1 यूहन्ना 5 - लाहौली बाइबिलसंसारो टोईच़ी जय खोकसी 1 अतु दि विशवास तोह कि यीशु ए मसीह शुह, दुह परमेश्वरो कटु शुह। दंङ अरिला बाह परमेश्वरारंङ साते दाह लहज़ा, दंङ दोई दोतंङ साते लाह दाह लोहतो अंऊ परमेश्वरो कटुर शोर। 2 अपेहल हेनर परमेश्वरारंङ साते दाह लहज़ा तंई, दंङ दोऊ हुकुम मनेक्च़ातंई, दंङ दिरंङ साते हेंज़ी ञेंच़ातंई कि हेनर परमेश्वरो कटुतंङ साते दाह लहज़ा तंई। 3 परमेश्वरारंङ साते दाह लहज़िमी मतलब तोह, दोऊ हुकुम मनेक्च़ी: दंङ दोऊ हुकुम मनेक्च़ी खरे माह। 4 छना कुचे परमेश्वरो हर इच्च़ा कटु, संसारो टोईच़ी जीत प्राप्त लहज़ा, दंङ दुह जीत अतंङ संसारो टोईच़ी जीत खोकसा, दुह हेंदु विशवास ए शुह। 5 संसारो टोईच़ी जीत खोकसा दुह अरि शुह? सिर्फ दुह अतु विशवास तो कि यीशु ए परमेश्वरो योह शुह। यीशु मसीहू पाहठी गवाही 6 दिह यीशु मसीह शुह, अतिंङ दि संसारा रिंङ परमेश्वरे च़रसी शुह, दंङ तिऊ दोरच़ी बपतिस्मा रांहषी शुह, दंङ दोऊ थल शुहई बहाएकी सिए इलि। दुह माह सिर्फ बपतिस्मा लेहपच़ी अति, पर क्रूसो टोहकठे शुहई बहाके सिमी थल्जी अति। पवित्र आत्माज़ि कंड्रा कि यीशु मसीह परमेश्वरो दोरच़ी अंज़े शुह दंङ अंऊ पवित्र आत्माज़ि कुट्रा दुह हमेशा हेले शुह। 7 गवाही रंड्रा दोरे षुम तोतोर। 8 आत्मा, ती, ए शुहई; दंङ षुमुला इच्च़ा ए गप्पा टोईच़ी सहमत तोतोर। 9 अपेहल हेनर मीहतु गवाही मनेकी केट्रातोंई, दंङ परमेश्वरो गवाही ता दोबि ला मोह्ड़े तोह; दंङ परमेश्वरो गवाही दिह तोह कि दोई एनोह योह पाहठी गवाही रांहषी ततो। 10 अंऊ परमेश्वरो योह टोईच़ी विशवास लहज़ा, दोई ञेंहच़ा कि परमेश्वरे छिल्ला लाह कुहषी ततो दुह हेले शुह, अच़ि परमेश्वरो टोईच़ी विशवास माह लहज़ा, दोई परमेश्वर बि हप्सी ठहराएति, छना कुचे दोई दुह गवाही टोहकठे विशवास माह लहरी, अंऊ परमेश्वरे एनोह योह पाहठी रांहषी ततो। 11 दंङ दुह गवाही दि तोह, कि परमेश्वरे हेन्दिंङ अनंत जीवन रांहषी ततो दंङ दि परमेश्वरो योह दोरच़ी ए तोह कि हेन्दिंङ अनंत जीवन खोकसिरी। 12 अरि परमेश्वरो योह रंङ बणेंके बंङज़ा, दोऊ दोर अनंत जीवन तोह; दंङ अरि परमेश्वरो योह रंङ बणेंके माह बंङज़ा, दोऊ दोर अनंत जीवन माह। अनंत जीवन 13 गेह दिह डाक केतिंङ च़ेहच़ी लेहकी तोतोग अंऊ परमेश्वरो योह मिंदंङ विशवास लहज़ातोर ताकि केहच़ी ञेंओनि कि केहतु दोर अनंत जीवन तोह। 14 दंङ हेन्दिंङ परमेश्वरो तुईज़ी अंऊ हिम्मत शवाह, दुह दिह तोह; कि अगर हेनर दोऊ हिटीऊ हिसाबे छा पेट्रातंई, दंङ दोई हेंदु रेड्रा। 15 दंङ अपेहल हेंज़ी ञेंच़ातंई, कि छिल्ल धिर हेंज़ी परमेश्वरो दोरच़ी पेट्रातंई, दंङ दिला ञेंच़ातंई कि छिल्ला धिर हेंज़ी दोऊ दोरच़ी पेट्रातंई, दुह खोकशातंई। 16 अगर अच़िया एनोह विशवासी न्वाबि झांह ठ्रोह पाप लहच़ी तंङफोतो, अतु नतीज़ा मौत माह शोतो, अंऊ दिऊ फल सिमी ए शोतो, दंङ बिनती लंहि दंङ परमेश्वर दोबि दोतु थल्जी, अंऊ झांह ठ्रोह पाप लहरी अतु नतीज़ा सिमी माह शोतो। पाप झांह ठ्रोह ला शुहबी अतु नतीज़ा मौत तोह, दिऊ थल्जी प्रार्थना लहच़िमी थल्जी माह कुट्रा। 17 भत्ते पाहठी अधर्म ता पाप तोह, पर झांह ठ्रोह पाप ला तोह, अतु नतीज़ा मौत तोह। 18 ञेंहच़ी ञेंहच़ातंई कि अरिला परमेश्वरो कटु शुह, दोई लगातार पाप माह लहज़ा; छना कुचे परमेश्वरो योह यीशु मसीह दोबि बचाके तहच़ा: दंङ दुह मांजी शेतान दोबि थोह्की लाह मरछा। 19 ञेंहच़ी ञेंहच़ातोंई कि, हेनर परमेश्वरो कटुरे शुई, दंङ भत्ते संसारो मीहरे दुह मांजी शेतानो वशारिंङ तोतोर। 20 दंङ दिला ला ञेंच़ातंई कि परमेश्वरो योह यीशु मसीह संसारारंङ अति, दंङ दोई हेन्दिंङ समझ रांहषी ततो, कि हेनर दुह सच्चे परमेश्वर बि सेहपोन; हेनर परमेश्वर रिंङ अंऊ हेले तोह बणेंके बंङज़ातंई। दंङ दोऊ योह यीशु मसीहरंङ बणेंके बंङज़ा तोंई, दुह ए सच्चा परमेश्वर शुह, दंङ दुह अनंत जीवन शुह। 21 हे कटुरे, केनातिंङ मुर्ति ऊ दोरच़ी बचाएगी तंही। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation