1 कुरिन्थियों 6 - लाहौली बाइबिलमसीहरिङ मुकदमा 1 अगर केहतु बिचंङ अतुआ ऊई अरिया विशवासी रंङ साते झगड़ा शवाह, दंङ केतिंङ अंऊ ला संसारिक अदालता इबि माह जूंस। बल्कि केतिंङ केनातु कलीसिया रिंङ ऊई विशवासी तिंङ केनातु मामला ओ फेंसला लहज़िमी थल्जी कुट्री जूंस कि केहतु बिचंङ अरि सच्चा तोह। 2 पक्का रूपारिंङ केहच़ी ञेंहच़ातंई कि भविष्य रिंङ परमेश्वरो मीहरे दि संसारारंङ मीहतु फेंसला लोहर। झांह लेह, अपेहल केतिंङ दि संसारो मीहतु फेंसला लहज़ी तोह दंङ केतिंङ कवचि-कवचि झगड़ा तु फेंसला लहज़िमी जोगे शुहबी जूंस। 3 केतिंङ पता तोह कि भविष्य रिंङ हेनर स्वर्गदूतातु फेंसला लोहनि, दंङ पक्का रूपारिंङ हेनर दि जीवनो साधारण गप्पो फेंसला लेह तरपोंई। 4 अगर झांह ठ्रोह गप्पा तुईज़ी अपा, दंङ केतिंङ दू मीहतंङ साते निपटाच़ी माह जूंस अंऊ दोतिंङ कलीसिया रिंङ आदरो जोगे माह समझेक्च़ातोर। 5 गेह केतिंङ षेह्पिमी थल्जी दि कुट्रातग। छि केहतु बिचंङ इच्च़ा ला झांह ठ्रोह बुद्धिमान मीह माह, अंऊ विशवासी न्वारेतु बिचंङ शुहचे झगड़ो फेंसला लेह तरपोतो? 6 देर ता इच्च़ा विशवासी अई दोबि कोर्टंङ रैंज़ा शिलज़ा, दंङ दू ला अविशवासीतु तुईज़ी। 7 अगर केहतु बिचंङ छा झगड़ा शुहबी लेहकी तोह, दंङ केरे तुहई ए नाकाम शुहचे इलजी तोतोंई, दिऊ वहज़ा केतिंङ दि लेह जूंशी तोहई कि ऊईतु बुराई सहन लंहि दंङ केनातु नुकसान शुहबी रांई। 8 पर केरे गलत लहज़ी लेहकी तोतोंई दंङ धोखा रंड्रातंई, दंङ झांह केरे केनातु साथी विशवासी तंङ साते लहज़ातंई। 9 केतिंङ पता तोह कि, अन्याय लहज़ा मीहरे बाह परमेश्वरो राजो वारिस माह शोर; अरिया धोखारिंङ केतिंङ दि सोचेकच़ी मज़बूर लहज़ी माह जूंस कि केरे मदम कम लेह तरपोंई तांला बाह परमेश्वरो मीहतु बिचंङ ज़ि इच्च़ा बणेंके बंङज़ुंई, धोखा रिंङ था बंङज़ुंई, छना कुचे माह कुकम लहज़ा, माह मुर्तिओ पूजा, माह ऊईतु मेच़िमी ऊ लालच, माह लुचपन, माह गंङमी-गंङमी रंङ साते कुकम लंहि। 10 माह चोरी, माह लालची, माह सरा तुंङज़ाड़, माह गाड़ी रंड्रा, माह अन्धेर लहज़ा परमेश्वरो राजो वारिस शोर। 11 तुहई केहतु बिचंङ रे ध्यांए ठ्रोह श्रींङमातेर, पर केरे प्रभु यीशु मसीहू मिंदंङ साते ए हेंदु परमेश्वरो आत्मा रंङ साते केहतु पाप शुहल्ज़े चरच़तो, दंङ केतिंङ एनोह थल्जी शत्ह लहरी दंङ केतिंङ एनोह नज़ारारिंङ धर्मी बणाके चरच़तो। फुक परमेश्वरो महिमा ओ थल्जी 12 केहतु बिचंङ रे मीहरे झांह कुट्री तरपोर, कि “गिह्बी भत्ते धिर लहज़िमी इजाज़त तोह” छना कुचे गेह इच्च़ा विशवासी शुगाह वोई भत्ते धिर फायदा ओ माह गेह कुट्रातग, “गिह्बी भत्ते धिर लहज़िमी हुकुम तोह,” छना कुचे गेह इच्च़ा विशवासी शुगाह। 13 “रे मीहरे ता झांह ला कुट्री तरपोर कि, बगत खोकटुंङ ओ थल्जी शुह।” दि हेले शुह कि, पर परमेश्वर झुल्लो अंत लेह च़रपोतो। फुक कुकमो थल्जी माशुह, बल्कि हेंदिंङ हेंदु फुको इस्तेमाल लेह जूंशी तोह अंऊ प्रभु ज़ि जुंज़ा दंङ हेंदु फुक प्रभु थल्जी शुह। 14 दिऊ अलावा, हेंदु फुक ज़रूरी तोह, छना कुचे छना ठ्रोह प्रभु यीशु बि सिमी दोरच़ी श्रींङमी लहज़िमी थल्जी एनोह शाक्ति ओ इस्तेमाल लहरी, ध्वांए हेंदिंङ ला सिमी दोरच़ी श्रींङमी लोहतो। 15 छि केहच़ी माह ञेंच़ातंई आ कि केहतु फुक मसीहू अंङ शुह? छि इच्च़ा मीह एनोह फुक रेंज़ा, अंऊ मसीहू शुह, दंङ छि दिबी कुकम लहज़ार रंङ साते जोड़ेक्सी जूंस? 16 दंङ केतिंङ पता शुहबी जूंस कि अरिला कुकम लहज़ा मेच़िमी तंङ ठ्रोहका शवात, दुह दोरंङ साते इच्च़ा फुक शुचि इबि। छना कुचे पवित्रशास्त्रारिंङ च़ेहसी तोह, “झुल्ला इच्च़ा फुक शोर।” 17 दंङ अंऊ प्रभु रंङ जुड़ेके यवा, दोऊ आत्मा ए प्रभु आत्मा इच्च़ा साते जुड़ेके यवा। 18 कुकमो दोरच़ी पूरी तरह शत्ह बंङज़ेंई, मीहू दोरच़ी लहसी ऊई पाप दोऊ फुका बि धोंण नुकसान माह लहज़ा, अंयों कुकमे लहज़ा कुकम लहज़ा दोई एनोह फुको खिलाप पाप लहज़ा। 19 छि केहच़ी माह ञेंच़ातंई आ, कि केहतु फुक मन्दिर शुह अंऊर पवित्र आत्मा बंङज़ा, दंङ पवित्र आत्मा अंऊ केतिंङ परमेश्वरो तरफे खोकसा तोह, अंऊ केहतु अंदरेग बसेकी तोह, दंङ केरे परमेश्वरो शुई। 20 छना कुचे केरे ढबाह रेंई ते च़ुमसी शुई; झांह लेह केनातु फुको दोरच़ी परमेश्वरो महिमा लंहि। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation