1 कुरिन्थियों 15 - लाहौली बाइबिल

पोलुसो रूठे खबर ए मसीहू यह्च़ा श्रींङमी

¹ हे गिऊ प्यारे साथी विशवासी रे, गेह केतिंङ दुह ए रूठे खबर हिद दिलाएच़िमी तातग अंऊ गेह तुहई सुनाके चरच़ातग, अंऊ रूठे खबरो टोईच़ी केहच़ी विशवास लहज़ातंई दंङ अंऊ दोऊ दोरच़ी केरे खड़े ला तोतोंई।

² अगर केरे दुह रूठे खबरो टोईच़ी विशवास तंही अतु गेह केहतु बिचंङ प्रचार लहतेग, दंङ दुह रूठे खबरो दोरच़ी परमेश्वरे केतिंङ बचाएच़ा। माह ता केहतु विशवास लहज़ी शुह्के शुह।

³ झांह लेह गेह केतिंङ दुह खास खबर कंङातेग अंऊ गिह्बी प्रभु यीशु दोरच़ी खोकसते। कि पवित्रशास्त्रो बचनो हिसाबे यीशु मसीह हेंदु पापो थल्जी सिए इलि,

⁴ दंङ पथेगी केहरी; दंङ परमेश्वरे दोबि पवित्र शास्त्रो हिसाबे सिए दोतु बिचंङ ज़ि श्रींङमी लहरी।

⁵ दुह पतरस (कैफा) ए ऊई सनी चेला तिंङ तंङरि।

⁶ दोहथल ङा राह बे महसे चेला तिंङ इच्च़ा साते तंङरि, अंऊ दोतु बिचंङ महसे तोग तचेक श्रींङे तोतोर पर रेह सिए इलोर।

⁷ दोहथल याकूबा बि तंङरि दोहथल भत्ते प्रेरिता तिंङ ला तंङसिरी।

⁸ दंङ भत्ते तु थल गिह्बी ला तंङसिरी, अंऊ कि दुह कटु ठ्रोह तोहई, अंऊ टेम बे तुहई जेह्कते।

⁹ छना कुचे गेह प्रेरिता तु बिचंङ भत्ते बे कम खास शुगाह, हेले कोहग ता गेह प्रेरित कुट्रीमी जोगे ला माह शुगाह, छना कुचे गेह परमेश्वरो टोईच़ी विशवास लहज़ा मीहतिंङ तंग लहज़ातेग।

¹⁰ पर अगर तोग गेह प्रेरित शुगाह दंङ दुह परमेश्वरो मोह्ड़े दाह शुह। दंङ दोऊ मोह्ड़े दाह अंऊ गिऊ टोईच़ी शुई, दुह शुह्के माह शुई पर गेह ऊई अरिला प्रेरित बे महस मेहनत ला लहरिगा ता दि गिऊ दोरच़ी मशत पर परमेश्वरो मोह्ड़े दाह गिऊ दोरच़ी कम लहज़ाते।

¹¹ झांह लेह चाहे गेह तोतोग, या दोरे ऊई प्रेरित शोरे, हेनर भत्तेर मसीहू पाहठी इच्च़ा ए रूठे खबरो प्रचार लहज़ातंई, दंङ दिऊ ए टोईच़ी केहच़ी ला विशवास लहज़ातंई।

सिए दोतु यह्च़ा श्रींङमी

¹² झांह लेह हेंतेग गेह केतंङ साते दि रूहक्च़िमी तातग: छना कुचे ञेंहच़ी भत्ते ज़ि केहतु बिचंङ दि प्रचार लहज़ातंई कि अपेहल मसीह सिए इलदे दंङ परमेश्वरे मसीह बि यह्च़ा श्रींङमी लहरी, दंङ केहतु बिचंङ ज़ि अच़िला दि कुट्री माह जूंस कि परमेश्वर विशवासी तु सिमी थल यह्च़ा श्रींङमी माह लोहतो!

¹³ अगर सिए दोरे यह्च़ा श्रींङमोर माह ता, दंङ मसीह ला श्रींङमतो माह।

¹⁴ दंङ अगर परमेश्वरे मसीह बि सिए दोरच़ी यह्च़ा श्रींङमी माह लहरी ता, दंङ अंऊ रूठे खबरो हेंज़ी प्रचार लहज़ातंई दंङ मसीहू टोईच़ी केहतु विशवास लहज़ी शुह्के तोह।

¹⁵ दिऊ अलावा, हेनर साफ तरीका रंङ दुह गवाह शुई अंऊ दोच़ी परमेश्वरो पाहठी हप्सी कुहषी तातंई छना कुचे हेंज़ि गवाही रंदेनि कि दोई मसीह बि सिए दोतु बिचंङ ज़ि यह्च़ा श्रींङमी लहरी। पर अगर दि हेले तोह कि सिए दोरे श्रींङमी माह, दंङ परमेश्वरे मसीह बि सिए दोतु बिचंङ ज़ि श्रींङमी माह लहरी।

¹⁶ गेह यह्च़ा कुट्रातग, अगर अरिला सिए दोतु बिचंङ ज़ि श्रींङी माह दंङ मसीह बि ला श्रींङमी लहसी माह शुह।

¹⁷ दंङ अगर मसीह श्रींङे माह, दंङ केहतु विशवास लहज़ी बेकार शुह; दंङ केरे हेंतेग तचेक केनातु पापारिंङ फसेके तोतोंई।

¹⁸ धोंण ए मशत, अंऊ मीहरे मसीहू टोईच़ी विशवास लहज़ा सिए इलोर, दोतु ला नाश शुचे इलज़ा।

¹⁹ अगर मसीहरिंङ हेंदु उम्मीद सिर्फ दिए जीवनो थल्जी तोह, दंङ हेंदु टोईच़ी संसारो ऊईतु तुलना रिंङ भत्ते बे महस तरस लेह जूंशी तोह।

²⁰ पर सच्चाई दि तोह कि परमेश्वरे हेले रिंङ मसीह बि सिए दोतु बिचंङ ज़ि श्रींङमी लहरी, दंङ दोई हेंदिंङ दि गप्पो थल्जी हिम्मत रंड्रा कि दोई दुह मीहतिंङ ला श्रींङमी लोहतो अंऊ सिए इलजी तोतोर।

²¹ भत्ते मीहतु सिमी वहज़ा दुह ए तोह हेंतेग सिए दोतु ठ्रोह जीवना रिंङ वापिस अपिमी थल्जी इच्च़ा मीहच़ी लहसी शुह दंङ दुह मीह मसीह शुह।

²² इच्च़ा मीह मतलब आदमो पापो वहज़ा ज़ि भत्ते मीहतिंङ सिए लेहपा। ध्वांए ठ्रोह इच्च़ा मीह मतलब यीशु मसीह ज़ि छि लहसी ततो दोऊ वहज़ा ज़ि, भत्ते सिए दोतिंङ यह्च़ा श्रींङमी लोहर।

²³ पर हर इच्च़ा मीह एनोह बारी ओ हिसाबे सिए दोतु बिचंङ ज़ि श्रींङमी लोहर; मसीह मुण्डो मीह शुह अपि श्रींङमी लहसी शुह, दंङ अपेहल मसीह वापिस अपतो दंङ अंऊ दोरंङ साते पक्‍का नाता तहज़ातोर दोतिंङ यह्च़ा सिए दोतु बिचंङ ज़ि श्रींङमी लोहर।

²⁴ दंङ, अपेहल मसीह, परमेश्वरो विरोध लहज़ा भत्ते मदम शाक्ति तु नाश लेह च़रपोतो, दोऊ थल संसारो अंत शुहचे योतो। दोहपल मसीह एनोह बाह परमेश्वरा बि एनोह राज रें च़रपोतो कि दुह, दोऊ टोईच़ी पूरे तरह ठ्रोह राज लोहतो।

²⁵ छना कुचे मसीह बि रज्ज़ा ओ रूपा रिंङ दोहपल तचेक राज लेह जूंशी तोह, अपेहल तचेक कि परमेश्वर दोऊ भत्ते बैरीतिंङ दोऊ अधीन लेह माह च़रच़ा।

²⁶ अंऊ बैरी बि भत्ते बे थल मुखंङ नाश लोहतो दुह मौत शुह।

²⁷ पवित्रशास्त्रे कुट्रा कि, परमेश्वरे भत्ते धिर दोऊ सामर्थो अधीन लेह च़रपोतो ता दिरिंङ परमेश्वर शामिल माह छना कुचे दि परमेश्वर ए तोहई अच़ि भत्ते धिर मसीहू सामर्थो अधीन लेह चरच़ाते।

²⁸ अपेहल भत्ते धिर परमेश्वरो योह अधीन शुहचे योतो, दंङ योह एनाबि पूरे तरह ठ्रोह परमेश्वरो अधीन लेह च़रपोतो, अच़ि दोबि दुह हक रांहषी ततो। दंङ सिर्फ परमेश्वर ए प्रभु शुह अंऊ भत्ते धिर ए भत्ते रिंङ कम लहज़ा।

²⁹ अगर सिए दोतिंङ श्रींङमी माह लोहर, दंङ दुह मीहच़ी छि लोहर अंऊ दोरे सिए दोतु थल्जी बपतिस्मा लेहपच़ातोर? छना कुचे दिरंङ दोतिंङ छल्ले फायदा माह शोतो। अगर सिए दोरे हेले रिंङ यह्च़ा श्रींङमोर माह, दंङ दोरे दोतु दुह रिवाज़ छिल्ले लहज़ातोर?

³⁰ अंऊर तचेक हेंदु गप्पा तोह, अगर सिए दोतिंङ श्रींङमी माह लहरिन ता, दंङ हेंदु हेंदिंङ खतरा रिंङ केट्री मुर्खता शुह।

³¹ हे गिऊ प्यारे साथी विशवासी रे, गेह रोज मोतो सामना लहज़ातग गेह छि कुट्रातग दि हेले रिंङ सच्चाई शुह छना कि दि ला सच्चाई शुह कि गेह हेले रिंङ खुश तोतोग छना कुचे केरे ञेंह्तु प्रभु यीशु मसीहू टोईच़ी विशवास लहज़ातंई।

³² देहर इफिसुसा रिंङ, गिऊ बैरीर खतरनाक जानवरा तु ठ्रोह तोतोर अंऊ गिऊ नुकसान लेह जुंज़ातोर। गेह हेंतेग ला दि भत्ते छिल्ले सहन लहज़ातग अगर गिऊ ईनाम दि संसारारिंङ ए तोह अगर दि हेले शुचंङ कि गिह्बी अंतिम ध्याड़ा रिंङ यह्च़ा श्रींङमी माह लोहर, दंङ रूठे शुचंङ कि गेह मौज़ लंहीयां, छना कि दि कहावत तोह, “अतंई हेंज़ि ज़ोई तुंङमोंई छि पता मुतंङ हेनर सिए योंई आ दंङ दुह हेंदु अंत शोतो।”

³³ अंऊ मीहच़ी झांह ठ्रोह गप्पा लहज़ातोर दोतु ठ्रोह मुर्ख थाबणेंक्तुंई, “मदम संगति रूठे मीह ला मदम लेह केट्री।”

³⁴ खबरदार शुचे इलांई, पाप लहज़ी छोड़ेके च़रतुंई, गेह केतिंङ शार्मिंदा लहज़िमी थल्जी कुट्रातग, छना कुचे केहतु बिचंङ ज़ि रेह तु परमेश्वरा रंङ साते रूठे नाता माह।

हेंदिंङ छना ठ्रोह फुक खोकसोतो

³⁵ दंङ अगर अच़िया, उदाहरणो थल्जी रूहक्पोतो कि परमेश्वर सिए दोतिंङ छना श्रींङमी लोहतो, या दोतु फुक छना ठ्रोह शोतो,

³⁶ अच़िला झांह ठ्रोह सवाल रूहक्च़ा दुह मुर्ख शुह। केहच़ी ञेंहच़ातंई कि इच्च़ा बेईज़ा रीहरिंङ एच़ातंई, अपेहल तचेक दुह बेईज़ा सुह्षी माह यवात धोंण तचेक अंकुर माह हुंज़ा।

³⁷ छिल्ला केहच़ी एच़ातंई, चाहे छ्वाह शुह या ऊई छा, दिऊ दुह रूप माह शुह अंऊ पौधा ओ शोतो।

³⁸ परमेश्वरे पौधा बि दुह रूप रंड्रा अंऊ दोई दोऊ थल्जी जुंज़ा। भत्ते पाहठीऊ बेईज़ा एनोह एनाह रूपारिंङ मोह्ड़े शुहबी।

³⁹ अगर हेनर धरतीऊ टोईच़ी बंङज़ा भत्ते जानवरा तु पाहठी सोचेक्पोंई दंङ दोरे भत्तेर ला इच्च़ा ठ्रोह माह तंङफातोर। मीहू इच्च़ा रूप शुहबी। प्यारेतु अई रूप शुहबी। मह्छ़ तु इच्च़ा रूप शुहबी। भत्ते पाहठी जानवर, तु इच्च़ा शतह रूप शवाह।

⁴⁰ दंङ छना ठ्रोह धरतीऊ टोईच़ी शतह पाहठी ओ फुक तोतोर, ध्वांए सर्गारिंङ ला तोतोर छना ऐके, लंच़ङ, करज़ेर तोतोर, सर्गो चीज़ा तिंङ इच्च़ा पाहठी सुंदरता शुहबी, दंङ धरतीऊ चीज़ा रिंङ इच्च़ा शतह ठ्रोह सुंदरता शुहबी।

⁴¹ ऐकेऊ सुंदरता शतह तोह दंङ लच़ंङो सुंदरता शतह तोह, दंङ करज़े तु ला तेज ऊई तोह, छना कुचे इच्च़ा कर बे अई कर तु सुंदरता रिंङ फर्क तोह।

⁴² दंङ ध्यांए ठ्रोह सिए मीहतु यह्च़ा श्रींङमिमी मुक्का शोतो। अंऊ फुका बि दोच़ी पथेक्च़तोर दुह सुह्षे यवात, पर अपेहल दि यह्च़ा श्रींङे योतो दंङ दि झांह ठ्रोह फुक शोतो अंऊ सुह्पिमी माह।

⁴³ अपेहल हेंदु फुक पथेक्च़तोर दुह मुक्का हेंदु फुक बेढंघा ए कमज़ोर शवाह। पर अपेहल दोरे यह्च़ा श्रींङे यवातोर, दंङ दोरे सलटे ए पक्‍का शवाहतोर।

⁴⁴ अपेहल फुका बि पथेके चरच़ी, ता दि इच्च़ा कुदरतो फुक शुह; पर अपेहल दुह यह्च़ा श्रींङी यवात, दोहपल दुह आत्मिक फुक शुचि योतो। अगर कुदरतो फुक तोह ता आत्मिक फुक ला तोह।

⁴⁵ पवित्रशास्त्रा रिंङ दि ला च़ेहसी तोह कि, “दि धरतीऊ मुण्डो मीह, मतलब आदम, श्रींङे प्राणी बणेंके इलि,” दंङ थल मुखो आदम, अंऊ कि मसीह शुह, दि दुह ए शुह अच़ि अनंत जीवन रंड्रा।

⁴⁶ दुह जीवन अंऊ स्वर्गा रिंङ हमेशा ओ थल्जी तोह, तुहई माह अपा; बल्कि अंऊ जीवन मुण्डारिंङ अपा, दुह दि धरतीऊ जीवन शुह। दंङ दोऊ थल, स्वर्गो जीवन तोह।

⁴⁷ मुण्डो मीह अंऊ आदम तोहई धरतीऊ दोरच़ी मतलब श्रोह रें बणाषी तोहई मसीह अंऊ कि दूसरा मीह शुह, स्वर्गंङ ज़ि अंज़े शुह।

⁴⁸ आदमो खानदान ला दु ए ठ्रोह श्रोह ए बणेंके तोतोर, छना दुह तोहई। पर दोरे मीहरे अंऊ स्वर्गो मीहू मतलब यीशु मसीहू टोईच़ी विशवास लहज़ातोर, दोरे ला दोऊ ठ्रोह तोतोर।

⁴⁹ दंङ छना ठ्रोह परमेश्वरे हेंदिंङ ध्वांए ठ्रोह फुक रांहषी ततो छना धरतीऊ मुण्डो मीहू तोहई, ध्वांए ठ्रोह हेनर विशवासी तु कछंङ मसीहू ठ्रोह फुक शोतो, अंऊ हेंतेग स्वर्गारिंङ तोह।

⁵⁰ हे गिऊ प्यारे साथी विशवासी रे, गेह दि कुट्रतग, दि संसारारिंङ हेंदु फुक षाह ए शुहई ऊ बणेंके तोह; हेनर स्वर्गा रिंङ परमेश्वरो रजा रिंङ हेंदु दि फुका रंङ साते इबी मरपोंई। हेनर स्वर्गारिंङ हेंदु झांह ठ्रोह फुकारंङ साते बंङज़ी मरपोंई अंऊ सिए यवात, छना कुचे दोर्तिंङ अपेहला सिए माह।

^51-52 दि भेदो गप्पा रेड्रुंई, हेंदु बिचंङ रैह विशवास लहज़ा मीहरे सिओरे माह। दि भत्ते गप्पा टिरो झुह्प लहज़ा तचेक शुहचे योतो। अपेहल अंतिम तुरही बजेसोतो अंऊ मीहरे सिए इलोर, दोरे हमेशा ओ जीवनो थल्जी यह्च़ा श्रींङमी लोहर दंङ हेनर अंऊ श्रींङी तोतोंई, हेंदु फुक लेहक्सा योतो।

⁵³ छना कुचे हेंदु दि फुक अंऊ योह्च़े रंङ साते सिए यवात दंङ सुह्षी यवात, दोबि इच्च़ा झांह ठ्रोह फुकारिंङ बदलेपी ज़रूरी तोह अंऊ अपेहला माह सिओतो दंङ माह ए अपेहला सुह्पोतो।

⁵⁴ अपेहल हेंदु दि फुक अंऊ योहच़े रंङ साते सिए यवात या सुह्षी यवात, दोबि इच्च़ा झांह ठ्रोह फुका रिंङ लेहक्सा इबि जूंस अंऊ माह अपेहला सिए दंङ माह ए अपेहला सुह्पी। दंङ दुह लेख पूरा शुहचे योतो अंऊ परमेश्वरे पवित्रशास्त्रा रिंङ च़ेहसी ततो, अंऊ दोई कुट्रा, “मौताबि पूरी तरह यहरच़े च़रपोतो दंङ दोऊ भत्ते धिर योह्सा योतो,”

⁵⁵ “हे मौता, कनु जीत अंऊर तोत? हे मौता, कनु डंक अंऊर तोत? झांह ठ्रोह, पवित्रशास्त्रा रिंङ छि च़ेहसी तोह दुह पूरा शोतो।”

⁵⁶ मौतो डंक ता पाप तोह, दंङ पाप बि व्यवस्था ओ दोरच़ी हिम्मत खोकसा।

⁵⁷ पर परमेश्वरे धन्यवाद, हेंदु प्रभु यीशु मसीह ज़ि हेंदु थल्जी छिला लहसी ततो दोऊ दोरच़ी परमेश्वरे हेंदिंङ पाप ए मौतो टोईच़ी जीत रांहषी ततो।

⁵⁸ झांह लेह हे गिऊ प्यारे साथी विशवासी रे, केनातु विशवासा रिंङ पक्‍का बंङज़ुंई दंङ गलत शिक्षा ओ वहज़ा ज़ि भटक्तेतुंई था, प्रभु थल्जी छि कम केहच़ी लहज़ातंई दोरिंङ हमेशा तुंखा शुई। छना कुचे दि ञेंहच़ा, कि छिल्ला धिर केहच़ी प्रभु थल्जी लोहनि दोऊ ईनाम केतिंङ पक्‍का खोकसोतो।