1 यूहन्ना 4 - लाहौली बाइबिलआत्माबि परखेक्तुंई 1 हे गिऊ प्यारे साथी विशवासी रे, हर इच्च़ा मीहू टोहकठे विशवास थालंही, अच़ि पवित्र आत्माओ दोरच़ी कुट्रीमी दावा लहज़ा। पर आत्मारे परखेक्तुंई कि दोरे परमेश्वरो दोरच़ी शुहरे आ माशुहरे; छना कुचे महस हप्सी भविष्यवक्तार दि संसारारिंङ तोतोरे। 2 परमेश्वरो आत्मा केहच़ी दि रीतिरंङ साते सेहषी तरपोंई, अंऊ ला मीह दि मनेके केट्रा, कि यीशु मसीह मीहू रूपारिंङ अति दुह परमेश्वरो दोरच़ी शुह। 3 दंङ अंऊ लाह मीह यीशुबि माह मनेक्च़ा, दुह परमेश्वरो दोरच़ी माशुह; दिह ए मसीहू विरोधी शुह; केहच़ी रैहशी तातंई, कि दुह अपिमी तोह, दंङ हेंतेग ला संसार रिंङ तोत। 4 हे प्यारे कटुरे, केरे परमेश्वरो शुई, दंङ केहच़ी दुह हप्साड़ भविष्यवक्तातु टोहकठे जय खोकशी केहतंई; छना कुचे पवित्र आत्माओ सामर्थ अंऊ केहतु अन्द्रेग तोह, दुह शेतानो सामर्थ बे मोह्ड़े तोह, अंऊ दि संसारारंङ तोह। 5 दोरे हप्साड़ भविष्यवक्तार संसारो शुहरे, झांह लेह दोरे दिह संसारो गप्पारे कुट्रातोरे, दंङ संसारो मीहरे दोतु रेड्रा तोर। 6 हेनर परमेश्वरो शुई, अच़ि परमेश्वर बि ञेंहच़ा, दोई ञेंहतु रेड्रा; दंङ अच़ि परमेश्वरा बि माह ञेंहच़ा दोई ञेंहतु माह रेड्रा; झांह लेह हेंज़ी सच्चाई ऊ आत्मा ए धोखा ओ आत्मा सेहच़ी केट्रातंई। परमेश्वर दाह शुह 7 हे गिऊ प्यारे साथी रे, हेनर हेंदु बिचंङ दाह तोहनि; छना कुचे दाह परमेश्वरो दोरच़ी शुह दंङ अच़िला दाह लहज़ा, दुह परमेश्वरो कटु शुह दंङ दोई परमेश्वरा बि ञेंहच़ा। 8 अरि ऊई तंङ साते दाह माह तहच़ा दोई परमेश्वर बि माह ञेंहच़ा, छना कुचे परमेश्वर दाह शुह। 9 अंऊ दाह परमेश्वरे हेन्दंङ साते तहच़ा, दुह दिरंङ साते प्रगट शुई कि परमेश्वरे एनोह इच्च़ा योह संसारारिंङ च़रति कि हेनर दोऊ दोरच़ी अनंत जीवन खोकपोंई। 10 हेंदु दाह परमेश्वरो थल्जी सच्चे माह, पर परमेश्वरो दाह हेंदु थल्जी सच्चा तोह। परमेश्वरे हेंदु पाप ऊई तार लहच़िमी थल्जी एनोह योह बलिदान लेह च़रति अतु वहज़ा ज़ि हेंदु पाप माफ शुहचे इलिर। 11 हे गिऊ साथी विशवासी रे, अपेहल परमेश्वरे हेन्दंङ साते झांह ठ्रोह दाह लहरी, दंङ हेन्दिंङ ला हेंदु बिचंङ दाह तहच़ि जूंशी तोह। 12 परमेश्वराबि अपेहल ला अच़िला माह तंङरि; अगर हेनर हेंदु बिचंङ दाह तोहनि, ता परमेश्वर हेन्दंङ साते बणेंके बंङज़ा; दंङ दोऊ दाह हेन्दंङ सिद्ध शुहचे यवाह। 13 दिरंङ ए ञेंहच़ी ञेंच़ातंई, कि हेनर दोरंङ बड़ेकी बंङज़ातंई, दंङ दुह हेन्दंङ; छना कुचे दोई पवित्र आत्मो दोरच़ी हेन्दिंङ रांहषी ततो। 14 दंङ ञेंहच़ी योह बि तंङातेंई दंङ गवाही लाह रंड्रातंई कि बाह परमेश्वरे एनोह योह बि संसारो मीहतु पापो उद्धार लहच़िमी थल्जी च़रति। 15 अच़िला दिह मनेकी केट्रा, कि यीशु परमेश्वरो योह शुह, परमेश्वर दोरंङ बड़ेकी बंङज़ा, दंङ दुह परमेश्वरारंङ बड़ेकी बंङज़ा। 16 ञेंहच़ी रूठे रंङ ञेंहच़ातंई दंङ ञेंहच़ी विशवास ला लहज़ातंई कि परमेश्वर हेन्दंङ साते दाह लहज़ा। परमेश्वर दाह शुह; अंऊ दाह रिंङ बड़ेकी बंङज़ा दुह परमेश्वरारंङ बड़ेकी बंङज़ा दंङ परमेश्वर दोरंङ साते बणेंके बंङज़ा। 17 झांह लेह दाह हेंदु बिचंङ पूरा शुचे इलि, कि फेंसला ओ ध्याड़ा रिंङ हेन्दिंङ हिम्मत खोकसोतो कि दोई हेंदिंङ सज़ा माह रमतो; छना कुचे हेनर मसीहू ठ्रोह ऊई तंङ साते दाह लहज़ातंई दंङ दि संसारा रंङ दोतु ठ्रोह बंङज़ातंई। 18 दाह रिंङ बेह्द माह शुहबी, पर सिद्ध दाह ए बेह्द ऊई तार लेह केट्री; छना कुचे अच़ि बेह्द चेहच़ा दोई सज़ा रंङ बेह्द चेहच़ा, दंङ अच़ि बेह्द लाह, दुह दाह रिंङ सिद्ध माह। 19 हेनर परमेश्वरारंङ साते ए इदि-अईदि रंङ साते दाह लहज़ा तंई, छना कुचे मुन्डा परमेश्वरे हेन्दंङ साते दाह लहरी। 20 अगर अच़िया कोहतो, “गेह परमेश्वरारंङ साते दाह तहज़ातोग,” पर एनोह विशवासी न्वा रंङ साते बैर तहरि दंङ दुह हप्साड़ शुह; छना कुचे अच़ि एनोह न्वा रंङ अच़ि दुह तंङसी शुह दाह माह तहच़ा, दंङ दोई परमेश्वरारंङ साते ला अपि दोई तंङसी माह दाह तहच़ि मरपोतो। 21 दंङ परमेश्वरो दोरच़ी हेन्दिंङ दि हुकुम खोकसा तोह, कि अच़िला एनोह परमेश्वरारंङ साते दाह तहच़ा, दोई एनोह विशवासी न्वा रंङ साते ला दाह लोह। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation