1 कुरिन्थियों 2 - लाहौली बाइबिल

क्रूसित मसीहू पाहठी खबर

¹ हे गिऊ प्यारे साथी विशवासी रे, अपेहल गेह परमेश्वरो पाहठी रूठे खबर सुनाच़ी केहतु कछंङ अतिगा, गेह मोह्ड़े-मोह्ड़े शब्दा तु इस्तेमाल माह लहरिगा, दंङ गेह समझदार शुहबिमी कोशिश ला माह लहरिग।

² छना कुचे केहतु बिचंङ गेह दि ठानेगी अतिगा कि गेह यीशु मसीह ए दोऊ क्रूसो मौतो अलावा ऊई अंऊ ला गप्पा माह ञेंहरिगा।

³ दंङ गेह कमज़ोरी ए बेह्दरंङ साते, दंङ महसे डगेकी ते केतंङ साते बंङज़िरी।

⁴ दंङ गिऊ शिक्षा ए गिऊ प्रचार संसारिक ज्ञान ए लालचो गप्पा माह, पर पवित्र आत्माज़ि केतिंङ इच्च़ा सामर्थो शाक्ति रंङ साते कंङातो कि अंऊ खबर केतिंङ कंङातग दू हेले तोहई।

⁵ ताकि झांह लेह कि केहतु विशवास मीहतु ज्ञानो टोईच़ी माह, पर परमेश्वरो सामर्थो टोईच़ी निर्भर शोतो।

परमेश्वरो ज्ञान

⁶ तांला गेह दोतिंङ, अंऊ आत्मिक रूपारिंङ पक्‍का तोतोर, ज्ञान पिंङषी खबर रंड्रातग पर दि ज्ञान माह दि जुगो शुह दंङ माह ए दुह जुगो अधिकारी तु शुह, अतु नाश शुहबी पक्‍का तोह।

⁷ पर अंऊ ज्ञानो हेंज़ी गप्पा लहज़ातंई दू ज्ञान परमेश्वरो ज्ञान शुह अंऊ ब्याके तोहई। हेंतेग तचेक अरिला दिबी माह ञेंहच़ाते। परमेश्वरे धरती बणाषी बे तुहई ए फेंसला लहज़ी चरच़ाते कि दोऊ ज्ञान हेंदिंङ महिमा रमतो।

⁸ अतिंङ दि संसारो अधिकारी तु बिचंङ अच़िला परमेश्वरो योजना माह ञेंरिर, छना कुचे अगर दोच़ी ञेंईयां, ता तेजोमय प्रभु बि क्रूसो टोईच़ी माह चढ़ाएतिंया।

⁹ पर छना पवित्र शास्त्रारिंङ च़ेहसी तोह, “माह अच़िया अपेहला तंङरिर, दंङ माह अच़िया अपेहला रेड्रीर, दंङ माह ए अपेहला अच़िया दू रूठे चीज़ा तु पाहठी सोचेक्सी तोह, अंऊ परमेश्वरे दू मीहतु पाहठी तेयार लहसी तोह अंऊ दोरंङ साते दाह लहज़ातोर।”

¹⁰ पर परमेश्वरे दि गप्पा हेंदु टोईच़ी मतलब प्रेरिता तु टोईच़ी एनोह पवित्र आत्माऊ दोरच़ी प्रगट लहरी, छना कुचे झांह ठ्रोह छिल्ला माह अंऊ परमेश्वरो आत्माबि पता माह शोतो। देर तचेक कि परमेश्वरो डुह्गे विचार ला दू रूठे रंङ ञेंहच़ा।

¹¹ मीहतु बिचंङ अरि अच़ि मीहू गप्पा ञेंहच़ा, सिर्फ मीहू आत्मा अंऊ दोऊ अंदरेग तोह। ध्वांए परमेश्वरो गप्पा ला अच़िला माह ञेंहच़ा, सिर्फ परमेश्वरो आत्मा ए ञेंहच़ा।

¹² हेनर ध्वांए ठ्रोह माह सोचेक्च़ातंई छना संसारो मीहरे सोचेक्च़ातोर; छना कुचे हेंज़ी दू आत्मा खोकसी तातंई, अंऊ परमेश्वरो तरफे तोह, कि हेनर दू गप्पा ञेंओनि, अंऊ परमेश्वरे हेंदिंङ रांहषी ततो।

¹³ दंङ झांह लेह हेनर दि गप्पार ऊईतिंङ कंड्रातंई, दंङ हेनर दि शब्दा तु इस्तेमाल माह लहज़ातंई, अंऊ मीहतु ज्ञानो दोरच़ी खोकसा, पर हेनर दू शब्दा तु इस्तेमाल लहज़ातंई अंऊ परमेश्वरो आत्माओ दोरच़ी खोकच़ातंई, अंऊ आत्मिक ज्ञानो दोरच़ी आत्मिक गप्पा समझाएक्च़ा।

¹⁴ पर फुको मीह परमेश्वरो आत्माओ सच्चाई ग्रहण माह लहज़ा, छना कुचे दोऊ नज़रा रिंङ मूर्खताओ गप्पो तोह इच्च़ा मीह पवित्र आत्माओ सिखासी गप्पो जांच परख लेह तरच़ा, अपेहल दोऊ अन्द्रेग परमेश्वरो पवित्र आत्मा बंङज़ा।

¹⁵ दोरे मीहरे अंऊ दोतिंङ पवित्र आत्मा खोकसा तोह दू भत्ते चीज़ समझेगी तरपोर अंऊ पवित्र आत्मा सिखाएच़ा। पर अतु कछंङ पवित्र आत्मा माह दोरे दू मीहतु विचार समझेकी माह रपोर अतु कछंङ आत्मा तोह।

¹⁶ “दि गप्पा हेले तोह कि छना पवित्र शास्त्रारिंङ च़ेहसी तोह, कि अच़िला दि ञेंई मरपोर कि प्रभु सेहमरिंङ छि तोह। अरिला दोबि सिखासी मरपोतो या सलाह रें मरपोतो।” पर हेनर विशवासी दि समझेकी तरपोंई कि मसीहू सेहमरिंङ छि तोह।