1 थिस्सलुनीकियों 3 - लाहौली बाइबिलतीमुथियुस बि चरच़ि 1 थल मुखंङ ञेंरे केतिंङ खंड्रा मेह बंङज़ी मरतिन, दंङ गेह पोलुस ए सीलास ए एथेंस शहरारिंङ बंङज़िमी फेंसला लहरिन, 2 दंङ ञेंहच़ी तीमुथियुसबि केहतु कछंङ च़रतिन, अंऊ मसीहू रूठे खबरारिंङ ञेंहतु न्वा ए परमेश्वरो सेवक तोह। ताकि दोई केतिंङ विशवासरिंङ पक्का लोहतो, दंङ लगातार विशवास लहज़िमी थल्जी उत्साहित लोहतो। 3 कि अरिया दि मुसीबतो मुक्का अरिया विशवासो दोरच़ी थलका शुहबी मेस; छना कुचे केहच़ी केनाच़ि ञेंच़ातंई कि हेनर भत्ते तिंङ झांह ठ्रोह मुसीबत भुगताए ज़ि तातंई। 4 केहतु देर बंङज़िमी मुक्का ञेंरे केतंङ साते कुट्रातेंई कि ञेंहतु टोहकठे मुसीबत अपतो, दंङ ध्यांए शुई, केहच़ी ञेंहई ला। 5 झांह लेह अपेहल गेह ऊई ज़हके मरतिगा, दंङ केहतु विशवासो हाल ञेंच़िमी थल्जी तीमुथियुसा बि च़रचातेग, छना कुचे ञेंरे बेवातेंई कि, परीक्षा लहज़ा शेताने केहतु परीक्षा लोहतो, दंङ ञेंहतु मेहनत बेकार शुचे योतो। तीमुथियुस ओ दोहरची रूठे खबर खोकसी 6 दंङ हेंतेग तीमुथियुस अंऊ केहतु कछंङ ज़ि ञेंहतु दोहर अंज़े केहतु विशवास ए दाह ओ रूठे खबर सुनाके च़रति दंङ दि गप्पा ला सुनाके च़रति कि केहच़ी हमेशा दाह रंङ साते ञेंतिंङ हिद लहज़ातंई, दंङ ञेंतिंङ खंड्रिमी हिटी शवात, ध्वांए ञेंरे ला केतिंङ खंड्रिमी थल्जी लालसा शवात। 7 झांह लेह हे गिऊ प्यारे साथी विशवासी रे, ञेंरे हेंदु भत्ते दुख ए मुसीबता रिंङ केहतु पाहठी तीमुथियुसो दोरच़ी थाक्शे खुश शुहचे इलांई कि केरे हेंतेग ला प्रभु यीशु मसीहू टोहकठे विशवास लहज़ातंई। 8 दि ञेंई कि केरे प्रभु टोहकठे पक्का विशवास लहज़ातंई दंङ दि हेंदु थल्जी खरकोई जीवनो ठ्रोह तोह छना कुचे हेंतेग केरे प्रभुरिंङ खड़े बंङज़ोंई ता दि हेंदु ज़िंदगी श्रींङमी बि (याहब रंड्रा) जोगे बणाके केट्रा। 9 दंङ छना ठ्रोह खुशी ञेंतिंङ केहतु वहज़ा ज़ि हेंदु परमेश्वरो तुईज़ी तोह, दोऊ बदलारिंङ केहतु पाहठी सेहमे परमेश्वरो धन्यवाद लहज़ातंई। 10 ञेंरे लगातार महस प्रार्थना लोहवा लहज़ातंई, कि केतंङ साते यह्च़ा दोई तरपोंई, अंऊ ज़रूरी तोह दू केतिंङ सिखाके तरपोंई, ताकि केरे भत्ते रिति रंङ साते प्रभु यीशु मसीहू टोहकठे विशवास लेह तरपोंई। 11 ञेंहच़ी प्रार्थना लहज़ातंई कि हेंदु बाह परमेश्वर ए हेंदु प्रभु यीशु मसीह, केतंङ साते दोईमी थल्जी ञेंहतु अगुवाई लोहतो। 12 ञेंहच़ी दि ला प्रार्थना लहज़ातंई कि प्रभु ज़ि झांह लोहतो कि, कि छना ञेंहच़ी केतंङ साते दाह लहज़ातंई, ध्वांए ए केहच़ी लाह इदि-अई दिरंङ साते दाह लोहवा लंहि, दंङ भत्ते मीहतंङ साते केहतु दाह ऊई लाह लगातार बढेक्पि जूंस। 13 दंङ ञेंहच़ी प्रार्थना लहज़ातंई कि हेंदु प्रभु यीशु मसीह केहतु सेहम झांह ठ्रोह पक्का लोहतो, कि अपेहल दुह एनोह भत्ते पवित्र मीहतंङ साते वापिस अपतो, दंङ दुह हेंदु बाह परमेश्वरो तुईज़ी पवित्रतारिंङ निर्दोष ठहरेसोतो। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation