1 पतरस 3 - लाहौली बाइबिल

मसीह मेच़ातिंङ एनोह गगसो थल्जी ज़िम्मेवारी ए सलाह

¹ हे मेच़ारे, केरे ला केनातु गगसा तु अधीन बंङज़ुंई। छना कुचे अगर दोतु बिचंङ ज़ि अरिला परमेश्वरो बचनो टोईच़ी विशवास लहज़िमी रंङ साते इंकार लहज़ा,

² दंङ दोरे केहतु व्यवहार खंड्रा केहतु छा कुट्री मेह, विशवास लहज़िमी थल्जी द्रक्शे योर। अपेहल दोरे केहतु शुद्ध ए ईश्वरीय व्यवहार खमोर दंङ दोरे मसीहू टोईच़ी विशवास लोहर।

³ दंङ केतिंङ रूठे रंङ खमज़ेर लेहच़ी जूंशी तोह, झांह ठ्रोह खमज़ेर अंऊ रूठे शोतो। माह कि सिर्फ क्राह सज़ाएच़ी ए ज़ंङ मुतिका तु गहना लेहज़ा या कीमती खमज़ेतु दोरच़ी एनोह श्रंगार लोहतो।

⁴ पर केतिंङ केनातु नह्की ए शांत व्यवहारो दोरच़ी केनातिंङ सलटे लेह जूंशी तोह अंऊ सलटे अपेहल ला योहसिमी माह। दंङ अंऊ परमेश्वरो नज़रारिंङ महस कीमती तोह।

⁵ झांह ठ्रोह अंऊ मेच़िमिर महस तुहई बंङज़ातेर दंङ परमेश्वरो टोईच़ी विशवास लहज़ातेर दंङ दोऊ टोईच़ी एनोह उम्मीद तहच़ातेर, दोरे एनातु गगसो हुकुम मनेकी झांह ए ठ्रोह एनाबि सलटे लहज़ातेर।

⁶ छना सारा मिन्दु मेच़िमी एनोह गगसा अब्राहमो हुकुम मनेक्च़ते दंङ दोबि एनोह मालिक कुट्राते। मतलब एंतेग कि केरे सारा ओ ठ्रोह शुहबी तरपोंई, अगर केरे ऊई तंङ साते भलाई लहज़ातंई दंङ केहतु अंदरेग थोड़े ला बेह्द माह। दंङ कांह सारा ओ खानदानो ठ्रोह शोन।

एनातु मेच़ातु थल्जी मसीह गगसा तु ज़िम्मेवारी

⁷ ध्वांए हे गगसा रे, अपेहल कि केरे इच्च़ा साते बंङज़ातंई दंङ केनातु मेच़ातंङ साते समझदारी रंङ साते व्यवहार लंहि, केतिंङ हिद तहच़ि जूंस कि दू करंङ बे कमज़ोर तोह, झांह लेह केतिंङ दोऊ आदर लेह जूंशी तोह। छना कुचे केहतु झुह्ट दू वरदाना बि सांझा लहज़ातंई अंऊ परमेश्वरे एनोह मोह्ड़े दाह ओ दोरच़ी केतिंङ रांहषी तोह, मतलब अनंत ज़िंदगी ओ वरदान। अगर केरे झांह लोहनि, दंङ परमेश्वर केहतु प्रार्थना रेड्रोतो।

आशीषो वारिस शुहबिमी थल्जी बुलाहट

⁸ थल मुखंङ, गेह केतंङ साते दि कुट्री जुंज़ातग, कि केरे केनातु बिचंङ ठ्रोहका शुहचे बंङज़ुंई, दंङ इदि-अई दिऊ चिंद लोहवा लंहि, दंङ इच्च़ा टबरातु ठ्रोह केनातु बिचंङ दाह लोहवा लंहि, ऊईतु टोईच़ी दया लोहवा लंहि इदि-अई दिरंङ साते नम्र शुहचे तोहई।

⁹ बुराई बदलारिंङ बुराई था लंहि दंङ माह गाड़ी ऊ बदलारिंङ गाड़ी रांई; पर दिऊ बदलारिंङ आशीष रांई; छना कुचे परमेश्वरे केतिंङ ऊईतिंङ आशीष रंड्रीमी थल्जी बुलाएसी शुई। अगर केहच़ी झांह लहज़ातंई ता परमेश्वर ला केतिंङ आशीष रमतो।

¹⁰ छना कुचे पवित्रशास्त्रा रिंङ च़ेहसी तोह, कि “अगर अरिया मीह एनोह जीवनो लेहपच़ी जुंज़ा दंङ रूठे ध्याड़ा खंड्री जुंज़ा, दंङ दोबि खबरदार बंङज़ी जूंशी तोह कि दोई मदम गप्पा कुट्री मरपोतो।” दंङ दोबि झांह ठ्रोह गप्पा लहज़ी बन्द लेह जूंशी तोह अंऊ हेले माह।

¹¹ दोबि पक्‍का ए दू लेह बन्द लहज़ी जूंशी तोह अंऊ मदम तोह। दिऊ वहज़ा, दोबि दू ए लहज़ी जूंशी तोह अंऊ रूठे तोह। ऊईतिंङ साते शांति रंङ साते बंङज़िमी महस कोशिश लंहि।

¹² छना कुचे प्रभु ज़ि दू मीहतु देख भाल लहज़ी अंऊ दोच़ी दू ए लहज़ातोर अंऊ ठीक तोह, दंङ दू हमेशा दोतु प्रार्थना रेड्रीमी थल्जी ए दोतु जबाब रंड्रीमी थल्जी तेयार तोह। पर परमेश्वर दू मीहतु खिलाप कम लहज़ा अंऊ दोच़ी मदम लहज़ातोर।

भलाई लहज़िमी थल्जी सताव

¹³ अगर केरे हमेशा रूठे कम लहज़िमी कोशिश लहज़ातंई, दंङ अरिला केतिंङ हेले रिंङ दुख रंड्री मरपोतो।

¹⁴ पर अगर हेले भलाई लहज़िमी रंङ साते केरे दुख सहन ला लहज़ातंई, दंङ परमेश्वर केतिंङ आशीष रमतो। ध्वांए लंहि छना यशायाह भविष्यवक्ता ज़ि च़ेहसी तहरे: “दू मीहतंङ साते थाबेईनि, अंऊ केतिंङ बेई लहज़ातोर दंङ दि गप्पो चिंद थालंही कि मीहरे छि कुट्री तरपोर।”

¹⁵ बल्कि मसीह बि केनातु सेहमरिंङ प्रभु चेहके दोऊ अराधना लंहि, अगर अच़िया दू उम्मीदो पाहठी रूहक्पोतो ता अंऊ विशवासी शुहबी रंङ साते हेनर भत्तेरे सांझा लहज़ातंई, दंङ हमेशा दोबि समझाएच़िमी थल्जी तेयार बंङज़ुंई, पर दि नम्रता ए आदरा रंङ साते लंहि।

¹⁶ हमेशा दू ए लंहि अंऊ सही तोह, दंङ अगर मीहरे केहतु खिलाप मदम कुट्रातोर, दंङ दोरे ए शर्मिन्दा शोर, अपेहल दोरे मसीह रंङ साते केहतु संबधो वहज़ा ज़ि केहतु रूठे व्यवहार खमोर।

¹⁷ अगर हेंदु थल्जी परमेश्वरो दिए हिटी तोह, दंङ केनातु रूठे कमो दोरच़ी दुख खोकच़ातंई दंङ दुह दुख खोकसी रूठे तोह, दि हेंदु मदम कमो दोरच़ी दुख उठाएच़िमी बे महसे गुना रूठे तोह।

मसीह रिंङ दुख

¹⁸ गेह दि दिऊ थल्जी कुट्रातग, छना कुचे मसीह ज़ि हेंदु पापो थल्जी दुख सहन लहरी दंङ सिए इलि। दू सिर्फ इच्च़ा फेरा सिए इलज़ा दंङ दोबि दोहराएच़िमी ज़रूरत माह। दू इच्च़ा धर्मी मीह तोहई अंऊ पापी मीहतु थल्जी सिए इलि ताकि दू हेंदिंङ परमेश्वरो कछंङ रैंज़ा शोतो। दोच़ी दोऊ फुक सचे च़रतिर, पर परमेश्वरे दोबि पवित्र आत्माओ सामर्थ रें यह्च़ा श्रींङमी लेह च़रति।

¹⁹ दोहपल मसीह ज़ि इलजे दू आत्मातिंङ रूठे खबर प्रचार लहरी अंऊ दू ठाहरीरिंङ परमेश्वरो दोरच़ी कैद लहसी तोईरे, अंऊर सिए मीहतु आत्मा तोहई।

²⁰ दि दू मीहतु आत्मा तोहई अंऊ दोच़ी महस तुहई परमेश्वरो गप्पो उलंघन लहसी ताहरेर। अपेहल नूह एनोह नाव बणाएच़ते, दंङ परमेश्वर धीरज़ा रंङ साते रूमज़ा तोहई कि खमोंई छि दोरे मीहरे पश्चाताप लहज़ातोर। पर सिर्फ रें मीहतिंङ दू भयानक डढो दोरच़ी बचाएक्ते।

²¹ तुहई कि टेमारिंङ दोतु उद्धार हेंतेग हेंदु उद्धारो इच्च़ा उदाहरण तोह अपेहल हेनर बपतिस्मा लेहपच़ातंई, दोई हेंदु फुको दोरच़ी क्रि शत्‌ह माह लहज़ा, पर दि इच्च़ा चिन्ह शुह कि हेंज़ी परमेश्वरो दोरच़ी माफी पेट्रातंई ताकि तुंखा हेंदु सेहम परेशान माह बंङज़ोतो। हेंदिंङ माफी खोकसोतो छना कुचे यीशु मसीह सिमी थल यह्च़ा श्रींङे इलज़ा।

²² दंङ दुह स्वर्गो हखा अच़ा इलज़ा। हेंतेग दू दोर्तिंङ परमेश्वरो सुचंङ हासी भत्ते बे खास ठहरि बंङज़ा तोह, दंङ दू भत्ते स्वर्गदूत ए भत्ते अधिकारी दंङ शाक्ति तु टोईच़ी राज लहज़ा।