1 कुरिन्थियों 13 - लाहौली बाइबिल

दाह भत्ते बे रूठे अम

¹ गेह भले मीहतु ए स्वर्गदूतातु बोली कोहग पर अगर गेह मीहतंङ साते दाह माह लहज़ातग, दंङ दू भाषा ला कुट्री धोंण ए बेकार शोतो अंयों कि इच्च़ा रिओ नंदे बि कुलड्री या झांझ बि इच्च़ा मुंद्दे कुलड्री।

² दंङ अगर गेह भविष्यवाणी लेह तरपोग, दंङ भत्ते भेद ए भत्ते पाहठी ज्ञान समझेक्पोग, देर तचेक कि अगर गिह्बी परमेश्वरो टोईच़ी पूरा विशवास तोह कि गेह गोह बि थलका लेह तरपोग, दंङ ऊईतिंङ साते दाह माह तहज़ातग, दंङ गेह छल्ले माह शुगाह।

³ अगर गेह घेंङौ भत्ते टंगा ढबाह गरीबा तिंङ रे च़रपोग दंङ देर तचेक कि घेंङौ फुक रोट्रीमी थल्जी रें च़रपोग, पर दाह माह तहज़ातग दंङ गिऊ थल्जी छल्ले फायदा माह।

⁴ अंऊ मीहरे ऊईतिंङ साते दाह लहज़ातोर, दोरे धीरज़ ए दया रंङ साते कम लहज़ातोर, दोतिंङ जलन माह शवाह, दोरे एनोह बड़ाई ए घमण्ड माह लहज़ातोर।

⁵ दोरे ऊईतिंङ साते मदम बर्ताब माह लहज़ातोर, दोरे स्वार्थी माह शवाहतोर दोरे युरनाह रोहष माह लहज़ातोर दंङ दोरे महस आसानी रंङ साते ऊईतिंङ माफ लहज़ी चरच़ातोर अंऊ दोतु खिलाप गलत लहज़ातोर।

⁶ अपेहल मीहरे मदम कम लहज़ातोर दंङ दोरे खुश माह शवाहतोर, पर अपेहल मीहरे झांह ठ्रोह कम लहज़ातोर अंऊ हेले ए सच्चा तोह दंङ दोरे खुश शवाहतोर।

⁷ दोरे भत्ते धिर सहन लहज़ातोर, दाह हेंदिंङ भत्ते हालातरिंङ विशवास लहज़िमी जोगे बणाएच़ा, दि हेंदिंङ परमेश्वरो टोईच़ी हेंदु उम्मीद बणाएच़िमी जोगे मदत लहज़ातोर, दि मुसीबत ए टेहषी मुक्का धीरज़ तहच़ि सिखाएच़ा।

⁸ दू टेम अपतो अपेहल मीहरे परमेश्वरो खबरो प्रचार माह लोहर, या ऊई पाहठी भाषा माह कोहर, दंङ परमेश्वरो पाहठी डुह्गे ज्ञानो वरदान ए परमेश्वरो रूठे खबरो प्रचार लहज़िमी काबिलियत अधूरे तोह।

⁹ हेंदु ज्ञानो वरदान ए भविष्यवाणी लहज़िमी काबिलियत अधूरे तोह।

¹⁰ पर अपेहल दू भत्ते ज्ञानो ञेंहच़ा अपतो, दंङ अंऊ अधूरे तोह, दू योह्सा योतो।

¹¹ अपेहल गेह इच्च़ा कटु तोईग, दंङ विचार लहज़ातेग, दंङ कटुतु ठ्रोह ए बहस लहज़ातेग पर सेंहणा शुहबी रंङ साते गेह कटुतु ठ्रोह बहस लहज़ी ब्याड़ा लहज़ी केईगा।

¹² दि जीवनारिंङ हेनर भत्ते धिर समझेगी मरच़ातंई। दि अंऊ आ चीज़ा बि भूधड़े ठ्रोह अर्शिरिंङ खंड्री ठ्रोह शुचि यवात। पर अंऊ मुक्का हेनर स्वर्गंङ यवातंई, दंङ हेनर भत्ते धिर रूठे रंङ समझेगी तरपोंई। छना कुचे हेनर परमेश्वरा बि सामटे खमोंई। एंतेग हेंदु ज्ञान अधूरा तोह। सिर्फ अंजा ध्याड़ा ए परमेश्वरा बि रूठे रंङ ञेंई तरपोंई,

¹³ झांह लेह, हेंतेग, दि षुमु पाहठी कम लहज़ी ज़रूरी जूंशी तोह: परमेश्वरो टोईच़ी विशवास परमेश्वरो वाईदा रिंङ उम्मीद तहच़ि, दंङ ऊईतिंङ साते दाह लहज़ी। पर दि भत्ते बे इच्च़ा ए मोह्ड़े तोह, दू तोह ऊईतिंङ साते दाह लहज़ी।