1 कुरिन्थियों 9 - लाहौली बाइबिल

प्रेरितातु अधिकार ए कर्तव्य

¹ छिल्ला धिर गेह लहज़ी जुंज़ातग, दुह लहज़िमी थल्जी गेह आज़ाद तोतोग, गेह प्रेरित शुगाह, गेह हेंदु प्रभु यीशु बि तंङातेग, केरे प्रभु रिंङ लहसी गिऊ सेवा ऊ नतीज़ा शुईं।

² अगर ऊई मीहरे दि स्वीकार माह लहज़ातोर कि गेह प्रभु यीशु प्रेरित शुगाह, दंङ केरे विशवासी तिंङ दि स्वीकार लेह जूंशी तोह। छना कुचे गेह दू ए शुगाह अंऊ केहतु कछंङ रूठे खबर रैंज़ा हंदेग। प्रभु यीशु रिंङ केहतु विशवास दि साबित लहज़ी लेहकी तोह कि गेह हेले रिंङ प्रभु यीशु मसीहू प्रेरित शुगाह।

³ अंऊ मीहरे गिऊ प्रेरित शुहबिमी अधिकारो टोईच़ी सवाल लहज़ातोर, दोतु थल्जी गिऊ दिए जुबाब तोह।

⁴ कि गिह्बी ए बरनाबासबि, प्रेरित शुहबिमी थल्जी दि हक तोह कि हेनर केहतु बिचंङ जीवन श्रींङमी थल्जी ढबाहो मदत (या ज़ेइमी तुंङमी चीज़ा तु) लेहप्तुंई।

⁵ छना कुचे हेंदु बिचंङ भत्तेतिंङ विशवासी मेच़िमी कटु रंङ साते ब्याह लहज़िमी ए दोबि केनातंङ साते शिल्ज़िमी अधिकार तोह, छना कि ऊई प्रेरित ए प्रभु न्वा याकूब ए यूहन्ना ए कैफा (पतरस) एनोह मेच़ा बि एनारंङ साते रैंज़ा शिलज़ातेर।

⁶ गिह्बी ए बरनबास बि ऊई प्रेरिता तु ठ्रोह ढबाहो (ज़ेइमी तुंङमी बि चीज़ा तु) मदत खोकसिमी अधिकार तोह दंङ हेंदिंङ श्रींङमी बि कम लहज़िमी ज़रूरत माह।

⁷ इच्च़ा सैनिका बि अपेहल ला एनोह खर्च रंड्री माह लेहपि। इच्च़ा मीह अंऊ दाखो बगीचा लगाएच़ा, दोई दोऊ रे फल ज़ेइमी उम्मीद ला लहज़ा। दंङ इच्च़ा पोहाल एनोह त्रैंईतु दोरच़ी पानु तुंङमिमी ला उम्मीद लहज़ा।

⁸ गेह दि गप्पारे साधारण उदाहरणो थल्जी माह कुट्रातग बल्कि मूसा ओ कानून ला दिए कुट्रा।

⁹ मूसा ओ कानूना रिंङ ला दिए च़ेहसी तोह कि, “केतिंङ दू बंङों आह छ़ुह्च़ी माह जूंस अतु इस्तेमाल भूसो दोरच़ी छ्वाह शत्‌ह लहज़िमी थल्जी शवाह।” छि केतिंङ झांह च़ेहसा कि परमेश्वरा बि सिर्फ बंङों पाहठी ए चिंद तोह? माह! अपेहल ला माह!

¹⁰ दू खास लहज़ी ञेंहतु पाहठी कुट्रा। वोई, दि ञेंहतु थल्जी ए पवित्र शास्त्रारिंङ च़ेहसी तोह, “छना कुचे रिह एहच़ा छा उम्मीदा रंङ साते ए रिह एहच़ा दंङ खलियानो दोरच़ी भूसो दोरच़ी फसल शत्‌ह लहज़ा ताकि दोई फसलो दोरच़ी एनोह हिस्सा खोकपोतो।”

¹¹ ञेंहच़ी केतिंङ परमेश्वरो खबरो प्रचार लहज़ातंई। दू मीहतु ठ्रोह अंऊ पौधार लगाएच़ातोर, ञेंहच़ी केतिंङ परमेश्वरो खबर एच़ातंई। झांह लेह केहतु थल्जी दि रूठे तोह कि केहतु रोज कि जीवन श्रींङमी थल्जी ञेंहतु मदत लोहतो।

¹² छना कुचे केरे ऊई मीहतु ढबाहो मदत लहज़ातंई (ज़ेइमी तुंङमी बि), अंऊ केहतु बिचंङ प्रचार लहज़ातोर, दंङ बरनबास ए दंङ गेह दिऊ लायक ऊई ला महस तोह छना कुचे ञेंरे केहतु थल्जी प्रेरित तोंई। हालांकि, ञेंहतु बिचंङ अच़िला दि गप्पो टोईच़ी जोर माह रेंईरे कि केरे ञेंहतिंङ दू चीज़ारे रांई अंऊ ञेंतिंङ केहतु दोरच़ी जुन्ज़ातंई, दिऊ वहज़ा, हेनर छिल्ला सहन लहज़िमी तेयार तोईनी ताकि ञेंरे मसीहू पाहठी रूठे खबरो टोईच़ी विशवास लहज़िमी अतिंङ ला रोकेक्च़ी मरपोंई।

¹³ छि केहच़ी माह ञेंच़ातंई कि मंदिरंङ कम लहज़ा गंङमी तिंङ मन्दिरो दोरच़ी एनोह बगत खोकसा? वोई, अंऊ मीहरे बेदीऊ टोईच़ी बलि रंड्रातोर, दोतिंङ दू बलि ऊ हिस्सा खोकसा।

¹⁴ दि रीतिरंङ प्रभु ज़ि ला हुकुम रांहषी ततो कि अंऊ मीहरे रूठे खबरो प्रचार लहज़ातोर दोतु खर्चा ला दू ए मीहतु दोरच़ी खोकसी जूंस अंऊ दोच़ी रूठे खबर रेड्रातोर।

¹⁵ हालांकि दि हेले रिंङ गिऊ थल्जी ठीक तोह कि अंऊ मीहतिंङ गेह प्रचार लहज़ातग, दोतंङ पेट्रोग, पर गेह घेंङौ कमो थल्जी मज़दूरी माह पेट्रातग दंङ गेह केहतु थल्जी खरकोई सीख चेहच़ातग कि केरे गिह्बी रांई। गेह केरे रूहक्पिमी बेहच़ी सिए योग छना कुचे अगर गिह्बी केहतु दोरच़ी मज़दूरी खोकसी ता गेह दि दावा लेह मरपोग कि गेह मज़दूरी लेहपच़ी मेह केहतु दोरच़ी कम लहरिगा।

¹⁶ अगर गेह रूठे खबर सुनाएच़ातग, दंङ दिरंङ गिह्बी घमण्ड लहज़िमी छल्ले वहज़ा माह; छना कुचे दि ता गिह्बी रांहषी ज़िम्मेवारी शुह; दंङ अगर गेह रूठे खबरो प्रचार माह लहज़ातग दंङ दि गिऊ थल्जी अंयों मदम शोतो।

¹⁷ अगर गेह दि कम घेंङौ हिटी रंङ साते लहज़ातग, दंङ गिह्बी ईनाम खोकसोतो। पर अगर परमेश्वरे गिह्बी दि ज़िम्मेवारी रांहषी तो ता, दंङ गेह इनामो छि उम्मीद लोहग? गेह छिला इनामो उम्मीद माह लहज़ातग।

¹⁸ दंङ छि दिए गिऊ ईनाम तोह? दि कि गेह यीशु मसीहू रूठे खबरो प्रचार मुप्ता रिंङ लोहवा लोहग, दिए गिऊ कमाई तोह, गिऊ थल्जी दि संभव तोह कि गेह कमाई मेह रूठे खबर सुनाएपोग, हालांकि गिह्बी घेंङौ खर्चो थल्जी पेट्रीमी अधिकार तोह।

¹⁹ दिऊ मतलब दि तोह कि गेह मीहतु गप्पा मनेक्च़िमी थल्जी मज़बूर माह तोग सिर्फ दिऊ थल्जी मशत कि दोरे गिऊ आर्थिक मदत लहज़ातोर, तांला गेह भत्ते तु परगर बणेंके इलजी तोतोग ताकि गेह दोतिंङ मसीह रिंङ हपि तरपोग।

²⁰ यानि कि अपेहल गेह यहुदी मीहतंङ साते तोतोग, दंङ गेह दोतिंङ मसीह रिंङ हपिमी थल्जी इच्च़ा यहुदी ऊ ठ्रोह बंङज़ातेग अपेहल गेह दोतंङ साते तोईगा अंऊ यहुदी कानूनो भाषे लहज़ातेर, दंङ गेह ला दू कानूनो भाषे बंङज़ातेग हालांकि गिह्बी कानूनो भाषे लहज़िमी ज़रूरत माह तोहई, गेह दि दिऊ थल्जी लहरिगा ताकि गेह दू मीहतिंङ मसीहू विशवासारिंङ रैंज़ा हपोग अंऊ कानूनो अधीन तोतोर।

²¹ ठीक ध्वांए, ऊई जाति तंङ साते तोहई, दंङ दोतु ठ्रोह जीवन श्रींङज़ि लेहती, ताकि दोतिंङ ला प्रभु यीशु मसीह रिंङ रैंज़ा हपोग अंऊ कानूनो अधीन ए तोतोग।

²² दंङ अपेहल गेह दोतंङ साते शवाहतग अंऊ विशवासा रिंङ कमज़ोर तोतोर, दंङ गेह दोतु ठ्रोह व्यवहार लहज़ातग, ताकि गेह दोतिंङ मसीहू विशवासारिंङ हपिमी कोशिश लेह तरपोग, गेह भत्ते मीहतु थल्जी भत्ते धिर बणेंके इलिग, कि छा तरीका रंङ साते रे मीहतु उद्धार लेह तरपोग।

²³ दंङ गेह भत्ते धिर मसीहू पाहठी रूठे खबर प्रचार लहज़िमी थल्जी लहज़ातग, ताकि दू आशीष तु हिस्सा गिह्बी ला खोकसा इबि जूंस, अतु वाईदा रूठे खबरारिंङ लहसी तोह।

मसीह रिंङ ज़रका

²⁴ छना कि ज़रका ता भत्ते ज़ि रंड्री, पर इनाम इदि ए रेंज़ा शिलज़ी? केरे ध्वांए ए ज़रका रांही, कि केरे द्रक्शे योंई।

²⁵ अंऊ पहलवान कुशती रिंङ हिस्सा लेहपच़ी जुंज़ातोर, दंङ तुहई भ्यास लहज़ातोर, दोरे एनोह टोईच़ी काबू लहज़ातोर। दोरे झांह दिऊ थल्जी लहज़ातोर ताकि द्रक्शे तरपोर दंङ इनाम खोक्शे तरपोर। दोतु आदर लहज़िमी थल्जी लपातु बणेषी हार रंड्रातंई अंऊ महसे ध्याड़ा तचेक माह बंङज़ा। पर हेनर अंऊ यीशु मसीहू टोहकठे विशवास लहज़ातंई, इनाम खोकपोंई, दंङ अंऊ रूठे इनाम दोई हेंदिंङ रमतो दू हमेशा तचेक बंङज़ोतो। झांह लेह हेंदिंङ ला हेंदु टोईच़ी काबू तहच़ि ज़रूरी तोह।

²⁶ छना इच्च़ा ज़रका रंड्रा एनोह ज़रका रंड्रीमी दिशा रिंङ बणेंके बंङज़ा या इच्च़ा मुक्केबाज़ एनोह टोईच़ी काबू लहज़ा, ध्वांए गेह घेंङौ मसीह जीवन मसीहरिंङ काबू तहज़ा ते श्रींङमातग।

²⁷ गेह घेंङौ फुका बि काबू लहज़ातग ताकि गेह घेंङौ मदम हिटी काबू लेह तरपोग, कि झांह शुहबी मेस कि अंऊ गेह ऊईतंङ रूठे खबरो प्रचार लहज़ातग, गेह घेंङौ इनाम माह खोकपोग।