1 कुरिन्थियों 3 - लाहौली बाइबिलकलीसियारिङ दलबन्दी थल्जी झगड़ा 1 हे गिऊ प्यारे साथी विशवासी रे, अपेहल गेह केतंङ साते तोईगा केहतु डुह्गे शिक्षा कंज़े माहरतिगा छना गिह्बी आत्मिक मीहतंङ साते लेह जूंस। गेह झांह ठ्रोह गप्पा लहज़ी लेहती छना केरे दि संसारो शुई या छना कि केरे मसीह जीवनारिंङ कटुतु ठ्रोह शुई। 2 गेह केतिंङ परमेश्वरो बचनो दोरच़ी योह्च़े अरे शिक्षा रंदेग, माह कि डुह्गे सच्चाई ओ छना कुचे केरे दू मुक्का झांह ठ्रोह शिक्षा खोकच़िमी ए समझेक्सिमी थल्जी तेयार माह तोंई। 3 छना कुचे हेंतेग तचेक केनातु पापी हिटी रिंङ तोतोंई। झांह लेह अपेहल कि केरे जलन ए लड़ाई ए झगड़ा तोह, छि दिरंङ दि साबित माह शवाह कि केरे केनातु पापी स्वाभावो दोरच़ी काबू शवातंई? दंङ केरे झांह ठ्रोह मीहतु ठ्रोह श्रींङमातंई अंऊ प्रभु माह तोर। 4 झांह लेह अपेहल इदि दि कुट्रा कि गेह, “पोलुसो चेला शुगाह,” दंङ अईदि कुट्रा, “गेह अपुल्लोसो चेला शुगाह” दंङ केरे झांह ठ्रोह मीहतु ठ्रोह श्रींङमातंई अंऊ प्रभु माह तोर। 5 दंङ अरि शुह अपुल्लोस ए दंङ अरि शुह पोलुस? छि सिर्फ सेवक, अतु दोरच़ी केहच़ी विशवास लहरिन। हर इच्चे प्रभु दोरच़ी रांहषी ज़िम्मेवारी निभाके च़रतिर। 6 केतिंङ परमेश्वरो खबर कंड्रा गेह मुण्डो मीह तोईगा झांह लेह गेह दू मीहू ठ्रोह शुगाह अच़ि रीहरिंङ बेईज़ा एच़ी च़रति। दोऊ थल अपुल्लोस ए केहतु विशवासा रिंङ पक्का शुहबिमी थल्जी मदत लहरी, ठीक ध्वांए छना ऊई मीह दूह पौधा रिंङ ती रंड्रा अंऊ मोह्ड़े शवाहतोर। पर परमेश्वरे केतिंङ खरकोई जीवन रांई दंङ केतिंङ आत्मिक तरीका रंङ साते बणेक्पिमी मदत लहज़ा, छना परमेश्वरे पौधार मोह्ड़े लहज़ा। 7 झांह लेह अच़ि ऐच़ा दंङ अच़ि ती रंड्रा दूह खास माह शुह। सिर्फ परमेश्वरे ए खास तोह, छना कुचे दू ए तोह अंऊ पौधा र मोह्ड़े लहज़ा। 8 गेह केतिंङ रूठे खबर सुनाएकातग दंङ परमेश्वरो बचन सिखासी शुरू लाहतग दंङ अपुल्लोसे केतिंङ सिखासी जारी ततो पर ञेंहकु झुल्लो मकसद इच्च़ा ए तोह, दंङ हर इच्च़ा मीह एनोह मेहनतो हिसाबे परमेश्वरो दोरच़ी इनाम खोकपोतो। 9 हेनर परमेश्वरो साथी शुई; दंङ केरे कुरिन्थुस ओ विशवासी इच्च़ा रिहो ठ्रोह तोतोंई अंऊ परमेश्वरो तोह। साते ए, गेह केहतु बराबरी इच्च़ा चुंङ ज़ि लेह तरपोग अपि परमेश्वर बणाच़ी लेहकी तोह। 10 परमेश्वरे अंऊ वरदान गिह्बी रांहषी ततो, दोऊ इस्तेमाल लहज़ी गेह दू चुंङो मुयांद इच्च़ा बुद्धिमान राजमिस्त्री ठ्रोह केईगा, दंङ ऊई मीहरे दू मुयांदो टोईच़ी कम लहज़ी लेहकी तोतोर, पर भत्ते मीहतिंङ खबरदार बंङज़ी जूंशी तोह कि दोरे दिऊ टोहकठे छना कम लहज़ी लेहकी तोतोर। 11 दि चुंङ रि अंऊ मुयांद तुहई बेहच़ी केहषी तोह दू यीशु मसीह शुह, दंङ अरिला ऊई मुयांद केहच़ी मरपोतो। 12 अगर मसीह मज़दूर सच्ची रंड्रातोर अंऊ परमेश्वरे दोबि रांहषी ततो, दंङ दू, दू चुंङ बणाएषा तु ठ्रोह तोह ज़ंङ, मुल ए कीमती रह्घतु रूठे ठ्रोह समान केहच़ी चुंङ बणाएच़ातोर। पर अगर दोरे हप्सी शिक्षा रंड्रातोर, दंङ दोरे दू चुंङ बणाएच़ा दोतु ठ्रोह तोतोर, अंऊ सिंह, श्रांङ ए भूसो ठ्रोह बेकार चीज़ो इस्तेमाल लहज़ातोर। 13 इच्च़ा ध्याड़ा हर इच्च़ा दू कमो खसीयत खमतो अंऊ दोच़ी लहसी तोह। छना कुचे अपेहल यीशु मसीह दोबारा वापिस अपतो दंङ दू साफ रूपारिंङ दि गप्पा तिंङ हिद लोहतो दि दू टेमो ठ्रोह शोतो अपेहल धातु परखेक्च़िमी थल्जी मेहू बिचंङ केट्री। दोई दि खमतो कि हर इच्च़ा मज़दूरे छि-छि लहतो, दंङ दोई कंबोतो कि दि रूठे तोह या बेकार। 14 अगर दू कम अंऊ इच्च़ा मज़दूरे मुयांदो टोईच़ी बणाएक्तो, दू रोहषी माह जूंस, दंङ दू मज़दूर परमेश्वरो दोरच़ी ईनाम खोकपोतो। 15 पर अगर मज़दूरे लहसी कम रूठे माह, दंङ मसीह दू मज़दूरा बि ईनाम माह रमतो। तांला, दोऊ दू अनंत जीवन बचेकी योतो अंऊ परमेश्वरे दोबि रांहषी ततो। 16 केतिंङ पक्का पता तोह, कि केरे परमेश्वरो मन्दिर शुई, दंङ परमेश्वरो रांहषी आत्मा केहतु अंदरेग बास लहज़ा। 17 अगर अरिया मीह केतिंङ अंऊ परमेश्वरो मन्दिरो बराबर तोतोंई मिलेकी-जुलेकी बंङज़ी माह रंड्रा। दंङ परमेश्वर दोबि महस खरे सज़ा रंड्रा; छना कुचे परमेश्वरो मन्दिर पवित्र तोह, दंङ दू मन्दिर केरे शुई। 18 अगर केहतु बिचंङ अरिला दि सोचेक्च़ा कि दू दि संसारो मीहतु नज़रारिंङ ज्ञानवान तोह, दंङ केतिंङ दि संसारो नज़रारिंङ केनातिंङ मुर्ख बणाषी जूंशी तोह, ताकि केरे हेले रिंङ परमेश्वरो तुईज़ी ज्ञानवान बणेंके तरपोंई। 19 छना कुचे दि संसारो मीहतु ज्ञान परमेश्वरो कछंङ मुर्खता तोह, छना पवित्र शास्त्रा रिंङ च़ेहसी तोह कि, “परमेश्वर ज्ञानवान दोतु चालाकी दोतिंङ ए फसाच़िमी थल्जी फंदा ओ रूपारिंङ लहज़ा,” 20 दंङ पवित्र शास्त्र दि ला कुट्रा कि, “प्रभु ज्ञानी तु विचार ञेंहच़ा, कि दोरे बेकार तोतोर।” 21 झांह लेह अंऊ ला खास मीहू थलेच़ि जोज़िमी पाहठी घमण्ड लहज़ी बन्द लंहि। छना कुचे परमेश्वरे केतिंङ भत्ते धिर केहतु भलाई ओ थल्जी रांहषी ततो। 22 झांह लेह गेह खास लहज़ी पोलुस ए अपुल्लोस चाहे कैफा (पतरस), या संसारो चीज़ा रे चाहे केरे श्रींङे बंङज़ेंई या सिए इलांई, चाहे वर्तमान, या भविष्य, परमेश्वरे दि भत्ते धिर केहतु भलाई ओ थल्जी रांहषी ततो। 23 केरे मसीहू अधिकारो अधीन तोतोंई, दंङ मसीह परमेश्वरो अधिकारो अधीन तोह। |
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
Beyond Translation