1 यूहन्ना 2 - लाहौली बाइबिलमसीह हेंदु साथी 1 हे गिऊ प्यारे कटुरे, गेह दि गप्पारे केतिंङ झांह लेह चेहच़ातग कि केहच़ी पाप थालंही। दंङ अच़िया पाप लहरी ता, दंङ बाह परमेश्वर ओ कछंङ हेंदु थल्जी इच्च़ा सहायक तोह; अंऊ हेंदु पापो माफी ऊ थल्जी बाह परमेश्वर रंङ साते प्रार्थना लहज़ा मतलब यीशु मसीह अंऊ धर्मी तोह। 2 दंङ दुह हेंदु पापो माफी ऊ थल्जी बलिदान शुहचे इलि, दुह सिर्फ हेंदु ए मशत पर भत्ते संसारो मीहतु पापो थल्जी लाह बलि शुहचे इलि। 3 अगर हेनर परमेश्वरो आज्ञा मनेक्पोंई, दंङ दिरंङ साते हेंज़ी ञेंई च़रपोंई कि ञेंहच़ी परमेश्वर बि ञेंहनि। 4 दंङ अच़िला दि कुट्रा, “कि गेह परमेश्वर बि ञेंई केहरिगा,” पर दोऊ हुकुम माह मनेक्च़ा दंङ दुह हप्साड़ शुह दंङ परमेश्वरो सच्चाई ऊ हिसाबे ज़िंदगी माह श्रींङज़ा। 5 पर अच़िला परमेश्वरो बचनो पालन लहज़ा, दोरिंङ हेले परमेश्वरो दाह सिद्ध शुहचे तोह, हेंदिंङ दिरंङ ए पता लेहकी यवात कि हेनर परमेश्वरा रंङ साते बणेंके तोतोंई। 6 अच़िला दि कुट्रा कि गेह दोरंङ बड़ेकी बंङज़ा तोग, दंङ दुह ध्वांए ए श्रींङमी जूंस छना यीशु मसीह श्रींङमते। खरकोई आज्ञा 7 हे प्यारे, गेह केतिंङ अंऊ ला खरकोई हुकुम माह चेहच़ातग, पर दुह ए पुराना हुकुम अंऊ शुरूआत बे केतिंङ खोकसा तोह; दिह पुराना हुकुम दुह वचन शुह अंऊ दुह केहच़ी रैहशी तातंई, अपेहल केहच़ी यीशु मसीहू टोहकठे विशवास लहज़ातंई। 8 तांला अंऊ हुकुम गेह केतिंङ च़ेहच़ी लेहकी तोतोग दुह खरकोई हुकुम शुह, छना कुचे दिऊ सच्चाई मसीह रिंङ ए केतिंङ लाह तंङफोतो छना कुचे हंयार योह्सा यवात पर सच्चाई ऊ छंङी हेंतेग चमकेपी लेहकी तोह। 9 दंङ अच़िला दि कुट्रा, कि गेह छंङीरिंङ तोतोग; पर एनोह विशवासी न्वा रंङ साते बैर तहज़ा, दुह एंतेग तचेक ह्न्यारारिंङ ए तोह। 10 अच़िला एनोह विशवासी न्वा तंङ साते दाह तहच़ा दुह छंङीरि बंङज़ा, दंङ दिऊ थल्जी दोऊ अन्द्रेग झांह ठ्रोह छल्ले माह अंऊ ऊईतु पापो बहज़ा बणेक्पोतो। 11 पर अच़िला एनोह विशवासी न्वा रंङ साते बैर तहच़ा, दुह हन्याररिंङ श्रींङमी लेहकी तोह दंङ माह ञेंहच़ा कि, कि दुह अंऊर य्वात, छना कुचे हन्यारे दोऊ टिरा बन्द लेह केहषी ततो। 12 हे कटुरे, गेह केतिंङ झांह लेह चेहच़ातग, कि यीशु मसीहू मिंदंङ केहतु पाप माफ शुहचे तोतोर। 13 हे सेंहणा रे, छना कुचे केहच़ी ञेंहच़ातंई, अंऊ शुरूआत बेहच़ी तोह, दोबि केहच़ी ञेंच़ातंई। हे जवान रे, गेह केतिंङ झांह लेह चेहच़ातग कि केहच़ी दुह मांजी शेतानो टोहकठे जय खोकसी तातंई; हे कटुरे, गेह केतिंङ झांह लेह चेहच़ातग, कि केहच़ी बाह परमेश्वर बि ञेंहई चरच़ातंई। 14 हे सेंहणा रे, गेह केतिंङ दिऊ थल्जी चेहच़ातग, कि अंऊ शुरूआत बेहच़ी तोह केहच़ी दुह सेहच़ी चरच़ातंई। हे जवान रे, गेह केतिंङ झांह लेह च़ेहसी तरेग, कि बलवन्त शुहचे तोहई, दंङ परमेश्वरो बचन केतंङ साते बणेंके बंङज़ोतो, दंङ केहच़ी दुह मांजी शेतानो टोहकठे जय खोकच़ातंई। संसारा रंङ साते दाह थालंही 15 केहच़ी संसार ए संसारो चीज़ा रंङ साते दाह थालंही। अगर अच़िया संसारारंङ साते दाह तहच़ा ता, दंङ दोऊ अन्द्रेग बाह परमेश्वरो दाह माह। 16 छना कुचे छिल्ला दिर संसारारिंङ तोह, मतलब फुको हिटी, टिरो लालच, दंङ ढबोह घमण्ड, दुह बाह परमेश्वरो दोरच़ी मशत पर संसारो दोरच़ी ए शुह। 17 संसार ए दोऊ हिटी झुल्ला योह्सा योतो, पर अंऊ परमेश्वरो हिटी टोहकठे ज़ोज़ा दुह हमेशा बणेंके बंङज़ोतो। मसीहू विरोधी 18 हे कटुरे, दिह अन्तिम टेम शुह; अपेहल मसीह यह्च़ा वापिस अपतो, दंङ छना केहच़ी रैहशी तातंई कि मसीहू विरोधी अच़ा अंज़े तोतोर, दोऊ हिसाबे हेंतेग ला महसे मसीहू विरोधी अंज़े तोतोर; झांह लेह ञेंहच़ी ञेंहनि कि दि अन्तिम टेम दिए शुह। 19 दोरे मीहरे अंऊ मसीहू विरोध लहज़ा तेर ञेंहतु ए झुंडो बिचंङ ज़ि हुंच़ा इलोर, छना कुचे दोरे हेंदु माह शुहरे। अगर दोरे हेंदु शुंईयां ता हेंदंङ साते बंङज़ा तोहई, पर दोरे अच़ा इलिर, झांह लेह पता लेहती, दोतु बिचंङ ज़ि अरिला हेंदु माह तोईरे। 20 पर केतिंङ ता मसीहू दोरच़ी पवित्र आत्मा रांहषी तोह, दंङ केहच़ी भत्ते सच्चाई शिक्षा ञेंच़ातेंई। 21 गेह दिह दिऊ थल्जी माह चेहच़ातग, कि केहच़ी सच्ची शिक्षा माह ञेंच़ातंई, दंङ दिऊ थल्जी कि अंऊ ला हप्सी, सच्चाई दोरच़ी माह। 22 हप्साड़ अरि तोह? दिरे दुह ए शुरे अंऊ दोच़ी इन्कार लहज़ातोर कि यीशु मसीह तोह, दंङ मसीहू विरोधी दुह ए तोह, अंऊ बाह परमेश्वर ए योह इन्कार लहज़ा। 23 दंङ अच़िला योह इन्कार लहज़ा दुह बाह परमेश्वरा रंङ साते बणेंके माह। अच़ि योह बि मनेके केट्रा, दुह बाह परमेश्वरा रंङ साते बणेंके बंङज़ा। 24 ध्यान तंही; अपेहल केहच़ी मसीहू टोहकठे विशवास लहज़ातंई दंङ अंऊ सच्चाई ऊ बचन केहच़ी रैहशी तातंई, अगर दुह केतिंङ बणेंके बंङज़ोतो, दंङ केरे लाह योह रंङ साते, दंङ बाह परमेश्वर रंङ साते बणेंके बंङज़ोंई। 25 परमेश्वरे हेन्दंङ साते वाईदा लाहरी कि दोई हेन्दिंङ अनंत जीवन रमतो। 26 गेह केतिंङ दुह मीहतु पाहठी खबरदार लहज़ातग अंऊ केतिंङ गलत शिक्षा दोरच़ी धोखा रंड्रीमी कोशिश लहज़ातोर। 27 दंङ केहतु अन्द्रेग दुह पवित्र आत्मा बंङज़ा अंऊ मसीह केतिंङ रांहषी ततो, झांह लेह केतिंङ कंड्रिमी थल्जी अतुला ज़रूरत माह। छना कुचे दुह पवित्र आत्माज़ि केतिंङ भत्ते धिर सिखाएच़ा अतु केतिंङ ज़रूरत तोह। दंङ छिल्ला धिर पवित्र आत्माज़ि केतिंङ सिखाएच़ा दुह हेले शुह हप्सी मशत। छना दोई केतिंङ कांहषी ततो ध्वांए केरे दोरंङ बणेंके बंङज़ुंई। परमेश्वरो कटुरे 28 हे कटुरे, मसीह रंङ बणेंके बंङज़ुंई कि अपेहल दुह यह्च़ा प्रगट शुई ता हेन्दिंङ याहब शोतो, दंङ हेनर दोऊ अपिमी मुक्का दोऊ तुईज़ी शार्मिंदा शुहबी मेस। 29 छना कुचे केहच़ी ञेंच़ातंई, कि मसीह धर्मी शुह, दंङ दिला ञेंच़ातंई, कि अच़िला धर्मो कम लहज़ा, दोरे परमेश्वरो कटुरे शुरे। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation