1 कुरिन्थियों 8 - लाहौली बाइबिल

मुर्ति तु तुईज़ी चढ़ाएसी बगत

¹ केनातु डाकरिंङ केहच़ी गिऊ दोरच़ी मुर्ति तु तुईज़ी चढ़ाएसी बलि ओ थल्जी रूहकतेर। हेनर भत्तेर दि पाहठी रेह गप्पा ञेंच़ातंई। पर ज्ञान हेंदिंङ घमण्ड पैदा लहज़ा, पर दाह हेंदिंङ ऊईतु मदत लहज़िमी जोगे बणाएक्च़ा।

² अगर अच़िया समझेक्च़ा कि दोई छा ञेंहच़ा कि छना ठ्रोह ञेंहच़ी जूंस।

³ पर अगर अरिया परमेश्वरारंङ साते दाह तहज़ा, दंङ परमेश्वर दू मीहबी ञेंहच़ा।

⁴ दंङ हेंतेग, गेह बलि ज़ेइमी पाहठी सवालो जबाब रंड्री जुंज़ातग। ञेंहच़ी ञेंहच़ातंई कि मुर्ति सच्चा भगवान माह शुह, दंङ सिर्फ इच्च़ा ए सच्चा परमेश्वर तोह।

^5-6 हालांकि, सर्ग ए धरतीरिंङ महसे तिंङ भगवान कुट्रातोर। पर हेंदु ता इच्च़ा ए परमेश्वर तोह दंङ दू हेंदु बाह शुह। दोई भत्ते धिर बणाषी शुह, दंङ हेनर दोऊ वहज़ा ज़ि श्रींङे तोतोंई। ध्वांए हेंदु ला इच्च़ा प्रभु तोह दंङ दू यीशु मसीह शुह। दोऊ दोरच़ी भत्ते धिर बणाषी तोहई दंङ दोऊ दोरच़ी हेनर श्रींङे तोतोंई।

⁷ पर हेंदु रे विशवासी हेंतेग तचेक दि माह ञेंहच़ातोर कि मुर्ति ओ अन्द्रेग छल्ले शाक्ति माह, छना कुचे दोरे तुहई दू मुर्ति ऊ पूजा लहज़ातेर, हेंतेग अपेहल दोरे मुर्ति बि चढ़ासी बलि ज़ोवातोर, दोरे गलती रंङ सोचेक्च़ातोर कि दोरे हेंतेग ला दू मुर्ति तु पूजा रिंङ शामिल तोतोर। दंङ दि सोचेके परेशान शवाहतोर कि अगर दोरे मुर्ति बि चढ़ाएसी बगत ज़ोवातोर दंङ दोरे पाप लहज़ातोर।

⁸ पर बगत हेंदिंङ परमेश्वरो कछंङ माह पिट्रा। अगर हेनर दोबि माह जोओनी दंङ हेंदिंङ छल्ले नुकसान माह दंङ अगर हेंज़ी ज़ोवातंई ता दिरिंङ छल्ले फायदा माह।

⁹ पर खबरदार बंङज़ुंई, पर झांह शुहबी मेस, कि केहतु दि आज़ादी विशवासा रिंङ कमज़ोर मीहतु थल्जी पापो वहज़ा योतो।

¹⁰ केहच़ी ञेंहच़ातंई कि दि मुर्ति हेलेरिंङ परमेश्वर माह शुरे झांह लेह केरे मुर्तिऊ मंदिरंङ बगत ज़े तरच़ातंई। पर अंऊ विशवासारिंङ कमज़ोर तोह, अगर दुह कनिंङ दोर्तिंङ बगत ज़े तंङफोतो, दंङ दोबि ला मुर्ति बि चढ़ाएसी बलि ज़ेइमी थल्जी हिम्मत रंड्रा, भले ए दोई दि ञेंहच़ा छारिंङ माह शोतो, कि अगर दोई झांह लहज़ा ता दुह पाप शुह।

¹¹ झांह लेह कांह ज्ञानो ओ दोरच़ी अंऊ विशवासी न्वा विशवासरिंङ कमज़ोर तोह दू मसीह रिंङ विशवास लहज़ी बन्द लेह केओतो, अतु थल्जी यीशु मसीह ज़ि एनाबि बलिदान लेह च़रति।

¹² अगर हेंदु दि कम लहज़िमी रंङ साते हेंदु साथी विशवासी दोषी महसूस लहज़ा, दंङ हेंज़ी दोतु खिलाप ए मसीहू खिलाप ला पाप लहज़ी चरच़ातंई।

¹³ झांह लेह, अगर मुर्ति बि चढ़ाएसी बगत ज़ेइमी दोरच़ी अई विशवासी न्वा ऊ विशवास कमज़ोर शुहबिमी वहज़ा शवाह, दंङ गेह दि ठ्रोह बगत अपेहल ला माह ज़ोओग ताकि गेह ऊई विशवासी तु विशवास कमज़ोर शुहबिमी वहज़ा बणेक्पोग।