1 पतरस 2 - लाहौली बाइबिल

अंङषी रह्घ ए दोऊ अंङषी मीहरे

¹ झांह लेह भत्ते पाहठी मदम व्यवहार छोड़ेके च़रतुंई। ऊईतिंङ धोखा थारांई, पाखंडी थाशुंई। ऊईतिंङ साते जलन थालंही। ऊई मीहतु पाहठी मदम गप्पा था कुंई।

² छना ठ्रोह कवचि कटु एनोह याह ओ शुद्ध पानु लालच लहज़ा, ध्वांए ठ्रोह केतिंङ परमेश्वरो बचन सिखेच़िमी हिटी तहच़ि जूंशी तोह ताकि केरे आत्मिक रूपारिंङ सेंहणा शुहचे योंई। दोहथल थल मुखंङ, परमेश्वर केतिंङ दि संसारो मदम चीज़ो दोरच़ी बचाएके च़रपोतो।

³ छना कुचे पवित्र शास्त्रे कुट्रा, “केहच़ी अनुभवो दोरच़ी ञेंच़ातंई कि प्रभु रूठे तोह।”

^4-5 एंतेग केरे प्रभु यीशु कछंङ अंज़े तोतोंई, अंऊ श्रींङी रह्घ तु ठ्रोह तोह। मीहच़ी दि रह्घ बेकार चेहके छोड़ेके चरच़ातेर। पर परमेश्वरे दोबि कीमती चेहके अंङे च़रति दंङ दोबि मुयांदो खास रह्घ बणाके च़रति। एंतेग केरे ला श्रींङी रह्घ तु बराबर शुई, अतिंङ परमेश्वर इच्च़ा आत्मिक चुम बणाएषिमी थल्जी इस्तेमाल लहज़ा। परमेश्वरे केतिंङ पवित्र यहुदी पुरोहिता तु समाज बणाके च़रति ताकि केरे प्रभु यीशु मसीहू दोरच़ी परमेश्वरा बि खुश लहज़िमी जोगे बलिदान चढ़ाके तरपोंई।

⁶ दि ध्वांए तोह छना परमेश्वरे पवित्रशास्त्रारिंङ एनोह योह पाहठी कुट्रा, “खंणु! गेह इच्च़ा कीमती रह्घ अंङे चरच़ातग, अपि यरूशलेम शहरो स्थापना लहज़िमी थल्जी मुयांदो रह्घ तु केट्रातग। दंङ अरिला दोऊ टोईच़ी विशवास लोहतो, दुह अपेहला शर्मिन्दा माह शोतो।”

⁷ दि रह्घ केहतु थल्जी महस कीमती तोह अंऊ यीशु मसीह टोईच़ी विशवास लहज़ातंई। पर अंऊ मीहरे दोऊ टोईच़ी विशवास माह लहज़ातोर दोतु पाहठी पवित्र शास्त्रे कुट्रा कि, “राजमिस्त्रिज़ि अंऊ रह्घ तु इस्तेमाल लहज़िमी थल्जी इन्कार लेह च़रतिर, दू चुंङी मुयांदो थल्जी भत्ते बे खास रह्घ बणेंके इलि।”

⁸ दंङ पवित्र शास्त्रे दि ला कुट्रा, “दि रह्घ मीहतु ठोकरो वहज़ा शोतो। दि इच्च़ा चटान शुह अंऊ दोतु दह्पिमी वहज़ा शोतो।” दोरे बचना रिंङ विशवास लहज़ी माह जुंज़ातोर, झांह लेह दोरे ठोकर ज़ोवा दह्च़ी यवातोर। परमेश्वरे दोतंङ साते दिए शुहबिमी योजना बणाएषी ततो।

⁹ पर केरे झांह ठ्रोह माह तोंई छना कुचे केरे परमेश्वरो अंङषी मीहरे शुई, केरे झांह ठ्रोह यहुदी पुरोहित शुई अंऊ परमेश्वरो रज्ज़ा रूपा रिंङ सेवा लहज़ातंई, केरे परमेश्वरो सेवा लहज़िमी थल्जी समर्पित तोतोंई, दंङ परमेश्वरो एनोह सम्पति शुई। दोई केतिंङ हंयारो दोरच़ी एनोह अद्धभुत छंङीरिंङ अंङषी ततो, ताकि केरे परमेश्वरो अद्धभुत कमो घोषणा लेह तरपोंई।

¹⁰ भविष्यवक्ता होशे ज़ि केहतु पाहठी छि च़ेहसी तोह दुह केहतु पाहठी हेले तोह तुहई केरे परमेश्वरो मीहरे माह तोईनी, पर हेंतेग केरे परमेश्वरो मीह शुई। तुहई केरे परमेश्वरो दया माह सेहच़ाते पर हेंतेग केहच़ी दि ञेंच़ातंई छना कुचे दोई तुहई बेहच़ी केहतु टोईच़ी एनोह दया कांहषी ततो।

परमेश्वरो थल्जी श्रींङमी

¹¹ हे प्यारे साथी विशवासी रे, गेह केतंङ साते बिनती लहज़ातग कि केरे दि संसारारंङ परदेशी ए यात्री तु ठ्रोह तोतोंई। गेह केतिंङ चेतावनी रंड्रातग कि दू भत्ते मदम फुको हिटी ओ दोरच़ी बचेक्तेंई छना कुचे दू केहतु केनातु आत्माओ खिलाप हमेशा लड़ाई लहज़ा।

¹² ऊई जातिऊ मीहतु बिचंङ केहतु व्यवहार रूठे शुहबी जूंस। छना कुचे एंतेग अच़ि केतिंङ मदम कम लहज़ा कुट्रा मीहरे कुचे दोष लगाएपोर, दोरे मीहरे अपेहल परमेश्वर अपतो दुह ध्याड़ा केहतु रूठे कम खंड्रा परमेश्वरो महिमा लोहर।

अधिकारी तु अधीन बंङज़ी

¹³ हेंदिंङ दू भत्ते शासन लहज़ाड़ा तु अधीन बंङज़ी जूंशी तोह अतिंङ मीहतु दोरच़ी नियुक्त लहसी तोह, छना कुचे दि प्रभु हिटी तोह। रज्ज़ा ओ अधीन बंङज़ुंई, अंऊ भत्ते तु टोईच़ी शासन लहज़ा।

¹⁴ राज्यपालो ला अधीन बंङज़ुंई छना कुचे दू ए तोह अतु इस्तेमाल रज्ज़ा दू मीहतिंङ सज़ा रंड्रीमी थल्जी लाह अतु कम मदम तोतोर, दंङ मीहतु षटणा लहज़िमी थल्जी अतु कम रूठे तोतोर।

¹⁵ परमेश्वरे जुंज़ा कि केहच़ी केनातु रूठे कम दोरच़ी केहतु पाहठी गलत दोष लगाएच़ा मुर्ख मीहतु आह बन्द लेह तरपोंई अंऊ परमेश्वरा बि माह ञेंहच़ातोर।

¹⁶ एंतेग केरे पापो गुलाम माह तोईनि छना कुचे केरे हेंदु प्रभु यीशु मसीह दोरच़ी आज़ाद शुचे शुई। पर केरे केनातु आज़ादी ओ इस्तेमाल मदम कमो थल्जी छल्ले बहाना था बणेंक्तुंई। पर परमेश्वरो सेवका तु व्यावहार लंहि।

¹⁷ भत्ते तु आदर लंहि केनातु भत्ते साथी विशवासी तंङ साते दाह तंही, परमेश्वरा रंङ साते बेईनि, रज्ज़ा ओ आदर लंहि।

मसीह हेंदु आदर्श

¹⁸ हे चुंङ कम लहज़ा मसीह विशवासी सेवका रे, अंऊ विशवासी शुई, केतिंङ केनातु मालिको हुकुमो भाषे लहज़ी जूंशी तोह दंङ हमेशा दोतु आदर लोहवा लंहि। झांह ठ्रोह भत्ते पाहठी मालिका तंङ साते लंहि चाहे दू दयालु ए सही शोतो या चाहे दू सेहमो डगडगी शोतो।

¹⁹ अगर हेनर‌ छा गलती मेह दुख सहन लहज़ातंई दंङ परमेश्वर हेंदंङ साते खुश शुहबी। छना कुचे ञेंहच़ी ञेंहच़ातंई दुख सहन लहज़ातंई कि परमेश्वरे भत्ते धिर ञेंहच़ा।

²⁰ पर अगर केतिंङ गलत शुहबिमी थल्जी घाह केहओर ता, दंङ सज़ा खोकच़िमी मेह धीरज़ तहच़ि रंङ साते केहतु षटणा लहज़िमी छल्ले वहज़ा माह। पर अगर भलाई लहज़ी रंङ साते केरे दुख सहन लहज़ातंई दंङ धीरज़ तहज़ातंई, दोहपल परमेश्वर खुश शवाह।

²¹ परमेश्वरो दोरच़ी केरे अंङषी दोरच़ी इच्च़ा वहज़ा दि ला तोह कि केरे दोऊ थल्जी रूठे कम लहज़ा दुख सहन लेह च़रपोंई। मसीह, अच़ि केहतु थल्जी दुख सहन लहरी, दू एनाह ए केहतु थल्जी इच्च़ा उदाहरण रे च़रति, ताकि केरे दोऊ हिद लंहि।

²² पवित्र शास्त्रे कुट्रा, “दोई अपेहला पाप माह लहरी।” दंङ दोई अपेहला छा हप्सी माह कुई।

²³ अपेहल मीहच़ी यीशु अपमान लहरिर, दंङ दोई किरच़े ते दोतु अपमान माह लहरी। दंङ माह ए दोई दोतिंङ दुख रंड्रीमी कोशिश लहरी, बल्कि दोई एनोह मदतो थल्जी परमेश्वरो टोईच़ी भरोसा लहरी। दोई ञेंहच़ाते कि परमेश्वर हमेशा सच्चाई रंङ साते मीहतु न्याय लहज़ा।

²⁴ अपेहल मसीह सिए इलि, दंङ हेंदु पापो थल्जी क्रूसो टोईच़ी दोऊ फुका बि तकलीफ रेंईर ताकि हेनर पाप लेह बन्द लेह केओनि दंङ धर्मिकता रंङ साते श्रींङमी शुरू लोहनि। दंङ दू घाहो वहज़ा ज़ि अंऊ दोई सहन लहरी, हेनर ठीक शुहचे इलजे तोतोंई।

²⁵ तुहई केरे त्रैंईतु ठ्रोह तोईनी अच़ि एनोह अम योंहषी चरच़ातेर। पर हेंतेग केरे मसीहू कछंङ अच़ा अंज़े तोतोंई अंऊ केहतु आत्माओ चरवाहा ए रखवाला तोह।