1 कुरिन्थियों 7 - लाहौली बाइबिल

ब्याहू थल्जी प्रश्न

¹ हेंतेग गेह दू सवाला तु पाहठी अंऊ केई केनोह डाकरिंङ रूहक्तेन केतिंङ कंड्रातग। केहच़ी रूकातेंई कि, “ञेंहतु थल्जी छि दि बेहतर शोतो आ कि ब्याह माह लोहनि।”

² पर गिऊ दि सलाह तोह कि कुकमो दोरच़ी बचेक्च़िमी थल्जी हर इच्च़ा गंङमी ऊ एनोह मेच़ा दंङ हर इच्च़ा मेच़िमी ऊ गगसा शुहबी जूंशी तोह।

³ दि ज़रूरी तोह कि गगसा एनोह मेच़ो थल्जी एनोह ज़िम्मेवारी पूरा लोहतो, दंङ ध्वांए ए मेच़ा ला एनोह गगसो थल्जी।

⁴ मेच़ा बि एनोह फुको टोईच़ी अधिकार माह, पर दोऊ गगसो अधिकार तोह; ध्वांए ए गगसा बि ला एनोह फुको टोईच़ी अधिकार माह, पर मेच़ो तोह।

⁵ केरे इदि-अई दिरंङ साते शत्‌ह था बंङज़ुंई; पर सिर्फ रें टेम तचेक केनातु बिचंङ सहमति रंङ साते प्रार्थना लहज़िमी थल्जी, दंङ यह्च़ा मेच़ा ए गगसो ठ्रोह केरे यह्च़ा इच्च़ा साते बंङज़ुंई; झांह शुहबी मेस कि केरे केनातु हिटी काबू लहज़ी मरछ़ी रंङ, शेताने मदम जीवन श्रींङमी थल्जी केहतु परीक्षा लोहतो।

⁶ पर अंऊ गेह दि कुट्रातग दि गिऊ सलाह शुह माह कि गिऊ हुकुम।

⁷ गेह दि जुंज़ातग कि छना गेह ब्याह मेह तोतोग ध्वांए भत्ते मीहरे ला शोर; पर हर इच्च़ा बि परमेश्वरो दोरच़ी खास वरदान खोकसा तोतोर। परमेश्वरे रे तिंङ ब्याह लहज़िमी वरदान रंड्री दंङ रें तिंङ ब्याह माह लहज़िमी वरदान रंड्री।

⁸ हेंतेग ब्याह माह लहसी ए रंणी तु थल्जी गिऊ दि सलाह तोह, कि दोरे गिऊ ठ्रोह बंङज़ोर, दंङ दि दोतु थल्जी ठीक तोह।

⁹ अगर दोरे एनोह टोहकठे काबू लेह मरपोर ता, दंङ दोरे ब्याह लेह च़रतुंई; छना कुचे मदम विचार तहच़िमी बे ब्याह लहच़ी रूठे तोह।

¹⁰ अतु ब्याह शुहचे इलजी तोह, दोतिंङ गेह मशत पर प्रभु दि हुकुम रंड्रा, कि मेच़ा एनोह गगसा रंङ शत्‌ह थाशुह।

¹¹ दंङ अगर शत्‌ह शवाह ला, ऊई ब्याह मेह बंङज़ु; या एनोह गगसा रंङ साते यह्च़ा ठ्रोहका शुहचे इला दंङ माह ए गगसा एनोह मेच़ा बे शत्‌ह बंङज़ु।

¹² हेंतेग गेह दू विशवासी तंङ साते गप्पा लहज़ातग अंऊ दोच़ी झांह ठ्रोह मीहतंङ साते ब्याह लहसी तातोर अंऊ दोरे विशवासी माह तोतोर। दि हुकुम गिह्बी प्रभु दोरच़ी खोकसा तोह, अगर अरिया विशवासी न्वाओ मेच़ा हेंदु प्रभु टोईच़ी विशवास माह लहज़ा दंङ एनोह गगसा रंङ साते बंङज़िमी खुश तोह, दंङ दू न्वा दोरंङ साते शत्‌ह थाशुह।

¹³ दंङ अंऊ आ विशवासी मेच़िमीऊ गगसा हेंदु प्रभु टोईच़ी विशवास माह लहज़ा, दंङ दू एनोह मेच़ा रंङ साते बंङज़िमी खुश तोह; दंङ दू मेच़िमी एनोह गगसो दोरच़ी शत्‌ह थाशुह।

¹⁴ छना कुचे अगर कांह इच्च़ा विशवासी मेच़ा शुनाह ता अंऊ अविशवासी गगसा रंङ साते बंङज़ा, दंङ केहतु गगसा ला केहतु विशवासी शुहबी रंङ साते प्रभु शुह। दंङ अगर केरे इच्च़ा ठ्रोह विशवासी गगसा शुई अंऊ अविशवासी मेच़ा रंङ साते बंङज़ातंई, दंङ कांह मेच़ा ला कांह मसीह रिंङ शुहबी रंङ साते प्रभु शुह। अगर दि हेले माह तोहई कि केहतु अविशवासी गगसा या मेच़ा परमेश्वरो शुरे, दंङ केहतु कटुरे ला परमेश्वरो माह शुचंङ पर हेंतेग केहतु कटुरे ला परमेश्वरो शुरे।

¹⁵ अगर अविशवासी गगसा या मेच़ा, विशवासी गगसा या मेच़ा रंङ साते शताह शुहबी जुंज़ा, दंङ दोतिंङ शताह शुहबी रांई। अपेहल झांह शवाह ता, दंङ दू विशवासी दू ब्याहू नाता ओ दोरच़ी आज़ाद तोह, अगर शुचि तरपो ता, केनातु अविशवासी गगसा या मेच़ा रंङ ब्याहू नाता रिंङ जुड़ेके तोंई, छना कुचे परमेश्वरे हेंदिंङ इदि-अई दिरंङ साते शांति रंङ जीवन श्रींङमी थल्जी बुलासी शुईं।

¹⁶ हे विशवासी मेच़ा रे केतिंङ हिद बंङज़ी जूंस कि शायद केहतु वहज़ा ज़ि केहतु गगसा ला एनोह पापो दोरच़ी पश्चाताप लेह मसीह बणेंके तरपोर। दंङ हे विशवासी गगसा रे केतिंङ ला हिद बंङज़ी जूंस कि शायद केहतु वहज़ा ज़ि केहतु मेच़ा ला एनोह पापो दोरच़ी पश्चाताप लेह मसीह बणेंके तरपोतो।

परमेश्वरो बुलाहटो हिसाबे जोज़ि

¹⁷ अंऊ गेह कुट्रातग दोऊ निचोड़ दि तोह, कि विशवासी बि दू हालातरिंङ बणेक्पि जूंस अंऊ हालातरिंङ परमेश्वरे केरे अंङे चरच़तो दंङ केतिंङ एनोह मीहरे शुहबिमी थल्जी बुलाएक्तो भत्ते विशवासी तु थल्जी गिऊ दिए हुकुम तोह।

¹⁸ उदाहरणो थल्जी अपेहल इच्च़ा यहुदी प्रभु यीशु टोहकठे विशवास लहज़ा, दंङ दोबि एनोह यहुदी शुहबिमी छोड़ेक्च़िमी ज़रूरत माह दंङ झांह ए ठ्रोह दिला कि अगर अरिया मीह ऊई जाति तोह, दंङ प्रभु रिंङ विशवास लहज़ा, दंङ दोबि यहुदी बणेक्पिमी थल्जी खतना लहज़िमी ज़रूरत माह।

¹⁹ चाहे अतुआ खतना शुहसी शोतो या माह शोतो, दिरंङ छल्ले फर्क माह पड़ेक्पा, पर परमेश्वरो हुकुम मनेक्च़ी ज़रूरी तोह।

²⁰ हर इच्च़ा विशवासी बि दू ए हालातरिंङ बंङज़ी जूंशी तोह अंऊ हालातरिंङ परमेश्वरे दोरे अंङे केहतो दंङ दोतिंङ एनोह मीहरे शुहबिमी थल्जी बुलासी ततो।

²¹ अगर अरिया मीह परगर तोह ता, दंङ प्रभु टोईच़ी विशवास लहज़ा, दंङ केतिंङ दि गप्पो मदम लेहपि माह जूंस, हालांकि, अगर केहतु मालिक केतिंङ कंड्रा कि केरे आज़ाद शुहचे तरपोंई, दंङ इबि तरपोंई।

²² छना कुचे छना परमेश्वरो हालातरिंङ परमेश्वरे अंङे चरच़तो ए बुलासी ततो, दंङ दू इच्च़ा आज़ाद मीहू ठ्रोह तोह छना कुचे प्रभु यीशु ज़ि दोबि दोऊ पापो दोरच़ी आज़ाद लेह चरच़तो, दंङ ध्वांए अंऊ आज़ादो हालातरिंङ बुलासी ततो, दोरे मसीहू परगर शुहचे इलजी तोतोर।

²³ परमेश्वरे केहतु थल्जी इच्च़ा मोह्ड़े कीमत रांहषी ततो। झांह लेह मीहतु परगर मशत पर परमेश्वरो परगर बणेक्तुंई।

²⁴ हे गिऊ प्यारे साथी विशवासी रे, अंऊ अरिला हालातरिंङ बुलासी तोह, दू ध्वांए परमेश्वरारंङ साते बंङज़ु।

ब्याह माह लहसी ए रंणी मेच़िमी रे

²⁵ कुंवारे ए ब्याह माह लहसी तु पाहठी प्रभु छल्ले हुकुम गिह्बी माह खोकसिरी, पर परमेश्वरे एनोह दया जोगे गिह्बी ज्ञान रांहषी ततो अतु टोईच़ी विशवास लेह तरपोंई दंङ गेह दोऊ हिसाबे घेंङौ सलाह रें तरपोग।

²⁶ छना कुचे दि ध्याड़ो मुक्का भत्ते ठहरि विशवासी तु थल्जी खरे ध्याड़ा तोह, झांह लेह गिह्बी च़ेहसा कि केहतु थल्जी झांह लेह रूठे तोह। कुंवारा मीहतिंङ गेह दि सलाह रंड्रातग कि दोरे ब्याह माह लहज़ा ए बंङज़ेंई।

²⁷ अगर कह ब्याह लहसी शुनाह दंङ केनोह मेच़ो दोरच़ी शत्‌ह शुहबिमी कोशिश थालोहू; दंङ अगर कुंवारा तोतोंई, दंङ ब्याह लहज़िमी कोशिश थालंही।

²⁸ तांला अगर केरे ब्याह लहज़ातंई, दंङ दिरिंङ छल्ले पाप माह दंङ अगर कुंवारा दोई ब्याह लहज़ा ता छल्ले पाप माह लहज़ा, पर झांह ठ्रोह मीहतिंङ दि जीवना रिंङ पक्‍का ए दुख सहन लहज़ी पढ़ेक्पोतो। दिऊ दोरच़ी गेह केतिंङ बचाएच़ातग।

²⁹ हे गिऊ प्यारे साथी विशवासी रे, गेह दि कुट्रातग, कि मसीहू वापिस अपिमी ध्याड़ा महस माह झांह लेह चाहे केहतु मेच़ा तोह या माह, दि पाहठी महस चिंद लहज़िमी ज़रूरत माह। पर प्रभु सेवा लहज़िमी पाहठी सोचेक्सा लंहि।

³⁰ अंऊ मीहरे क्रपच़ातोर या अंऊ दोरे खुश तोतोर या अंऊ मीहरे एनातु थल्जी चीज़ चुमज़ातोर दोतिंङ दि भत्ते चीज़ा तु पाहठी महस चिंद लहज़िमी ज़रूरत माह छना कुचे दि भत्ते गप्पो दोरच़ी केरे प्रभु सेवा लहज़ी पेहषा योंई।

³¹ दंङ दि संसारारंङ छि धिर ञेंहतु कछंङ तोह, ञेंतिंङ दोबि महस खास च़ेहसी माह जूंस, छना कुचे दि संसारारिङ भत्ते धिर योह्सा योतो।

³² गिऊ हिटी तोह कि केरे संसारो हिटी ओ दोरच़ी शत्‌ह बंङज़ुंई, कुंवारा गंङमी दि चिंद लहज़ी कि परमेश्वरो सेवा छना लोहग, दुह प्रभु बि खुश लहज़ी जुंज़ा।

³³ पर ब्याह लहसी गंङमी संसारो गप्पारिंङ चिंद लहज़ा, कि एनोह मेच़ा बि छना ठ्रोह खुश लेह तरपोतो।

³⁴ ब्याह लहसी ए कुंवारा तु बिचंङ लाह फर्क तोह, कुंवारी मेच़िमी कटु परमेश्वरो सेवा लहज़िमी चिंद लहज़ी कि दू एनोह सेहम ए फुका बि प्रभु थल्जी शत्‌ह लहज़ा पर ब्याह लहसी मेच़िमी संसारो चीज़ा तु पाहठी चिंद लहज़ा कि छना घेंङौ गगसा बि खुश लोहग।

³⁵ गेह दि गप्पा केहतु फायदा ओ थल्जी कुट्रातग, माह कि केतिंङ भरमासिमी थल्जी, पर दिऊ थल्जी कि छना ठीक तोह ध्वांए लेह च़रतुंई; ताकि केरे भत्तेर इच्च़ा सेहम शुहचे प्रभु सेवा लोहवा लंहि।

³⁶ अगर केहतु बिचंङ अरिया मीह एनोह मिओ कुंवारी तहज़ा, पर हेंतेग दोई सोचेक्सा कि दि सही कम माह शुह, पर अगर दोऊ मिओ ब्याह लहज़िमी थल्जी युरनाह यांङषे योतो, दंङ हेंतेग बाह ज़ि सोचेक्च़ा कि दोऊ मियो ब्याह शुहबी जूंस, दंङ दोबि दू ए लहच़ी जूंशी तोह अंऊ दोबि च़ेहसा। दोई ब्याह लहज़िमी हुकुम रें पाप माह लहज़ा। दोबि एनोह मियो ब्याह लहज़ी जूंशी तोह।

³⁷ पर अगर दि बाह ज़ि एनोह दिमागरिंङ पक्‍का फेंसला लेह चरच़तो कि दोऊ मियो थल्जी ब्याह माह लहज़ी बेहतर तोह, दंङ अच़िला दोबि झांह लहज़िमी थल्जी मज़बूर माह लोहर, दंङ दोऊ कछंङ झांह लहज़िमी अधिकार तोह।

³⁸ दंङ अच़ि एनोह कुंवारीऊ ब्याह लेह केट्रा, दोई ठीक लहज़ा, दंङ अच़ि ब्याह माह लहज़ा, दोई ऊई लाह ठीक लहज़ा।

³⁹ अपेहल तचेक अरिया मेच़िमी ऊ गगसा श्रींङे बंङज़ा, दंङ दोबि धोंण तचेक दोरंङ साते बंङज़ी जूंस, पर अगर दोऊ गगसा सिए इलि ता, दंङ अतंङ साते जुंज़ा दोहरंङ साते ब्याह लेह तरपोतो, पर ज़रूरी दि तोह कि दू मीह ला प्रभु टोहकठे विशवास लहज़ा शुहबी जूंस।

⁴⁰ पर अगर दोई यह्च़ा ब्याह माह लहज़ा दंङ गिऊ विचारारिंङ दि ऊई ला महसे रूठे तोह, दंङ गेह समझेक्च़ातग, कि अपेहल गेह केतंङ साते झांह कुट्रातग ता परमेश्वरो आत्माओ तरफे कुट्रातग।