1 थिस्सलुनीकियों 2 - लाहौली बाइबिलपोलुसो प्रचारो कम 1 हे गिऊ प्यारे साथी विशवासी रे, केहच़ी केनाच़ि ए ञेंच़ातंई कि ञेंहतु केहतु कछंङ अपि फायदा ओ कम शुई। 2 केहच़ी केनाच़ि ए ञेंच़ातंई, कि केहतु कछंङ अपिमी तुहई ञेंहच़ी फिलिप्पी शहरारिंङ अंयों दुख उठाकतेंई। तांला परमेश्वरे ञेंतिंङ धोंण हिम्मत रांहषी ततो, कि केहतु शहरो मीहतु दोरच़ी ञेंहतु महस विरोध शुहचे थल ञेंहच़ी परमेश्वरो रूठे खबर सुनाएक्तंई। 3 छना कुचे ञेंहच़ी केतिंङ हप्सी खबर माह सुनाक्तंई दंङ माह ए दुह गलत इरादा रंङ साते, माह ए धोखा रंङ साते तोहई। 4 परमेश्वरे हेनर दि जोगे चेहके ए दि रूठे खबर रें च़रति। झांह लेह हेनर मीहतिंङ ए मशत, पर हेंदु सेहम परखेकच़ा परमेश्वरा बि खुश लहच़िमी ठ्रोह शिक्षा रंड्रातंई। 5 केहच़ी ञेंच़ातंई, कि हेनर माह ता अपेहल लाह चापलूस गप्पारे लहज़ातंई, दंङ माह ए ञेंहच़ी केहतु दोरच़ी ढबाह खोकच़िमी थल्जी झांह ठ्रोह लहज़ातंई दि गप्पो परमेश्वरो गवाह तोह। 6 ञेंहच़ी मीहतु दोरच़ी आदर माह जुन्ज़ातंई, दंङ माह ए केहतु दोरच़ी माह ए ऊईतु दोरच़ी छना कुचे मसीहू प्रेरित शुहबिमी रंङ साते ञेंतिंङ केहतु दोरच़ी मदत खोकच़िमी हक तोह। 7 पर छना ठ्रोह याह एनोह कटुतु पालन-पोषण लहज़ा, ध्वांए ए ञेंहच़ी ला केहतु बिचंङ बंङज़ा केतिंङ दाह कंङातो। 8 ञेंरे केतंङ साते धोंण दाह लहज़ातंई कि सिर्फ परमेश्वरो रूठे खबर सुनाएच़िमी थल्जी ए मशत पर केहतु थल्जी हेंदु जाहन ला रंड्रीमी थल्जी तेयार तोईनी, झांह लेह कि ञेंरे केतंङ साते महस दाह लहज़ातंई। 9 हे गिऊ प्यारे साथी विशवासी रे, केहच़ी ञेंहतु मेहनत ए कष्ट हिद तहच़ातंई, कि ञेंहच़ी झांह लेह रात दिन कम धन्धा लहच़ी ते केहतु बिचंङ परमेश्वरो रूठे खबरो प्रचार लहरिग, ताकि ञेंहतिंङ छि ज़रूरत तोह दोबि पूरा लहच़िमी थल्जी केतिंङ छल्ले रंड्रीमी ज़रूरत माह। 10 केरे केनर ए गवाह शुई, दंङ परमेश्वर ला गवाह तोह, कि केरे भत्ते विशवासी तंङ साते ञेंहतु व्यवहार छना ठ्रोह सच्चा, धर्मी ए निर्दोष तोहई। 11 छना केहच़ी ञेंच़ातंई, कि छना बाह एनोह कटुतंङ साते व्यवहार लहज़ा ध्वांए ए ञेंहच़ी ला केहतु बिचंङ हर इच्च़ाबि शिक्षा रंड्रा ए शांति रंड्रा तस्सली रंड्रातंई। 12 ताकि केहतु चाल चलनो दोरच़ी परमेश्वराबि महस इज्ज़त खोकसोतो, अंऊ केतिंङ एनोह राज ए महिमारिंङ भागीदार शुहबिमी थल्जी बुलाएच़ा। 13 झांह लेह ञेंरे ला रोज परमेश्वरो धन्यवाद लहज़ातंई, कि अपेहल केहच़ी दुह रूठे खबर थाशातंई अंऊ ञेंहच़ी केहतु बिचंङ प्रचार लाहतंई, दंङ केहच़ी दुह मीहतु मशत पर परमेश्वरो वचन समझेगी (दंङ अंऊ हेले परमेश्वरो दोरच़ी तोह) ग्रहण लहरिन; दंङ हेंतेग परमेश्वरो दि खबर केहतु अंद्रेग कम लहज़ी लेहकी तोह अंऊ मसीहू टोहकठे विशवास लहज़ातंई। 14 झांह लेह, हे गिऊ प्यारे साथी विशवासी रे, केहच़ी ध्वांए ठ्रोह दुख सहन लाहतंई छना परमेश्वरो कलीसिया ए सहन लहरी अंऊ यहूदिया प्रदेशा रिंङ मसीह यीशु रिंङ तोतोर। छना कुचे केहच़ी ला केनातु मीहतु दोरच़ी ध्वांए ए दुख खोकच़ातंई, छना दोच़ी यहुदी मीहतु दोरच़ी खोकषातेर। 15 दुह यहुदी ज़ि प्रभु यीशु बि ए भविष्यवक्तातिंङ सच़ी च़रतिर दंङ ञेंहतिंङ महस दुख रेंईर दंङ परमेश्वर दोतंङ साते खुश माह; दंङ दोरे भत्ते मीहतु ला विरोध लहज़ातोर। 16 झांह लेह दोरे हेंदिंङ ऊईजाति तिंङ दि कंड्रिमी थल्जी हेंदिंङ रोक्केच़ा तोर, कि परमेश्वर दोतिंङ छना पाप लहज़िमी दोरच़ी बचाके तरपोतो। कलीसिया रंङ साते दोईमी उम्मीद 17 हे गिऊ प्यारे साथी विशवासी रे, अंऊ मुक्का ञेंरे थोड़े टेमो थल्जी, सेहमरिंङ माह शुह पर फुकारिंङ केतंङ साते शत्ह शुहचे इलजी तोतोंई, दंङ ञेंहच़ी मोह्ड़े लालचारंङ साते केतिंङ खंड्रिमी थल्जी ऊई ला महस मेहनत लहरिन। 18 झांह लेह ञेंहच़ी (मतलब गेह पोलुसे) महस फेरा केहतु कछंङ अपि जुंज़ातेग, पर शेताने हेंदिङ केहतु कछंङ अपि मरेंई दिऊ थल्जी महस रूकावट लहरी। 19 ञेंहतु उम्मीद, ए महस खुशी ए षटणो मुकुट अरि शुह? दि केरे ए शोंई अपेहल हेंदु प्रभु यीशु मसीह यह्च़ा वापिस अपतो, दोऊ तुईज़ी केरे माह शोंई? 20 ञेंहतु षटणा ए खुशी केरे ए शुई। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation