1 कुरिन्थियों 16 - लाहौली बाइबिल

बिशवासीतु थल्जी दान

¹ हेंतेग गेह केहतु दुह सवालो जबाब रमोग अंऊ केहच़ी यरूशलेम शहरंङ परमेश्वरो मीहतु थल्जी ढबाह ठ्रोहका लहज़िमी थल्जी रूहक्च़ातंई, दंङ दोऊ जबाब दिह तोह कि अंऊ गेह गलातिया प्रदेशो कलीसिया बि कंङाते, ध्वांए केहच़ी ला लंहि।

² हप्ता ओ पहला ध्याड़ारिंङ केहतु बिचंङ हर इच्च़ा एनोह आमदनीऊ हिसाबे थोड़े अरे ढबाह शत्‌ह तोह कि गिऊ दोर अपिमी मुक्का केतिंङ ढबाह ठ्रोहका लेह पड़ेक्पोतो माह

³ दंङ अपेहल गेह दोर्तिंङ बंङज़ोग दंङ गेह दुह मीहबी च़रपोग, अतिंङ केहच़ी विशवासो मीह चेहके अंङे चरच़ातेंई कि दोरे ढबाह यरूशलेम शहरो हखा रेंज़ा शोर। गेह दोतंङ साते इच्च़ा डाक ला च़रपोग कि दोर कि विशवासी तंङ साते दोतु जान-पहचान लेह तरपोग।

⁴ अगर केतिंङ च़ेहसा कि गिऊ इबि रूठे तोह, दंङ दोरे गेरंङ साते योर।

पोलुसो यात्राऊ कार्यक्रम

^5-7 अगर दि प्रभु हिटी तोह ता गेह केतंङ साते महस ध्याड़ा तचेक बंङज़ी तातग। झांह लेह गेह थोड़े टेमो थल्जी केहतु कछंङ माह रूहमज़ोग, अपेहल कि गेह मकिदुनिया प्रदेशो हखा इबि लेहकी तोतोग। दोर इलजी थल गेह केहतु कछंङ अपोग। दोहथल गेह थोड़े ध्याड़ो थल्जी या सोह्ईऊ ध्याड़ो मुक्का केतंङ साते बंङज़ोग। दोऊ थल, केरे गिऊ अई यात्राऊ थल्जी गिऊ ज़रूरत पूरा लोहनि, चाहे दुह अंऊर ला शुह।

⁸ पर गेह पिन्तेकुस्त त्याहरो तचेक इफिसुस शहरारि बंङज़ोग।

⁹ छना कुचे हेंतेग ला देर महस मीहरे तोतोर अंऊ परमेश्वरो बचन रेड्री तातोर, दंङ गिऊ देहर बंङज़ी महस फायदा तोह। हालांकि देर परमेश्वरो महस विरोधी ला तोतोर।

¹⁰ अगर तीमुथियुस केहतु कछंङ कुरिन्थुस शहरंङ अपतो, दंङ दोरंङ साते रूठे रंङ बर्ताब लोहु; छना कुचे दुह गिऊ बराबर प्रभु कम लहज़ा।

¹¹ झांह लेह अरिला दोऊ अनादर था लंहि, पर दोई रूठे रंङ दोबि दुह भत्ते धिर रोंऊ अंऊ दोबि एनोह सफरो थल्जी ज़रूरत तोह। छना कुचे गेह दोबि रुमज़ा तोतोग, कि दुह विशवासी तंङ साते अपतो।

¹² दंङ साथी विशवासी अपुल्लोसरंङ साते गेह महसे विनती लहरिगा कि ऊई विशवासी तंङ साते अतंई अंऊ केतंङ साते दोहई अंदेर, पर दोई दि मुक्का इबिमी छल्ले हिटी माह लहरी, पर अपेहल सही टेम शोतो, दोहपल अच़ा अपतो।

अन्तिम आदेश ए नमस्कार

¹³ खबरदार बंङज़ुंई, विशवासा रिंङ ढकाह तोहई, हिम्मत तंही, दंङ विशवासा रिंङ पक्‍का शुहचे तोहई।

¹⁴ केहच़ी छिल्ला लहज़ातंई दाह रंङ साते लंहि।

¹⁵ हे गिऊ प्यारे साथी विशवासी रे, केहच़ी स्तिफनुसो टबरातिंङ ञेंईनि आ, कि दोरे अखाया प्रदेशो मुण्डो तोईरे अच़ि मसीहू टोईच़ी विशवास लहरिर, दंङ परमेश्वरो मीहतु मदत लहज़िमी थल्जी तेयार बंङज़ातोर।

¹⁶ झांह लेह गेह केतंङ साते विनती लहज़ातग, कि झांह ठ्रोह सेंहणातु भाषे लंहि, बल्कि हर इच्च़ा बि अंऊ दोच़ी महस मेहनत लहज़ातोर दंङ अंऊ दोरे झांह ठ्रोह सच्ची भक्ति रंङ साते सेवा लहज़ातोर।

¹⁷ दंङ गेह स्तिफनुस ए फुरतूनातुस ए अखईकुसो अपिरंङ साते खुश तोतोग, छना कुचे दोच़ी गिऊ मदत लहज़ातोर कि अंऊ केहच़ी खोक्शे मरतेनि छना कुचे केरे देर माह तोंई।

¹⁸ दंङ दोच़ी गिऊ सेहम पक्‍का लहरिर ठीक ध्वांए दोच़ी केहतु थल्जी लोहर अपेहल दोरे केहतु कछंङ अपोर, झांह लेह केतिंङ झांह ठ्रोह मीहतु आदर लेह जूंशी तोह।

¹⁹ आसिया प्रदेशो कलीसिया ओ तरफे केतिंङ नमस्कार; अक्किला ए दोऊ मेच़ा प्रिस्किल्ला ओ दंङ दुह कलीसिया अंऊ दोतु चुंङ ठ्रोहका शवाह, दोऊ ला केतिंङ प्रभु रिंङ महसे-महसे नमस्कार।

²⁰ देर भत्ते विशवासी केतिंङ नमस्कार कुट्रातोर। इदि-अई दिरंङ साते दाह रंङ साते ग्वाक्षा ते नमस्कार लंहि।

²¹ गेह पोलुस दि नमस्कार घेंङौ गुह्ट्री च़ेहसी लेहकी तोतोग। अगर अच़िया प्रभु रंङ साते दाह माह लोहतो दंङ दुह श्रापित शोतो।

²² हे ञेंहतु प्रभु, अता।

²³ गेह प्रार्थना लहज़ातग कि प्रभु यीशु मोह्ड़े दाह केहतु टोईच़ी शुहवा लोहतो।

²⁴ गेह केतंङ भत्ते तंङ साते दाह लहज़ातग, अतु यीशु मसीह रंङ साते डुह्गे नाता तोह। अमीन।