1 कुरिन्थियों 11 - लाहौली बाइबिल

¹ छना ठ्रोह गेह मसीहू ठ्रोह चाल ज़ोआतग, ध्वांए केरे ला गिऊ ठ्रोह चाल जोंई।

अराधनारिंङ पुंज़ा कपची

² गेह घेंङौ तरीफ लहज़ातग, छना कुचे केरे गिह्बी भत्ते टेमारिंङ हिद लहज़ातंई; दंङ अंऊ शिक्षा गेह केतिंङ रांहषी तातग, दोतु खबरदार रंङ साते इस्तेमाल लहज़ातंई।

³ पर गेह जुंज़ातग कि केरे इच्च़ा गप्पा ञेंई च़रतुंई कि हर इच्च़ा गंङमी पुंज़ा मसीह शुह, दंङ इच्च़ा मेच़ो ओ पुंज़ा दोऊ गगसा शुह, दंङ मसीह ऊ पुंज़ा परमेश्वर शुह।

⁴ झांह लेह अगर अरिया गंङमी कलीसिया रिंङ प्रार्थना लहज़ा या परमेश्वरो रूठे खबरो पाहठी कंड्रा एनोह पुंज़ा कपची तहज़ा, दंङ दोई मसीहू अपमान लहज़ा अंऊ दोऊ पुंज़ा शुह।

⁵ पर अगर अरिया मेच़िमी फ्थरे पुंज़ा प्रार्थना या परमेश्वरो रूठे खबरो पाहठी सुनाएच़ा, दिऊ मतलब दि तोह कि दू एनोह गगसो अंऊ पुंज़ा तोह अपमान लहज़ा, दू, दू मेच़िमी ऊ ठ्रोह तोह अपि शर्मिन्दा लहज़िमी थल्जी क्रा ट्रिकी च़रसी शुह।

⁶ अगर मेच़िमी एनोह पुंज़ा रुमाल रंङ साते कपचे माह तहज़ा, दंङ क्रा ला ट्रिके च़रतु अगर मेच़िमी थल्जी क्रा ट्रिक्ट्री या मुण्डन लहज़ी षेह्पिमी गप्पा शुह, दंङ दोई एनोह पुंज़ा कपचे तओ।

⁷ बेई गंङमी बि एनोह पुंज़ा कपचे ठीक माह शुह, छना कुचे गंङमी परमेश्वरो महिमा शुह, अंऊ परमेश्वरो एनोह रूपारिंङ बणाषी तोह पर मेच़िमी गंङमी ऊ महिमा दर्शाएच़ा।

⁸ छना कुचे शुरूआतारिंङ अपेहल परमेश्वरे गंङमी ए मेच़िमी बि बणाएकाते, दू मुक्का मेच़िमी ऊ दोरच़ी गंङमी माह बणाक्ते बल्कि गंङमी ऊ फुको दोरच़ी मेच़िमी बि बणाएकाते।

⁹ दंङ गंङमी बि मेच़िमी ऊ फायदा ओ थल्जी माह बणाएकाते, पर मेच़िमी बि गंङमी ओ मदतो थल्जी बणाषी शुह।

¹⁰ झांह लेह प्रार्थना स्वर्गदूता तु मौज़ूदगी ऊ ध्याना रिंङ तहज़ा मेच़िमी तु थल्जी रूठे तोह कि दोरे एनोह अधीनता ओ चिन्ह एनोह पुंज़ा कपचे लोहर।

¹¹ दंङ प्रभु विशवासी तु बिचंङ मेच़िमी मेह गंङमी छल्ले माह दंङ गंङमी मेह मेच़िमी छल्ले माह।

¹² हालांकि परमेश्वरे मुण्डो मेच़िमी गंङमी दोरच़ी बणाषी शुह, पर हेंतेग मेच़िमी गंङमी बि जन्म रंड्रा, दंङ दोकु झुल्ला परमेश्वरो दोरच़ी शुरे अच़ि भत्ते धिर बणाषी शुह।

¹³ गेह जुंज़ातग कि केरे केनाच़ि फेंसला लंहि, छि कलीसिया रिंङ फ्थरे पुंज़ंङ मेच़िमी ऊ परमेश्वरो तुईज़ी प्रार्थना लहज़ी रूठे च़ेहसा आ।

¹⁴ छि कुदरती रंङ साते केहच़ी माह ञेंहच़ातंई आ, कि अगर गंङमी लम्हें क्रा तहच़ि, दंङ दोऊ थल्जी अपमान शोतो।

¹⁵ पर अगर मेच़िमी लम्हें क्रा तोहतो; दंङ दि दोऊ थल्जी शोभा शोतो, छना कुचे मेच़िमी तिंङ कुदरती लम्हें क्रा रांहषी तोह, ध्वांए ठ्रोह दोतिंङ भत्ते तु बिचंङ अराधना रिंङ एनोह पुंज़ा कपचे तहच़ि जूंस।

¹⁶ पर अगर अच़िया दि सोचेक्च़ा कि छि गेह कुट्रातग दू गलत तोह। दंङ दि ञेंई च़रतुंई कि हेंदु ए परमेश्वरो कलीसिया रिंङ हेंदिंङ दि छोड़ेके ऊई छल्ले रिवाज़ माह।

प्रभु धामो पाहठी

¹⁷ दू मामला तु पाहठी अंऊ गेह हेंतेग कुट्री तातग, गेह केहतु तरीफ लेह मरच़ातग, छना कुचे केहतु ठ्रोहका शुहबीरंङ साते भलाई माह, पर नुकसान ए शवात।

¹⁸ छना कुचे भत्ते बे मुण्डो गप्पा दि तोह, गेह दि रेड्री तातग, कि अपेहल केरे कलीसिया रिंङ अराधना लहज़िमी थल्जी ठ्रोहका शवातंई, दंङ केहतु बिचंङ ठुक्शी शवाह, दंङ गिह्बी विशवास तोह कि दोतु गप्पा रिंङ छा सच्चाई तोह।

¹⁹ वोई, दि हेले तोह कि केहतु बिचंङ बंटवारा शुहबी ज़रूरी तोह। कि दोरे, अंऊ परमेश्वरो दोरच़ी अंङषी तोतोर, छंङीरिंङ अच़ा अपोर।

²⁰ अपेहल केरे इच्च़ा हेंदु प्रभु यीशु मसीहू मौत हिद लहज़िमी थल्जी ठ्रोहका शवातंई, केरे दि गप्पो थल्जी चिंद माह आ कि केतिंङ प्रभु भोज छना ज़ेइमी तोह।

²¹ छना कुचे गिह्बी कांहषी तोह कि केहतु बिचंङ रें ऊईतिंङ साते फाए मेह एनोह बगत ज़ेइमी थल्जी जल्दबाज़ी लहज़ातोर। दिऊ थल्जी, रें योंए अच़ा यवातोर दंङ रें क्वषे ते मतवाला शुहचे यवातोर।

²² केरे केनातु चुंङ ज़ै ए तुंङमी तरपोंई! केतिंङ च़ेहसा कि परमेश्वरो कलीसिया खास माह, दंङ केरे दू मीहतिंङ शर्मिन्दा लहज़ातंई अंऊ गरीब तोतोर। गिह्बी केतिंङ छि कंड्री जूंशी तोह? छि गिह्बी केहतु तरीफ लेह जूंशी तोह आ? गेह झांह लहज़िमी थल्जी केहतु तरीफ माह लहज़ातग।

²³ अंऊ शिक्षा गेह प्रभु दोरच़ी खोक्च़ातग, दि दू ए शिक्षा शुह अंऊ गेह केतिंङ रांदेग, कि प्रभु यीशु मसीह, अंऊ रातरि दू च़ुमसी लहज़िमी तोहई, दोई रोटी लेहपति,

²⁴ दंङ परमेश्वरो धन्यवाद लहच़ी रोटी खंणी लहरी दंङ कुई, “दि गिऊ फुक शुह, अंऊ केहतु उद्धारो बलिदानो थल्जी लहज़ी, गिऊ मौत हिद लहज़िमी थल्जी दिबी लगातार लोहवा लंहि।”

²⁵ ध्यांए ठ्रोह यीशु ज़ि ज़ेइमी थल दाखो रसो कोली ला दि कुचे ते रांई, “दि दाखो रसो कोली ओ गिऊ शुहई ऊ दू खरकोई वाईदा शुह, अपेहल ला तुंङमोंई, दंङ गिऊ हिदो थल्जी दि लगातार लोहवा लंहि।”

²⁶ भत्ते टेमारिंङ अपेहल केरे रोटी ज़ोवातंई दंङ दि कोली ओ ऊ दोरच़ी दाखो रस तुंङमातंई, दंङ प्रभु मौत अपेहल तचेक दू दोबारा वापिस माह अपा, प्रचार लोहवा लंहि।

²⁷ झांह लेह अंऊ ला दि तरीका रंङ साते अंऊ मसीहू निरादर लहज़ा प्रभु रोटी ज़ोवा, या दोऊ कोली ओ दोरच़ी दाखो रस तुंङमातंई, दू प्रभु फुक ए शुहई खिलाप पाप लहज़ा।

²⁸ झांह लेह मीह एनोह जांच लेह च़रतु छि दोऊ एनोह विचार सही तोह दंङ दि रोटी ऊ दोरच़ी ज़ैंई, दंङ दि कोली ओ दोरच़ी रस तुंङरेंई।

²⁹ छना कुचे अरिया प्रभु फुक सेहच़ी मेह कोलीऊ दोरच़ी तुंङमा ए ज़ोवा, दंङ दिबी ज़ेइमी ए तुंङमिमी रंङ साते केनातु टोईच़ी सज़ा हपातंई।

³⁰ दि वहज़ा तोह कि केहतु बिचंङ महसे मीहरे टेहची तोतोर; केहतु बिचंङ महस मीहरे कमज़ोर ला तोतोर दंङ रें मीहरे सिए इलजी तोतोर, छना कुचे दि परमेश्वरो सज़ा शुह।

³¹ झांह लेह तुहई हेनर हेंदु व्यवहारो जांच लेह तरपोंई, दंङ परमेश्वर हेंदिंङ सज़ा माह रमतो।

³² अगर प्रभु हेंदिंङ झांह ठ्रोह सज़ा रंड्रा, ता दोई हेनर सुधारेच़ा, ताकि न्यायो ध्याड़ा रिंङ हेनर संसारो ऊई मीहतंङ साते सज़ा ओ भागीदार माह शोंई।

³³ झांह लेह, हे गिऊ प्यारे साथी विशवासी रे, अपेहल केरे प्रभु धामो थल्जी ठ्रोहका शवातंई, दंङ इदि-अईदि बि रूमज़ा लंहि ताकि भत्ते ठ्रोका शुहचे ते ज़ै तरपोंई।

³⁴ अगर अरिया योंई तोह ता, केनोह चुंङ ज़ै च़रतु, ताकि अपेहल केरे ठ्रोहका शवातंई, दंङ केरे सही ढंगारंङ साते बर्ताब लेह तरपोंई दंङ परमेश्वरे केहतु न्याय माह लोहतो। ऊई बचेकी गप्पा गेह अंज़े ठीक लेह च़रपोग।