1 यूहन्ना 1 - लाहौली बाइबिलजीवनो वचन 1 ञेंहरे इच्च़ा मीहू पाहठी केतिंङ च़ेहसी लेहकी तोतोंई, अंऊ जीवनो बचन शुह। दुह दिह संसारो शुरूआत बेहच़ी तोहई। अतिंङ ञेंहच़ी थाक्शी तातंई, दंङ अतिंङ ञेंहच़ी हेंदु टिरे तंङातंई पर ध्यानारंङ तंङातेंई दंङ हेंदु गुह्ट्रे दुह थोक्तेंई। 2 दि मीह अच़ि जीवन रंड्रा दुह दिह धरतीरिंङ अति, दंङ ञेंहच़ी दुह खंई, दंङ दोऊ गवाही रंड्रातंई, दंङ केतिंङ कंड्रातंई कि दि दुह ए शुह अंऊ अनंत जीवन शुह। दुह बाह परमेश्वरा रंङ साते तोहई, दंङ अपि परमेश्वरे हेंदिंङ कंङातो। 3 ञेंहच़ी यीशु मसीहू पाहठी छिल्ला ञेंहच़ी तंङातेंई या रेहशी तातंई दोऊ गवाही केतिंङ रंड्रातंई, झांह लेह कि ञेंतंङ साते केहतु संगति शुहबी जूंस। दंङ ञेंहतु दिह संगति बाह परमेश्वरा रंङ साते ए दोऊ योह यीशु मसीह रंङ साते तोह। 4 दंङ दि गप्पारे ञेंहच़ी दिऊ थल्जी चेहच़ातंई कि हेंदु खुशी पूरा शुहचे योतो। छंङीरिङ ज़ोई 5 अंऊ रूठे खबर ञेंहच़ी यीशु दोरच़ी रेहशी तातंई दंङ केतिंङ ला सुनाएच़ातोंई, दुह दिह तोह कि परमेश्वर छंङी ओ ठ्रोह पवित्र तोह दंङ दोबि छल्ले बुराई माह। 6 अगर ञेंहच़ी कुंई कि परमेश्वरा रंङ साते ञेंहतु संगति तोह, परमेश्वर छंङी ठ्रोह पवित्र तोह दंङ दोऊ अंदेरग छल्ले बुराई माह। दंङ ञेंहच़ी हप्सी कुट्रातंई दंङ सच्चाई ऊ हिसाबे माह जोज़ातंई। 7 अगर हेनर सही तरीका रंङ जीवन श्रींङमोंई, छना परमेश्वर सिद्ध रूपा रिंङ हेले तोह ध्वांए हेनर ला हेलेरिंङ श्रींङमोंई, दंङ इदि-अईदिरंङ साते संगति तहज़ातंई। दंङ परमेश्वरो योह यीशु मसीहू शुहई हेन्दिंङ भत्ते पापो दोरच़ी शुद्ध लहज़ा। 8 अगर ञेंहच़ी कुंई कि हेंदिंङ छिल्ला पाप माह लंई दंङ घेंङाबि धोखा रंड्रातंई, दंङ ञेंहच़ी कांह सच्चाई टोहकठे विशवास माह लहज़ा तंई अंऊ परमेश्वरे कुट्रा। 9 अगर हेनर परमेश्वरो तुईज़ी हेंदु पाप मनेके केट्रातंई, दंङ दुह हेंदु भत्ते पाप माफ लहच़ि ए हेन्दिंङ भत्ते अधर्मो दोरच़ी शुद्ध लहच़िमी थल्जी विशवास ओ जोगे ए धर्मी तोह। 10 अगर हेंज़ी कोंहई कि ञेंहच़ी पाप माह लंहि, दंङ हेंज़ी परमेश्वरा बि हप्सी ठहराएच़ा तोंई, दंङ एंतेग तचेक हेंज़ी परमेश्वरो बचन स्वीकार माह लहज़ातंई। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation