1 कुरिन्थियों 5 - लाहौली बाइबिल

कलीसियारिङ अनेतिकता

¹ गेह मीहतिंङ केहतु पाहठी दि कुट्री रेड्रीगा, कि केहतु कलीसिया रिंङ रें मीहरे कुकम लहज़ातोर, मतलब कि झांह ठ्रोह कुकम अंऊ ऊईजाति तु बिचंङ ला माह शवाह, दू दि तोह कि इच्च़ा मीह एनोह सौतेली याह रंङ साते कुकम लहज़ा।

² केतिंङ दुह मीहु दि कुकमो वहज़ा ज़ि दुखी शुहबी जुंशी तोहई। झांह ठ्रोह मीहबी केनातु बिचंङ ज़ि हुंच़ि च़रच़ी जुंशी तोह। पर दिऊ बहज़ा केहच़ी दिऊ टोईच़ी घमण्ड लहज़ातंई।

³ हालांकि गेह केतंङ साते माह तोईगा, पर गिऊ विचार केतंङ साते तोहई, दंङ गेह दू मदम कम लहज़ा ओ खिलाप घेंङौ फेंसला झांह ठ्रोह रें चरच़ातग माना गेह घेंङौ दोर तोतोग।

⁴ अपेहल केरे प्रभु यीशु मसीहू मिंदंङ साते ठ्रोहका शवातंई दंङ यीशु मसीहू सामर्थ रंङ साते आत्मा रि गेह केहतु बिचंङ तोतोग।

⁵ दंङ दू मीह अंऊ पापी व्यवहार लहज़ा, दोबि केनातु कलीसिया ओ दोरच़ी धकतेखा हुंज़ी च़रतुंई दंङ दू मीहबी शेतानो हवाले लेह च़रतुंई, ताकि दि उम्मीद लेह तरपोंई कि दू एनोह दोरच़ी पश्चाताप लोहतो, छना कुचे अगर दू पश्चाताप लोहतो, दंङ दू हेले रिंङ दू ध्याड़ा रिंङ बचेकी योतो अपेहल प्रभु ज़ि न्याय लोहतो।

⁶ केहतु घमंड लहज़ी बिल्कुल ला ठीक माह शुह, छि केहच़ी माह ञेंच़ातंई आ, कि थोड़े अरे सुमे भत्ते त्रुक्क्षी फुकान ला सुम ज़डे लेह चरच़ि? ध्वांए, अगर इच्च़ा मीहबी पाप लहज़ी छोड़ेके च़रपोंई, दंङ युरनाह ए भत्ते मीहतिंङ दुह पाप फेलेके भत्ते मीहरे दुह पाप लहज़ी शुरू लेह च़रपोर।

⁷ केरे पापो युई सुम हुंज़े च़रतुंई, मतलब दि कुकम लहज़ा मीहु हखा कुंई कि दुह हेंदु संगति रिंङ शामिल शुहबी माहरपोतो। दंङ केरे पापो प्रभाव मेह इच्च़ा खरकोई ए शुद्ध नाता रिंङ इदि-अई दिरंङ साते जोड़ेक्च़ा ठ्रोह विशवासी तु इच्च़ा शुद्ध झुण्ड शुचि योंई, हेले रिंङ केरे परमेश्वरो पवित्र मीह शुई। छना कुचे मसीह हेंदु फसहो त्याहरो कुरच़ा हेंदिंङ हेंदु पापो दोरच़ी छुड़ाएच़िमी थल्जी बलिदान शुहचे शुह।

⁸ झांह लेह गेह कुट्रातग कि हेंदिंङ हमेशा पवित्र मीहतु ठ्रोह व्यवहार लेह जूंशी तोह हेंदिंङ बुराई रंङ साते श्रींङमी माह जूंस छना कि हेंज़ी मसीहू टोहकठे विशवास लहज़िमी तुहई लाहतंई, मतलब कि हेंदिंङ दू मदम कम लेह बन्द लहज़ी जूंशी तोह अंऊ हेंज़ी लहज़ातंई दिऊ वहज़ा, हेंदिंङ परमेश्वरो हुकुमो भाषे लहज़ी तोह दंङ अंऊ ला मदम कम लहज़ी माह मतलब हमेशा ईमानदार ए सच्चा शुहबी जूंस।

⁹ गेह घेंङौ मुण्डो डाकरिंङ केतिंङ दि च़ेहसी तातेग, कि कुकम लहज़ा तंङ साते मेल-जोल था तंही।

¹⁰ दि माह कि केरे बिल्कुल दि संसारो कुकम, ए लालची तु, या दू मीहतु अंऊ ऊईतिंङ धोखा रंड्रातोर, या मुर्ति पूजा लहज़ा तु संगति थालंही; छना कुचे दि दशारिंङ ता केतिंङ संसारो दोरच़ी हुंच़ा इबि पढ़ेक्पोतो।

¹¹ गिऊ कुट्री दि तोह कि अगर अरिया एनाबि विशवासी कुट्रा, कुकम, लालची, या मुर्ति पूजा लहज़ा, या गाड़ी रंड्रा, तुंङज़ाड़ (पियक्कड़), या ऊईतिंङ धोखा रंड्रा शोतो, ता दोरंङ साते संगति थालंही; पर झांह ठ्रोह मीहतंङ साते बगत ला थाज़ंई।

¹² छना कुचे अंऊ मीहरे विशवासी माह तोर दोतु न्याय लहज़ी गिऊ ज़िम्मेवारी माह। पर पक्‍का रुपारिंङ केतिंङ दू मीहतिंङ अनुशासित लेह जूंशी तोह अंऊ केहतु कलीसिया ओ मीहरे तोतोर।

¹³ अंऊ मीहरे विशवासी माह तोर दोतु न्याय परमेश्वरे लहज़ा: पर छना पवित्र शास्त्रारिंङ च़ेहसी तोह, “दू कुकर्मी बि केनातु संगति बिचंङ ज़ि हुंच़ी च़रतुंई।”