1 पतरस 4 - लाहौली बाइबिल

लेहसी जीवन

¹ झांह लेह, अपेहल कि मसीह ज़ि एनोह फुकारिंङ बंङज़ा दुख सहन लहरी, दंङ केतिंङ ला ध्वांए ठ्रोह दुख सहन लहज़िमी थल्जी तेयार बंङज़ी जूंशी तोह। छना कुचे अगर हेनर मसीहू थल्जी दुख सहन लहज़िमी थल्जी तेयार तोतोंई, दंङ केहच़ी पाप माह लहज़िमी फेंसला लेह चरच़ातंई।

² एंतेग बेहच़ी, यह्च़ा, केरे केनातु ऊई संसारिक ज़िन्दगी बि पापो हिटी पूरा लहज़िमी थल्जी मश्त; पर परमेश्वरो हिटी पूरा लहज़िमी थल्जी श्रींङे च़रतुंई।

³ इलज़ा दू टेमारिंङ केहच़ी संसारिक मीहतु ठ्रोह मदम लहज़िमी थल्जी महस टेम बर्बाद लेह चरच़ातंई, छना कि कुकम ए वासना, महस तुंङमी ए ऐश-मस्ती लहज़ी, दंङ दोतु मुर्ति तु पूजा, अंऊ दोतंङ परमेश्वरे नफरत लहज़ा।

⁴ झांह लेह केहतु तुहई कि मित्रारे हेरान शुहचे यवातोर अपेहल केरे दोतंङ साते दू मदम चीज़ा रिंङ शामिल माह शवातंई अंऊ दोच़ी लहज़ातोर। झांह लेह दोरे केहतु बदनामी लहज़ातोर।

⁵ पर दू ध्याड़ा अपतो अपेहल दू मीहतिंङ दू कमो पाहठी परमेश्वरा बि जबाब रंड्री लेह्पोतो। छना कुचे परमेश्वर भत्ते मीहतु न्याय लहज़िमी थल्जी तेयार तोह, चाहे दोरे अंऊ हेंतेग श्रींङी तोतोर या दोरे अंऊ सिए इलजी तोतोर।

⁶ दिए वहज़ा तोह कि सिए मीहच़ी ला मसीहू पाहठी रूठे खबर रेड्रीर। दोतु फुका बि भत्ते मीहतु ठ्रोह सच़ी लेहती, पर हेंतेग दोरे आत्मारिंङ हमेशा परमेश्वरा रंङ साते बंङज़ातोर।

परमेश्वरो महिमा ओ थल्जी सेवा

⁷ भत्ते गप्पो अंत युरनाह शुहबिमी तोह; दिऊ थल्जी सहनशील शुहचे ए चौकस बंङज़ा प्रार्थना लंहि।

⁸ भत्ते बे मोह्ड़े गप्पा दि तोह कि इदि-अई दिरंङ साते महसे बे महसे दाह लंहि, छना कुचे अगर केरे मीहतंङ साते दाह लहज़ातंई, दंङ केरे हमेशा अंऊ ला पाप बि माफ लहज़िमी थल्जी तेयार बंङज़ोंई, अंऊ दोच़ी लहसी ततोर।

⁹ मीहतु केनातु चुंङ स्वागत लंहि दंङ झांह चिड़चिड़ापन मेह लोहवा लंहि।

¹⁰ हर इच्च़ा मीहबी परमेश्वरो दोरच़ी वरदान खोकसा तोह दंङ दोतिंङ दू वरदानो इस्तेमाल ऊईतु मदत लहज़िमी थल्जी लेह जूंशी तोह। दोतिंङ परमेश्वरो रूठे सेवको रूपा रिंङ एनोह वरदानो इस्तेमाल रूठे रंङ लहज़ी जूंशी तोह।

¹¹ अगर केहतु कछंङ प्रचार लहज़िमी वरदान तोह, दंङ केतिंङ परमेश्वरो बचनो प्रचार लहज़ी जूंशी तोह। अगर केहतु कछंङ ऊईतु मदत लहज़िमी वरदान तोह, दंङ दू, दू सामर्थ रंङ साते लंहि अंऊ परमेश्वर केतिंङ रंड्रा। तांला छिल्ला धिर केहच़ी लोहनि दू यीशु मसीहू दोरच़ी परमेश्वरा बि महिमा रमतो। भत्ते महिमा ए सामर्थ हमेशा-हमेशा ओ थल्जी दोऊ शुह। अमीन।

परमेश्वरो महिमा ओ थल्जी दुख उठाती

¹² हे गिऊ प्यारे साथी विशवासी रे, दू दुख रंड्रा चीज़ा तु पाहठी हेरान था शुई अतु पाहठी केहच़ी दुख उठाएच़ातंई छना कुचे केरे मसीहू शुई। पर दि चीज़ारे दि कंड्रिमी थल्जी शुहबी लेहकी तोह कि छि केरे हेले रिंङ परमेश्वरो टोईच़ी विशवास लहज़ातंई आ माह लहज़ातंई। दिऊ थल्जी दि था सोचेक्तुंई कि केतंङ साते छा नोखे शुहबी लेहकी तोह।

¹³ बस दिऊ पाहठी खुश तोईनी, कि केरे मसीहू दुखारिंङ सहभागी शुहचे तोईनी। झांह लेह, अपेहल मसीह भत्ते मीहतिंङ एनोह महिमा प्रगट लहज़िमी थल्जी यह्च़ा अपतो दंङ केहतु खुशी हेले रिंङ बणेंके योतो।

¹⁴ दंङ अगर मसीहू मिन्दु थल्जी केहतु निन्दा शवाह, दंङ केरे धन्य शुई; छना कुचे परमेश्वरो महिमा ओ आत्मा केहतु अंदरेग बंङज़ा।

¹⁵ केहतु बिचंङ अरिला मीह हत्यारा या चोर, या कुकर्मी शुहबिमी, या पराया कमरिंङ गुह्ट्र केट्रिमी थल्जी दुख माह खोकपोतो।

¹⁶ पर अगर मसीह शुहबिमी दोरच़ी दुख खोकपोंई, दंङ शर्मिन्दा था शुई, बल्कि, परमेश्वरो महिमा लंहि कि केरे दिऊ थल्जी दुख सहन लहज़ातंई छना कुचे केरे मसीहू शुई।

¹⁷ हेंतेग दि परमेश्वरो टेम तोह कि दू मीहतु न्याय लहज़ी शुरू लोहतो। भत्ते बे तुहई दू हेंदु विशवासी तु न्याय लोहतो, झांह लेह दू भयानक चीज़ा तु पाहठी सोचेक्तुंई अंऊ दू मीहतंङ साते शोतो, अंऊ परमेश्वरो रूठे खबर माह मनेक्च़ातेर।

¹⁸ “छना कि पवित्र शास्त्रे कुट्रा, अगर धर्मी बि मुशकिलारंङ साते मुक्ति खोकसा, दंङ मदम मीह ए पापी पक्‍का रूपा रिंङ योंहंषा योर।”

¹⁹ झांह लेह, अंऊ मीहरे ध्वांए ठ्रोह दुख सहन लहज़ातोर छना परमेश्वरे जुंज़ा, दोतिंङ परमेश्वरो टोईच़ी विशवास लहज़ी जारी तहच़ि जूंशी तोह। परमेश्वरे हमेशा दू ए लहज़ी अंऊ दू लहज़िमी दोई वाईदा लहसी ततो दिऊ थल्जी अंऊ रूठे तोह दू लहज़ी जारी तंही।