1 कुरिन्थियों 14 - लाहौली बाइबिल

भविष्यवाणी ए ऊई-ऊई भाषा

¹ इदि-अई दिरंङ साते दाह लहज़िमी कोशिश लंहि, आत्मिक वरदानो धुनारिङ बंङज़ा तोंई खास लहज़ी दि कि भविष्यवाणी लंहि।

² छना कुचे अंऊ दोई शत्‌ह भाषारिंङ गप्पा लहज़ा दोई मीहतंङ साते मशत, पर परमेश्वररंङ साते प्रार्थना लहज़ा; दिऊ थल्जी कि दोऊ गप्पा अच़िला समझेक्सी माहरच़ि; छना कुचे दोई पवित्र आत्माओ सामर्थो दोरच़ी गुप्त गप्पा कुट्रा।

³ पर अंऊ भविष्यवाणी लहज़ा, दोई विशवासी तिंङ विशवासरिंङ पक्‍का लहज़ी ए, उत्साहित लहज़ी ए तसल्ली रंड्रीमी थल्जी मदत लहज़ा।

⁴ अंऊ दोई शत्‌ह भाषारिंङ गप्पा लहज़ा, दोई सिर्फ एनोह ए विशवास पक्‍का लहज़ा; पर अंऊ दोई भविष्यवाणी लहज़ा, दोई कलीसिया ओ भत्ते विशवासी तु विशवास पक्‍का लहज़ा।

⁵ गेह जुंज़ातग कि केरे भत्ते शत्‌ह भाषारिंङ गप्पा लंहि पर महसे दि जुंज़ातग कि भविष्यवाणी लंहि; छना कुचे शत्‌ह भाषा कुट्रा मीह दि गप्पो व्याख्या लेह मरच़ा कि दू कलीसिया रिंङ विशवासी तु विशवास पक्‍का लहज़िमी थल्जी छि क्वात, दंङ अंऊ मीह भविष्यवाणी लहज़ा दोई महस जूंशी कम लहज़ा।

⁶ झांह लेह हे गिऊ प्यारे साथी विशवासी रे, अगर गेह केहतु कछंङ अंज़े शत्‌ह भाषारिंङ गप्पा लोहग, पर अगर गेह केहतु थल्जी दू शिक्षा रमोग अंऊ परमेश्वरे गिह्बी रांहषी ततो, दि सच्चाई ओ ज्ञान, भविष्यवाणी ए शिक्षा रमोग, दंङ गिऊ कुट्रीमी रंङ साते केतिंङ फायदा शोतो।

⁷ झांह लेह अगर केरे बेंज़ ए बेंज़ो ठ्रोह छा कुलड्रातंई, अगर केरे धुन रूठे रंङ माह कुलड्रातंई दंङ ऊई ज़ि केरे छना सेहपोर कि दि बेंज़ या बेंज़ो धुन शुह।

⁸ लड़ाई रिंङ, अगर सुरमेऊ सग संङा माह रेड्रा, दंङ सेनिक लड़ाईऊ थल्जी तेयार माह शवाहतोर।

⁹ ध्वांए ठ्रोह, अपेहल केरे झांह ठ्रोह शब्द कुट्रातंई अंऊ मीहच़ी समझेकी मरपोर, दंङ दू लन्न रिंङ कुट्रीमी बराबर शुहचे यवाह दंङ अंऊ केहच़ी कुट्रातंई दोऊ छल्ले कीमत माह शोतो।

¹⁰ दि संसाररिंङ महस शत्‌ह-शत्‌ह पाहठी भाषा तोह, दंङ भत्ते भाषाओ मतलब तोह।

¹¹ पर अगर हेनर दू भाषा बि समझेकी मरपोईं अंऊ ऊई ज़ि कुट्रातोर, दंङ दि झांह शोतो मतलब कि हेंदु थल्जी परदेशी तोतोर, दंङ हेनर दोतु थल्जी परदेशी शोंई।

¹² झांह लेह केरे ला अपेहल आत्मिक वरदान खोकसिमी हिटी तहज़ातंई, अंऊ पवित्र आत्मा केतिंङ रंड्रा, दंङ दू वरदानो इस्तेमाल लहज़िमी थल्जी झांह ठ्रोह कोशिश लोहवा लंहि कि दू वरदानो दोरच़ी कलीसिया भत्ते तरीका रंङ विशवासारिंङ पक्‍का शुहचे योतो।

¹³ झांह लेह अंऊ दोई शत्‌ह भाषा कुट्रा, दंङ दोई प्रार्थना लोहतो, कि दोई छि कुहतो दोऊ मतलब दोई एनेह ए समझेकी तरपोतो।

¹⁴ अगर गेह शत्‌ह भाषारिंङ प्रार्थना लहज़ातग, दंङ गिऊ आत्मा प्रार्थना लहज़ा, पर गिऊ सेहम ए सोचो थल्जी, छल्ले फायदा माह, छना कुचे गेह दिबी समझेकी मरपोग।

¹⁵ झांह लेह, गेह पवित्र आत्माओ अगुवाई ओ रंङ साते प्रार्थना लहज़ातग पर गेह दि लाह जुंज़ातग कि गेह छिल्ला लहज़ी लेहकी तोतोग, दोबि ऊई मीहरे समझेक्सी जूंस। दंङ अपेहल गेह गीत कुट्रातग, दंङ गेह कुट्रा जुंज़ातग कि गिऊ गीत पवित्र आत्मा रंङ प्रेरित शुहबी जूंस, पर दि ला ज़रूरी तोह कि गेह छि गीत कुट्री लेहकी तोतोग दू ऊईतिंङ समझेक्सी जूंस।

¹⁶ ञेंई च़रतेंई कि अरिया सीधा रे मीह केहतु अराधनारिंङ तोह, अपेहल केरे केनातु आत्मारिंङ परमेश्वरो स्तुति लहज़ातंई अगर दोई केहतु गप्पा शुहङी मरच़ा, दंङ केहतु परमेश्वरा बि धन्यवाद रंड्रीमी थल, दोबि छना पता लेह्पोतो कि अमीन अपेहल कुट्री अंऊ पाहठी केहच़ी कुट्रातंई?

¹⁷ परमेश्वरो थल्जी केहतु धन्यवाद लहज़ी महस रूठे शोतो, पर दिरिंङ ऊईतिंङ दोतु विशवासो तरक्की माहशुहबी।

¹⁸ गेह घेंङौ परमेश्वरो धन्यवाद लहज़ातग, कि गेह केरे भत्ते बे महसे शत्‌ह भाषा कुट्रातग।

¹⁹ पर दिऊ थल्जी, अगर गेह विशवासी तु इच्च़ा सभारिंङ तोतोग, दंङ गेह दिऊ इस्तेमाल माह लहज़ातग छना कुचे दि गिऊ थल्जी रूठे शोतो कि दोर्तिंङ ङा ए शब्द कोहग अंऊ समझेक्पि अपोर, दंङ ऊईतिंङ कंज़े तरपोग, दिऊ बजाए कि गिऊ बोल महसे शोर, पर समझेक्सी मरपोर।

²⁰ हे गिऊ साथी विशवासी रे, केरे इच्च़ा कटु ठ्रोह सोचेक्च़ी बंद लंहि, अपेहल मांजी ओ गप्पा अपा दंङ दू मुक्का कटुतु ठ्रोह निर्दोष बंङज़ुंई, पर झांह ठ्रोह मामला समझेक्सिमी थल्जी सियाणा शुईं।

²¹ पवित्र शास्त्रारिंङ प्रभु ज़ि कुट्रा, “गेह नोखे या शत्‌ह भाषा कुट्रा परदेशी ए पखला मीहतु ज़रिए घेंङौ मीहतंङ साते गप्पा लोहग, दंङ दोरे गिऊ माह रेड्रोर।”

²² झांह लेह शत्‌ह भाषारिंङ गप्पा लहज़ी विशवासी तु थल्जी मशत पर अविशवासी तु थल्जी निशान शुह, पर भविष्यवाणी लहज़ी अविशवासी तु थल्जी मशत पर मसीहू विशवासी तु थल्जी निशान शुह।

²³ अगर भत्ते कलीसिया ठ्रोका शुहचे यवात दंङ हर इच्च़ा मीह शत्‌ह भाषारिंङ गप्पा लोहतो दंङ दू ए मुक्का दोर्तिंङ झांह ठ्रोह मीह अतिर, अंऊ दि भाषा माह समझेक्च़तोर या अविशवासी तोतोर, दंङ दोच़ी केरे पक्‍का बमज़ी ञेंएपोर।

²⁴ पर अगर भत्ते मीहरे भविष्यवाणी लहज़ी लेहतिर, दंङ दू ए मुक्का दोर्तिंङ इच्च़ा झांह ठ्रोह मीह अपतो, अंऊ दि माह समझेक्च़ा या अविशवासी तोह, दंङ दि रेड्रा दोबि एनोह पापो एहसास शुहचे योतो, दंङ केई छि कुट्रातन, दंङ दोऊ दोरच़ी दू दोषी शुहचे यवात।

²⁵ अंऊ दोई छि रेड्रा दोऊ ज़रिए दोई दि समझेकी च़रपोतो कि परमेश्वर दोऊ मदम सोचो पाहठी छि सोचेक्च़ा। दंङ दोबि एहसास शोतो कि दू पापी शुह दंङ दोई पश्चाताप लोहतो। दंङ दू पुष्टू भारे बंङज़ा परमेश्वरो अराधना लोहतो। दंङ मनेके च़रपोतो, कि हेले परमेश्वर केहतु बिचंङ तोह।

उपासना ए अनुशासन

²⁶ हे गिऊ प्यारे साथी विशवासी रे, रेड्रुंई, छि लहच़ी जूंस? अपेहल केरे अराधना ओ थल्जी ठ्रोका शवातंई, दंङ केहतु बिचंङ अरिया ता गीत कुट्रा, शवातोंई, दंङ रैहच़ी उपदेश रंड्रातंई, अरिया एनोह टोहकठे प्रगट लहसी हेले कंड्रा, अरिया शत्‌ह भाषारिंङ गप्पा लहज़ा दंङ रैहच़ी दोऊ अनुवाद लहज़ातोर; दि भत्ते गप्पो मकसद दि शुहबी जूंस कि कलीसिया बि विशवासरिंङ पक्‍का शुहबिमी थल्जी मदत लेह तरपोर।

²⁷ अगर अरिया शत्‌ह भाषा रिंङ कुट्रा, दू मुक्का महसे बे महसे झुह्ट या षुमु मीहरे ए इच्च़ा-इच्च़ा शुहचे ते कुंई दंङ दू भाषा ओ मतलब कंड्रिमी थल्जी पक्‍का ए अरिया शुहबी जूंस।

²⁸ पर अगर अनुवाद लहज़ा माह शोतो, दंङ शत्‌ह भाषा कुट्रा दू कलीसिया रिंङ शांत बंङज़ोतो, दंङ परमेश्वररंङ साते एनोह सेहम रिंङ गप्पा लोहवा लोह।

²⁹ भविष्यवक्ता तु बिचंङ झुह्ट या षुमु कुंई, दंङ दि ज़रूरी तोह कि ऊई मीहरे ला रेड्रोर दंङ परखेकेपोर कि दोई छि कुट्रा दू पवित्र शास्त्रो हिसाबे ठीक तोह आ माह।

³⁰ पर अगर सभारिंङ बंङज़ा अरिया ऊई मीहबी परमेश्वरो दोरच़ी छा जबाब खोकसा ता दंङ अच़ि छि कुट्रा दोबि रुमज़ी जूंस दंङ अई मीहबी कुट्री रंड्री जूंस।

³¹ केरे भत्तेर भविष्यवाणी लेह तरपोंई, पर इच्च़ा थल इच्च़ा, ताकि भत्तेरे सीखेपोरे दंङ याहब बणेक्पोतो।

³² दंङ इच्च़ा भविष्यवक्ता अंऊ परमेश्वरो बचन कुट्रा शोतो, दोई एनाबि काबू लहज़ा शोतो; दू एनोह हिटीऊ हिसाबे कुट्रीमी ए माह कुट्रीमी जोगे शोतो।

³³ छना कुचे परमेश्वरो गड़बड़ी मशत, पर शांतिऊ परमेश्वर शुह; दि कानून परमेश्वरो मीहतु भत्ते कलीसिया रि पालन लहज़ी।

³⁴ मेच़िमी रे कलीसियाओ सभारिंङ चुपे बंङज़ुंई, छना कुचे दोतिंङ गप्पा लहज़िमी हुकुम माह, पर अधीन बंङज़िमी हुकुम तोह, छना मूसा ओ कानूनारिंङ च़ेहसी ला तोह।

³⁵ अगर दू ऊई छा सीखेच़ी ततो ता चुंङ एनोह-एनोह गगसा रूहक्तेंई, छना कुचे मेच़िमी ऊ कलीसियारिंङ गप्पा लहज़ी षेहद ओ गप्पा शुह।

³⁶ झांह ठ्रोह छना तोह कि केहतु बिचंङ तुहई कांहषी कानूनो भाषे लहज़ी माह जुन्ज़ातंई? छि कनिंङ झांह च़ेहसा कि परमेश्वर बचन सिर्फ कनिंङ ए रांहषी तोहई?

³⁷ अगर अरिया मीह एनाबि भविष्यवक्ता या झांह ठ्रोह मीह चेहच़ा, अतिंङ पवित्र आत्माज़ि वरदान रांहषी ततो। दंङ दि ञेंई च़रतु कि, अंऊ गप्पा गेह केतिंङ चेहच़ातग, दू प्रभु हुकुम शुह।

³⁸ पर अगर दू गिऊ शब्दो टोहकठे विशवास माह लोहर, दंङ दोतु टोहकठे विशवास थालोहू।

³⁹ झांह लेह हे गिऊ प्यारे साथी विशवासी रे, भविष्यवाणी वरदानो हिटी रिंङ बंङज़ुंई, दंङ ऊई भाषा कुट्रीमी थल्जी इन्कार थालंही।

⁴⁰ अंऊ ला केहच़ी कलीसिया रिंङ लहज़ातंई, दोबि ठीक ढंगारंङ साते इच्च़ा-इच्च़ा लोहवा लंहि।