दोरे यह्च़ा श्रींङी योर।

¹⁴ अगर हेंज़ी विशवास लहज़ातंई, कि यीशु सिए इलि, दंङ श्रींङी ला इलि, दंङ ध्वांए परमेश्वर दोतिंङ ला अंऊ यीशु मसीहू टोहकठे विशवास लहज़ा सिए इलिर, यीशु रंङ साते स्वर्गंङ च़ि वापिस हपतो।

¹⁵ ञेंरे प्रभु यीशु बचनो हिसाबे केतंङ साते दि कुट्रातंई, कि अंऊ हेनर श्रींङे तोतोंई, प्रभु यीशु यह्च़ा वापिस अन्जा तचेक बचेकी बंङज़ोर, दंङ दोरे विशवासी अंऊ तुहई सिए इलोर हेंदंङ बे तुहई प्रभु यीशु मसीहरिंङ साते दोआ योर।

¹⁶ छना कुचे प्रभु यीशु एनोह ए स्वर्गो दोरच़ी तकसोतो; दोई मोह्ड़े सगरंङ साते हुकुम रमतो, दंङ इच्च़ा प्रधान स्वर्गदूत जोरे हाऊष रें कोहतो दंङ परमेश्वरो तुरही ओ ला संग थक्पोंई, दोहपल भत्ते बे तुहई अंऊ मसीहरिंङ विशवास लहज़ा सिए इलजी तोतोर, दोरे मुन्डारिंङ श्रींङे योर।

¹⁷ दोऊ थल अंऊ श्रींङे ए बचेकी तोतोर, दोतंङ साते डुह रिंङ अच़ा योंई कि स्वर्गारिंङ प्रभु यीशुरंङ साते दोओनि, दंङ दुह मुक्का बे हेनर हमेशा प्रभु रंङ साते बंङज़ोंई।

¹⁸ झांह लेह दि गप्पा रंङ साते इदि-अईदि बि हिम्मत रमा लंहि।