1 कुरिन्थियों 10 - लाहौली बाइबिल

इस्राएलो इतिहासो दोरच़ी चेतावनी

¹ हे गिऊ प्यारे साथी विशवासी रे, गेह केतिंङ हिद दिलाएच़िमी तातग, कि बणारिंङ (सुनसान ठहरि) हेंदु बाह-मेमेतंङ साते महस तुहई छि शुह्ते परमेश्वरे दू भत्ते तु इच्च़ा डुह चरच़े अगुवाई लहरी अंऊ दोतु तुईज़ी-तुईज़ी जोवते, दंङ दू भत्तेतिंङ कारच़े धरतीऊ ठ्रोह षेह्ई समुंद्रो बिचंङ च़ि सही सलामत पार लहज़ी च़रति।

² हेंज़ी कुचे तरपोंई: छना ञेंरे प्रभु यीशु मसीहू चेला बणेक्पिमी थल्जी बपतिस्मा लेहपच़ातंई, ध्वांए दू भत्ते डुह सिल्मोग रिंङ तोईरे दंङ मूसा ओ कानूनो चेलारे बणेक्पिमी थल्जी षेह्ई समुंद्रो दोरच़ी शुहचे इलिर।

³ दोच़ी दू ए रोटी ज़रिर अंऊ परमेश्वरे दोतु थल्जी स्वर्गो दोरच़ी रंदे।

⁴ दू भत्ते ज़ि दू ए ती तुंङरिर, अंऊ परमेश्वरे दोतिंङ रंदे। दोच़ी इच्च़ा चट्टानो दोरच़ी हुंच़ा ती तुंङरिर, दंङ दू चट्टानो तुलना मसीह रंङ साते लहज़ातोर अच़ि दोतंङ साते बंङज़ा दोतिंङ जीवन रांई।

⁵ पर परमेश्वरे दोतु बिचंङ ज़ि महसे तंङ साते खुश माह तोहई, झांह लेह दोरे दू बणारिंङ सिए इलिर।

⁶ महस तुहई हेंदु बाह-मेमेतंङ साते शुहचे दि गप्पा हेंदु थल्जी चेतावनी शुह, कि अगर हेनर दोतु ठ्रोह बुराई लहज़िमी हिटी लोहनि ता छि शोतो।

⁷ दंङ माह केरे मुर्ति पुंज़ा लहज़ा बणेक्तेंई, छना कि दोतु बिचंङ रें मीहरे तोईरे छना पवित्र शास्त्र रे कुट्रा, “मीहरे ज़े तुंङमिमी थल्जी धामारिंङ बंङज़ा इलोर दंङ यह्च़ा गरफी ए ऐश-मस्ती लहज़ी खड़े शुहचे इलिर।”

⁸ दंङ हेंदु अतंङ साते ला नज़ायज़ रिशता शुहबी माह जूंस अतंङ साते हेंदु ब्याह शुहचे माह शोतो छना दोतु बिचंङ अंयों ज़ि लहरिर; दंङ इच्च़ा ध्याड़ारिंङ निंज़ो षुमु हज़ार सिए इलिर।

⁹ दंङ माह हेंज़ी मसीह बि परखेक्पोंई, छना दोतु बिचंङ अंयों ज़ि लहरिर, दंङ ओमड्रातु दोरच़ी सिए इलिर।

¹⁰ दंङ माह ए केहच़ी कुड़-कुड़ लंहि, दंङ अंऊ रीति रंङ दोतु बिचंङ अंयों ज़ि कुड़-कुड़ लहरिर दंङ इच्च़ा स्वर्गदूतो दोरच़ी दोरे सिए इलिर, अतिंङ परमेश्वरे चरच़ाते।

¹¹ पर दि भत्ते गप्पारे, अंऊ दोतु टोईच़ी शुई, इच्च़ा चेतावनीऊ ठ्रोह तोहई; दंङ दू हेंदिंङ चेतावनी रंड्रीमी थल्जी च़ेहसी तोह, अंऊ दि संसारो अन्तो मुक्कारिंङ बंङज़ा तोतोर।

¹² दिऊ थल्जी अगर झांह ठ्रोह मीह तोह ता अंऊ दि कुट्रा कि परमेश्वरो टोईच़ी दोऊ विशवास पक्‍का तोह, दंङ दोबि खबरदार बंङज़ी जूंशी तोह कि झांह शुहबी मेस कि दू अचानक विशवासो दोरच़ी भटकेगी योतो दंङ पाप लोहतो।

¹³ पाप लहज़िमी हिटी हेंदु भत्ते तु कछंङ ज़रुर अपा, पर परमेश्वर सच्चा तोह। दू केतिंङ झांह ठ्रोह परीक्षा रिंङ पढेक्पि माह रंड्रा, अंऊ केहतु सहन बे धकते तोह पर दू परीक्षारंङ साते बचेक्पिमी तरीका ला लोहतो कि केरे विशवासारिंङ पक्‍का शुहचे बंङज़ेंई।

मुर्ति पूजाऊ थल्जी चेतावनी

¹⁴ दिऊ थल्जी, हे गिऊ प्यारे साथी विशवासी रे, मुर्तिऊ पूजा रंङ साते बचेकी तोंई।

¹⁵ गेह केतिंङ मसीह रिंङ समझदार चेहके कुट्रातग, अंऊ गेह कुट्रातग, दोऊ पाहठी ध्याना रंङ साते सोचेक्तुंई, अंऊ गेह कुट्री तातग दू हेले तोह या माह।

¹⁶ अपेहल हेनर प्रभु भोज रिंङ इस्तेमाल शुचाह कोली ऊ दोरच़ी दाखो रस तुंङमातंई, अतु थल्जी हेंज़ी परमेश्वरा बि धन्यवाद लहज़ातंई, दंङ हेनर हेले रिंङ मसीहू शुहई रिंङ शामिल शुहचे य्वातंई। दंङ अपेहल हेनर रोटी खंणी लहज़ातंई दंङ दिबी ज़ोवातंई, दंङ हेनर हेले रिंङ मसीहू फुकारिंङ शामिल शवातंई।

¹⁷ छना कुचे इच्च़ा रोटी दि गप्पो चिन्ह तोह कि हेनर महसे तोतोंई मसीह रिंङ, इच्च़ा ए फुक शुई, छना कुचे हेनर भत्तेर इच्च़ा ए रोटी ओ दोरच़ी ज़ोवातंई।

¹⁸ इस्राएलो मीहतु पाहठी सोचेक्तुंई, अपेहल भत्ते मीहरे परमेश्वरा बि चढ़ाएसी बलि ओ बगत ज़ोवातोर दंङ परमेश्वरो पूजा रिंङ हिस्सा लेहपच़ा तोर। ध्यांए ठ्रोह अंऊ मीहरे मुर्ति बि चढ़ासी बगत ज़ोवातोर दोरे ला दू मुर्तिऊ पूजा रिंङ हिस्सा लेहपच़ा तोर।

¹⁹ गेह दि माह कुट्रातग कि मुर्ति बि चढ़ाएसी बलि ऊ छा कीमत तोह या दि कि मुर्तिऊ छा कीमत तोह।

²⁰ पर गेह दि कुट्रातग कि अंऊ चीज़ा बि मीहरे बलिदान लहज़ातोरे; दोरे परमेश्वरो थल्जी मशत, पर शेतान बि बलि चढ़ाएच़ा तोर, दंङ गेह माह जुंज़ातग, कि केरे मांजी आत्मा रंङ साते शामिल शुहचे इलांई।

²¹ दि शुहबी मरपोतो कि केरे प्रभु कोलीऊ दोरच़ी ए मांजी आत्माओ कोली ओ ऊ दोरच़ी तुंङमातंई; झांह लेह दि ला शुहबी माह मरपोतो कि केरे प्रभु मेज़ारिंङ ए मांजी आत्माऊ मेज़ारिंङ शामिल शोंई अंऊ हेंदिंङ प्रभु सिमी ध्याड़ा हिद दिलाएच़ा।

²² अगर हेंज़ी झांह लहज़ातंई दंङ हेनर प्रभु बि रोहष चेहच़ातंई। दंङ हेनर प्रभु बे महस शक्तिशाली माह तोंई।

भत्तेधिर परमेश्वरो महिमाओ थल्जी

²³ हेनर छिल्ला लहज़िमी थल्जी तेयार आज़ाद तोतोंई। वोई, पर हेंदु थल्जी भत्ते धिर रूठे माह। हेनर छिल्ला धिर लहज़िमी थल्जी आज़ाद तोतोंई, पर भत्ते धिर परमेश्वरा रिंङ हेंदु विशवास बि पक्‍का माह लहज़ा।

²⁴ अरिला एनोह ए भलाई थल्जी मशत, पर ऊईतु भलाई ओ ला ध्यान रांई।

²⁵ अपेहल केरे बाज़ारो दोरच़ी षाह हपातंई ता दंङ दोबि ज़ै च़रतुंई। पर दि था रूहक्तुंई कि दि मुर्ति बि चढ़ाएसी शुह या माह शुह, दंङ झांह लहज़िमी रंङ साते केहतु अंतरआत्मा परेशान माह शोतो।

²⁶ केरे ज़ै तरपोंई छना कुचे पवित्र शास्त्र कुट्रा, “धरती ए दंङ छिल्ला धिर दोर तोह दू भत्ते धिर प्रभु शुह।”

²⁷ दंङ अगर अविश्वासी तु बिचंङ अरिया केतिंङ धाम रंड्रातोर, दंङ केरे इबि जुंज़ातंई, दंङ छिल्ला केहतु तुईज़ी केऊर दू ज़ै च़रतुंई: केतिंङ दि रुहक्च़ी माह जूंस कि दिऊ बलि रांहषी शुह या माह शुह, ताकि अगर दिऊ बलि रांहषी शुह दंङ केरे केनाबि दोषी महसूस माह लोहनि।

^28-29 पर अगर अच़िया केतंङ साते कुट्रा कि “मुर्ति बि दू चढ़ाएसी बलि तोहई,” दंङ दोबि थाजेंई, केनातु अंतरआत्मा ओ वहज़ा ज़ि माह शुह, पर दोऊ अंतरआत्मा ओ वहज़ा ज़ि अच़ि केतिंङ दि कंङाते। छना कुचे गिऊ आज़ादी बि ऊई अरिया मीहू अंतरआत्मा दोरच़ी न्याय लहज़ी माह जूंस।

³⁰ अगर गेह बगत धन्यवाद लहज़ा ते ज़ोवातग, दंङ अंऊ बगतो टोईच़ी गेह धन्यवाद लहज़ातग, दोऊ वहज़ा ज़ि गिऊ टोईच़ी दोष छिल्ले अपा?

³¹ गिऊ कुट्रीमी दि मतलब तोह, केरे चाहे ज़ोवातंई या तुंङमातंई, चाहे छिल्ला धिर लहज़ातंई, भत्ते धिर परमेश्वरो महिमा ओ थल्जी लोहवा लंहि।

^32-33 गेह भत्ते तिंङ खुश लहज़िमी कोशिश लहज़ातग, गेह घेंङौ भलाई ओ पाहठी माह सोचेक्च़ातग, बल्कि भत्ते तु भलाई ओ पाहठी सोचेक्च़ातग, ताकि दोरे उद्धार खोक्शे तरपोर। ध्वांए केरे ला झांह ठ्रोह बंङज़ेंई कि यहुदी या ऊईजाति तु परमेश्वरो कलीसिया ओ थल्जी छा परेशानी या ठोकर पैदा शुहबी मेस।