1 कुरिन्थियों 4 - लाहौली बाइबिलमसीहू प्रेरित 1 हेले ता दि शोतो कि मीहरे हेंदिंङ यीशु मसीहू सेवक ए परमेश्वरो भंडारी ए ञेंओर, अतिंङ रूठे खबरो ब्याके सच्चाई बि समझाएक्सिमी कम रांहषी तोह। 2 छना भंडारी बि कम रांहषी ततो, दोऊ दोरच़ी दि उम्मीद लेह तरपोंई कि दुह विशवासो जोगे शुहबी जूंस। 3 अंऊर तचेक गिऊ गप्पा तोह, गेह दि गप्पो चिंद माह लहज़ातग कि केरे या ऊई मीहरे छि कुट्रातंई कि गेह विशवासो जोगे तोतोग या माह तोग। देर तचेक कि गेह ला माह कुट्रातग कि गेह विशवासो जोगे तोतोग या माह तोग। 4 गिऊ फर्क आत्मा गिह्बी छल्ले दोष माह खोकसा तांला गेह दिऊ दोरच़ी निर्दोष साबित शुहचे मरच़ातग प्रभु ए तोह, अंऊ गिऊ परख लहज़ा। 5 झांह लेह अपेहल तचेक प्रभु दोबारा वापिस माह अपा दू मुक्का तचेक अतुला न्याय थालंही। छना कुचे प्रभु साफ तरीका रंङ साते दू भत्ते विचार कम्बोतो, अंऊ मीहतु अंदरेग तोह, अतु पाहठी ऊई अच़िला माह ञेंओर। दू दोतु इरादा बि प्रगट लोहतो अंऊ दोतु सेहमरिंङ तोह, दोहपल परमेश्वरे दोतु षटणा शोतो। 6 हे गिऊ प्यारे साथी विशवासी रे, गेह अपुल्लोस ए घेंङौ ज़िकर दिऊ थल्जी लहरिगा ताकि केतिंङ हेंदु उदाहरणो दोरच़ी छा शिक्षा खोकसोतो दंङ केरे दिऊ अर्थ सिखेकतुंई अंऊ दोई कुट्रा, “पवित्र शास्त्र रिंङ छि च़ेहसी तोह दोऊ तुंखा थाशुह।” दि रूठे माह अगर केरे इदिऊ आदर लहज़ातंई, दंङ अईदि बि नीचा कंड्रातंई। 7 अच़िला केतिंङ ऊईदि बे खास बणाषी माह! छिल्ला धिर केहतु कछंङ तोह दू केतिंङ परमेश्वरो दोरच़ी खोकसा तोह। दंङ केतिंङ घमण्ड लहज़िमी छल्ले अधिकार माह। 8 झांह च़ेहसा केरे चेहच़ातंई कि केहतु कछंङ दू भत्ते धिर तोह अतु आत्मिक हिसाबे केतिंङ ज़रूरत तोह। केहच़ी ञेंहच़ातंई कि केहतु कछंङ तुहई बेहच़ी दू खास वरदान तोह अंऊ पवित्र आत्मा मीहतिंङ रंड्रा। केहच़ी ञेंहच़ातंई कि केरे ञेंतंङ मेह रज्ज़ा तु राज लहज़ी शुरू लेह चरच़ातंई। गेह खुश शुचंङ अगर केरे हेले रिंङ रज्ज़ा तु ठ्रोह राज लहज़ी शुरू लेह च़रपोंई, ताकि ञेंरे ला केतंङ साते राज लेह तरपोंई। 9 गिह्बी झांह च़ेहसा कि परमेश्वरे हेनर प्रेरिता तिंङ जीतो यात्रा रिंङ मौतो सज़ा खोकसा कैदी तु ठ्रोह भत्ते बे थल मुक्का केहषी ततो। हेनर भत्ते संसार ए मीहतु तुईज़ी ए स्वर्गो स्वर्गदूता तु तुईज़ी तमाशा शुहचे इलजी तोतोंई। 10 मीहरे हेंदिंङ मुर्ख चेहच़ातोर, छना कुचे हेनर मसीहू पाहठी प्रचार लहज़ातंई, पर गलती रंङ साते केहच़ी सोचेक्च़ातंई कि केरे महस बुद्धिमान विशवासी शुई! महसे मीहरे सोचेक्च़ातोर कि ञेंहतु कछंङ छल्ले अधिकार माह। केहतु कछंङ परमेश्वरो शाक्ति तोह। मीहच़ी ञेंहतु आदर माह लहज़ातोर पर दोरे केहतु आदर लहज़ातोर। 11 हेनर तोंखी ध्याड़ा तचेक योंई ए तिस्करे तोतोंई, द्ववाके ए युई खमज़ेर लहच़ातंई, घाह खोकच़ातंई, दंङ ञेंहतु कछंङ च़ुम ला माह। 12 दंङ हेंदु ए गुह्ट्र कम लहज़ी मेहनत लहज़ातंई। अपेहल मीहच़ी ञेंतिंङ मदम कुट्रातोर, दंङ ञेंरे दोतिंङ आशीष रंड्रातंई; दोरे सताएच़ातोर दंङ ञेंरे सहन लहज़ातंई। 13 मीहच़ी ञेंहतु निन्दा लहज़ातोर दंङ ञेंरे नम्रता रंङ साते दोतंङ गप्पा लहज़ातंई। मीहरे हेंतेग ला हेंदंङ साते झांह ठ्रोह बर्ताब लहज़ातोर, माना कि हेनर संसारारंङ भत्ते चीज़ो जगत्रको ठ्रोह तोतोंई। चेतावनी 14 गेह केतिंङ षेपिमी थल्जी दि गप्पा माह चेहच़ातग, पर गिऊ मकसद केतिंङ शिक्षा रंड्री तोह, छना कुचे केरे गिऊ कटुतु ठ्रोह शुई। अतंङ गेह हेले दाह लहज़ातग केतिंङ गेह चेतावनी रंड्रातग। 15 छना कुचे चाहे केहतु कछंङ मसीहरिंङ शिक्षा रंड्रा हज़ार शोर, पर गेह ए केहतु बाह ओ बराबर शुगाह अंऊ केहतु कछंङ रूठे खबर रैंज़ा हंदेग, अतु नतीज़ा केरे यीशु मसीह रिंङ विशवास लहज़ी लेहती। 16 झांह लेह गेह केतंङ साते बिनती लहज़ातग, कि गिऊ ठ्रोह मसीह रिंङ केनातु जीवन जोंई। 17 गेह तीमुथियुसा बि अंऊ यीशु रिंङ गिऊ प्यारे ए विशवासो जोगे योह तोह, केहतु कछंङ च़रतिगा, छना कि गेह हर ठहरि ए हर इच्च़ा कलीसियारिंङ शिक्षा रंड्रातग। 18 केहतु बिचंङ रेह मीहरे सोचेक्च़ातोर कि गेह केतंङ साते दोई माहग, दंङ दिऊ थल्जी दोरे घमण्डी शुहचे इलजी तोतोर। 19 पर अगर प्रभु ज़ि जुंज़ा ता केहतु कछंङ युरनाह अपोग, पर दू घमण्डी तु सिर्फ शिक्षा ए माह, पर दोतु सामर्थ ला ञेंई केहऊगा। 20 छना कुचे परमेश्वरो राज सिर्फ महसे गप्पा लहज़ी माह शुह; पर परमेश्वरो सामर्थो दोरच़ी श्रींङमी तोह। 21 केहच़ी छि जुन्ज़ातंई कि गेह अंज़े केतंङ साते छि लोहग? अगर केहच़ी हेंतेग ला केनातु मदम तरीका ब्याड़ा माह लहज़ातंई दंङ गेह महस कठोर शुहचे केतिंङ रैहच़ोग। पर अगर केहच़ी केनातु मदम तरीका ब्याड़ा लेह केहतंई, दंङ गेह केहतु साते नम्रता ए दाह रंङ साते व्यवहार लोहग। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation