1 यूहन्ना 3 - लाहौली बाइबिल

¹ विचार ता लंहि, कि बाह परमेश्वरे हेन्दंङ साते अंयों दाह लहसी ततो, कि हेनर परमेश्वरो कटुरे शोंई दंङ हेनर दोऊ ए कटुरे शुंई, पर रेह मीहरे दि संसारो शुहरे दोरे दिह माह ञेंच़ातोर कि हेनर परमेश्वरो कटुरे शुंई, छना कुचे दोच़ी बाह परमेश्वर बि माह ञेंच़ातोर।

² हे गिऊ प्यारे साथी विशवासी रे, हेंतेग हेनर परमेश्वरो कटुरे शुहचे तोनि, दंङ हेंतेग तचेक दिह प्रगट शुहचे माह कि हेनर छना शोंई! ञेंहच़ी दिह ञेंच़ातंई कि अपेहल यीशु मसीह प्रगट शोतो ता हेनर लाह दोऊ ठ्रोह शुहचे योंई, छना कुचे हेंज़ी दुह ध्वांए ए खमोंई छना दुह तोह।

³ दंङ अच़िला मसीहू टोईच़ी दि उम्मीद तहच़ा, दोई एनाबि ध्वांए पवित्र लहज़ा, छना दुह पवित्र तोह।

⁴ अगर अच़िया पाप लोहवा लाह, दोई कानूनो भाषे माह लहज़ा। दंङ कानूनो भाषे माह लहज़ी ए अधर्म शुह।

⁵ दंङ केहच़ी ञेंच़ातंई, कि यीशु मसीह दिऊ थल्जी अंज़े शुह, कि पाप बि योह्च़े च़रपोतो; कि दोरिंङ छिल्ला पाप माह।

⁶ अंऊ लाह दोरंङ बड़ेकी बंङज़ा, दुह पापारिंङ बणेंके माह बंङज़ा; अच़िला पाप लहज़ा, दोई माह ता मसीह बि ञेंहच़ा दंङ माह ए दोबि समझेक्च़ा।

⁷ प्यारे कटुरे, अतुला धोखा रिंङ था अतंई। अच़ि धर्मो कम लहज़ा दुह ए मसीहू बराबर धर्मी तोह।

⁸ अच़ि लाह लगातार पाप लहज़ी लेहकी शवात, दुह शेतानो दोरच़ी शुह, छना कुचे शेतान शुरूआत बे पाप लहज़ा अंज़े तोह, परमेश्वरो योह झांह लेह अंज़े शुह कि शेतानो कमो नाश लोहतो।

⁹ दंङ अरिला परमेश्वरो कटु शुह दोई लगातार पाप माह लहज़ा; छना कुचे परमेश्वरो स्वाभाव दोरंङ तोह: दोई पाप लेह मरच़ा छना कुचे दुह परमेश्वरो दोरच़ी कटु शुह।

¹⁰ झांह लेह दिरंङ परमेश्वरो कटुरे ए शेतानो कटुरे ञेंच़ातेंई अंऊ मीहरे धर्मो कम लहज़ातोर, दोरे परमेश्वरो दोरच़ी शुरे, दंङ दोरे लाह अंऊ एनोह न्वा रंङ साते दाह तहच़ातोर।

इदि-अईदिरंङ साते दाह तंही

¹¹ अंऊ समाचार केहच़ी शुरूआत बेहच़ी थाक्शी तातंई दुह, दि तोह कि हेनर इदि, अईदिरंङ साते दाह लोहंई;

¹² दंङ आदमो योह कैनो ठ्रोह थाह बणेक्तुंई, दंङ अच़िला एनोह न्वाऊ हत्या लेह केट्रा, दंङ दोऊ हत्या छिल्ले लहरी? झांह लेह कि दोऊ कम मांजी तोईरे, दंङ दोऊ न्वाऊ कम धर्मो तोईरे।

¹³ हे गिऊ प्यारे साथी विशवासी रे, अगर दिह संसारो मीहरे केतंङ साते बैर तहच़ातोर ता हेरानी था शुंई।

¹⁴ ञेंहतिंङ पता तोह, कि हेनर सिमी शाक्ति ओ दोरच़ी आज़ाद शुहचे इलजी तोतोंई दंङ एंतेग हेंदु कछंङ परमेश्वरो दोरच़ी अनंत जीवन तातंई; छना कुचे ञेंरे विशवासी न्वा तंङ साते दाह लहज़ातंई अच़िला दाह माह तहच़ा दुह सिमी दशारिंङ बंङज़ा।

¹⁵ अच़िला एनोह विशवासी न्वा रंङ साते बैर तहच़ा, दुह हत्यारा शुह; दंङ केहच़ी ञेंच़ातोंई कि अरिला हत्या लहज़ाड़ो अनंत जीवन माह शुहबी।

¹⁶ ञेंहच़ी दाह दिऊ दोरच़ी ए ञेंहरिन कि यीशु मसीह हेंदु थल्जी एनोह जहान रें च़रति; झांह लेह हेंदिंङ ला विशवासी न्वारेतु थल्जी जहान रंड्री जूंस।

¹⁷ पर अतु लाह दोर्तिंङ संसारो टंगा ढबाह तोह दंङ दोई एनोह विशवासी न्वाऊ ज़रुरतो मुक्का दोबि रें दोऊ टोईच़ी तरस लेह माह जुंज़ा, दंङ दोऊ अन्द्रेग परमेश्वरो दाह छना बणेंके बंङज़तो?

¹⁸ हे गिऊ प्यारे कटुरे, हेनर बचन ए गप्पा रंङ साते मशत, पर दोतु मदत लहज़ी दोतिंङ सच्चाई रंङ दाह लोहनि।

परमेश्वरो तुईज़ी याहब

^19-20 अपेहल हेनर ऊईदि रंङ साते दाह लहज़ातंई; झांह लेह हेनर दि ञेंओनि कि हेनर सच्चाई ऊ शुंई; दंङ अपेहल लाह हेंदु सेहम हेंदिंङ दोषी कंड्रा, दंङ हेनर हेंदु दोऊ सेहमाबि याहब रें तरपोंई; छना कुचे परमेश्वर हेंदु सेहम बे मोह्ड़े तोह, दंङ दोई भत्ते धिर ञेंहच़ा।

²¹ हे गिऊ प्यारे साथी विशवासी रे, अगर हेंदु सेहम हेन्दिंङ दोष माह रंड्रा, दंङ हेन्दिंङ परमेश्वरो तुईज़ी याहब शवाह;

²² दंङ छिल्ल धिर हेंज़ी परमेश्वरो दोरच़ी पेट्रातंई, दुह हेन्दिंङ दोऊ दोरच़ी खोकसा, छना कुचे हेनर दोऊ हुकुम मनेक्च़ा तोंई, दंङ अंऊ परमेश्वरा बि रूठे च़ेहसा दुह ए लहज़ातंई।

²³ दंङ दोऊ हुकुम दि तोह कि हेनर दोऊ योह यीशु मसीहू मिंदंङ विशवास लोंई, दंङ छना दोई हेन्दिंङ हुकुम रांहषी ततो दोऊ ए हिसाबे हेंदु बिचंङ दाह लोहनि।

²⁴ दंङ अंऊ परमेश्वरो हुकुम मनेक्च़ा, दुह दोरंङ, दंङ परमेश्वर दोरंङ बड़ेकी बंङज़ा: मतलब दुह पवित्र आत्मा रंङ साते अंऊ दोई हेंदिंङ रांहषी ततो, ञेंहच़ी ञेंच़ातंई कि दुह हेन्दंङ साते बड़ेकी बंङज़ा।