1 पतरस 5 - लाहौली बाइबिल

झुंडो पोहाल

¹ रें झांह ठ्रोह गप्पा तोह अंऊ गेह दोरकी सेंहणा तंङ साते कुट्री तातग छना कुचे गेह ला केहतु ठ्रोह इच्च़ा सेंहणा शुगाह। गेह घेंङौ दू दुखा बि तंङातेग अंऊ महसे तुहई मसीह ज़ि सहन लहरी। अपेहल दू यह्च़ा वापिस अपतो, दंङ गेह ला दोऊ महिमा रिंङ सहभागी शोहग दंङ गेह केतंङ साते विनती लहज़ातग,

² कि विशवासी तु दू झुंडो रखवाली लंहि अंऊ परमेश्वरो तोह, दंङ अपि केतिंङ देखभाल लहज़िमी थल्जी रांहषी तोह। खुशी रंङ साते दोतु देखभाल लंहि, दिऊ थल्जी मशत कि केरे मज़बूर तोतोंई। दिए परमेश्वरे जुंज़ा कि केहच़ी लंहि। सिर्फ ढबाहो थल्जी विशवासी तु देखभाल था लंहि, पर दिऊ थल्जी कि केरे हेले रिंङ दोतु मदत लहज़ी जुंज़ातंई।

³ अंऊ मीहरे केतिंङ सोंपेगी तोतोर, दोतु टोईच़ी इच्च़ा अधिकारी ठ्रोह था बणेक्तुंई, बल्कि दोतु थल्जी इच्च़ा रूठे उदाहरण बणेक्तुंई।

⁴ अपेहल यीशु मसीह, दुह हेंदु मोह्ड़े पोहाल ए शुह, यह्च़ा वापिस अपतो, दोई केतिंङ इच्च़ा ईनाम रमतो, अंऊ अपेहल ला खराब माह शोतो।

परमेश्वरा बि समर्पित लहज़ी ए शेतानो विरोध लहज़ी

⁵ झांह लेह केरे जवान तिंङ सेंहणा मीहतु हुकुमो भाषे लहज़ी जूंशी तोह। केरे भत्ते तिंङ नम्रता रंङ साते इदि-अई दिऊ मदत लहज़ी जूंशी तोह। छना कुचे पवित्र शास्त्रा रिंङ च़ेहसी तोह, “परमेश्वरे घमण्डी तु विरोध लहज़ी, पर दीन दोतु टोईच़ी मोह्ड़े दाह लहज़ा।”

⁶ झांह लेह केनातिंङ परमेश्वरो तुईज़ी नम्र लंहि अंऊ मदत लहज़िमी थल्जी बलवान तोह ताकि दू ठीक टेमारिंङ केतिंङ महसे आदर रमतो।

⁷ केनोह भत्ते चिंद परमेश्वरा बि रें च़रतु, छना कुचे दोई केहतु परवाह लहज़ा।

⁸ हमेशा खबरदार ए दंङ चेहके बंङज़ुंई, छना कुचे शेतान, केहतु विरोधी केहतु टोईच़ी हमला लहज़ी ततो ताकि केरे परमेश्वरो हुकुमो भाषे माह लोहनि। दुह फ्रक्शे ज़ज़ा ब्राघो ठ्रोह तोह, अंऊ तुंखा थलका खंड्रा कि अपि ज़ोओग।

⁹ केतिंङ केनातु पक्‍का विशवासा रंङ साते दोतु विरोध लेह जूंशी तोह। हिद तंही कि विशवासी अंऊ भत्‍ते संसारारिंङ तोतोर, ध्यांए ठ्रोह दुख सहन लहज़ा तोर छना केहच़ी सहन लहज़ातंई।

¹⁰ हेंतेग परमेश्वर अंऊ भत्ते तरीका रंङ मोह्ड़े दाह ए पिंङषा तोह, दोई हेंदिंङ यीशु मसीह रंङ साते हेंदु नाता ओ थल्जी स्वर्गा रिंङ दोऊ अनंत महिमा ओ थल्जी सहभागी शुहबिमी थल्जी हेनर अंङे च़रति। केहतु थोड़े टेमो दुख सहन लहज़िमी थल, परमेश्वर केतिंङ रूठे बणाके च़रपोतो ताकि केहतु अंदरेग ला छल्ले शुहबी मेस दंङ परमेश्वर केतिंङ पक्‍का लोहतो ताकि केहतु विशवास पक्‍का शोतो।

¹¹ दू हमेशा ओ थल्जी सामर्थशाली रूपा रिंङ राज लोहतो। अमीन।

अन्तिम नमस्कार

¹² गेह दि कवचि डाक सिलवानुसो मदते चेहच़ातग दंङ केतिंङ चरच़ातग। गेह दोबि मसीह रिंङ इच्च़ा विशवासो जोगे साथी मनेक्च़ातेग। गिऊ दि डाक चेहच़िमी खास वहज़ा केतिंङ उत्साहित लहज़ी ए केतिंङ भरोसा रंड्रीमी तोहई, कि छिल्ला धिर केहच़ी महसूस लहज़ातंई दू हेले रिंङ केहतु थल्जी परमेश्वरो मोह्ड़े दाह ऊ हिस्सा शुह। दि मोह्ड़े दाह रिंङ खड़े बंङज़ुंई।

¹³ बेबीलोन शहरो विशवासीरे केतिंङ नमस्कार कुट्रातोर, अंऊ दोतिंङ परमेश्वरे अंङे चरच़तो छना दोई केतिंङ अंङे च़रते। मरकुस, अंऊ गिऊ थल्जी इच्च़ा योह ठ्रोह तोह, दोई ला केतिंङ नमस्कार लहज़ा।

¹⁴ केरे इदि-अईदि बि दाह रंङ साते गव्कषा लगाके नमस्कार लंहि। गेह प्रार्थना लहज़ातग कि परमेश्वर हर इच्च़ा दू मीहबी शांति रमतो, अंऊ मसीह रिंङ तोह।