1 कुरिन्थियों 1 - लाहौली बाइबिल

नमस्ते

¹ गेह, पोलुस दि डाक च़ेहसी लेहकी तोतोग। गेह परमेश्वरो हिटी रंङ साते यीशु मसीहू प्रेरित शुहबी थल्जी अंङषी शुगाह। गेह देर हेंदु साथी विशवासी सोस्थिनेस रंङ साते तोतोग।

² गेह दि डाक कुरिन्थुस शहरो विशवासी तु थल्जी च़ेहसी लेहकी तोतोग। अतिंङ परमेश्वरे एनोह पवित्र मीहरे शुहबिमी थल्जी अंङे चरच़ाते, ध्वांए ए छना दोई दू भत्ते मीहतिंङ अंङे चरच़ाते अंऊ भत्ते ठहरिंङ हेंदु प्रभु यीशु मसीहू अराधना लहज़ातोर, छना कुचे दू हेंदु भत्ते तु प्रभु शुह।

³ गेह प्रार्थना लहज़ातग कि हेंदु बाह परमेश्वर, ए प्रभु यीशु मसीह केतिंङ मोह्ड़े दाह ए शांति रम्मा लोहतो।

मसीह रिंङ आशीष

⁴ गेह केहतु पाहठी घेंङौ परमेश्वरो धन्यवाद हमेशा लहज़ातग, छना कुचे दोई केतिंङ यीशु मसीह रंङ साते केहतु एकता ओ वहज़ा ज़ि महस आशीष रांहषी ततो।

⁵ मतलब दि कि केहतु मसीह रंङ साते इच्च़ा शुहबिमी वहज़ा ज़ि परमेश्वरे केतिंङ दू भत्ते महसे रंङ साते रांहषी ततो अतु केतिंङ ज़रूरत तोह। खास लहज़ी, दोई केतिंङ परमेश्वरो खबर ए एनोह बचनो ज्ञान ऊईतिंङ कंड्रिमी थल्जी महस पाहठी आत्मिक वरदान रांहषी ततो।

⁶ दू खास वरदान अंऊ दोई केतिंङ रांहषी ततो दि साबित लहज़ातोर कि यीशु मसीहू पाहठी रूठे खबर हेले शुह।

⁷ दिए वहज़ा तोह कि पवित्र आत्माज़ि केतिंङ दू भत्ते वरदान रांहषी ततो अतु केतिंङ ज़रूरत तोह, देर तचेक कि केरे हेंदु प्रभु यीशु मसीहू वापिस अपिमी थल्जी रूमज़ा तोतोंई।

⁸ परमेश्वर केतिंङ थल मुक्का तचेक विशवासारिंङ पक्‍का लोहवा लोहतो, कि केरे दू ध्याड़ा अपेहल हेंदु प्रभु यीशु मसीह धरती ऊ टोईच़ी वापिस अपतो निर्दोष शोतो।

⁹ परमेश्वर दि लोहतो, छना कुचे दू विशवासो जोगे तोह दंङ दोई छि कुट्रा दू ए लहज़ा, दंङ दोई केतिंङ एनोह योह, हेंदु प्रभु यीशु मसीह रंङ साते नाता तहज़िमी थल्जी बुलासी शुई।

कलीसिया रिंङ फूट

¹⁰ हे गिऊ प्यारे साथी विशवासी रे, गेह केतंङ साते हेंदु प्रभु यीशु मसीहू मिंदंङ साते दि बिनती लहज़ातग, केरे भत्तेर इदि-अई दिरंङ साते सहमत शुहबी जूंस दंङ केहतु बिचंङ फूट इबि मेस पर केरे इच्च़ा ठ्रोह विचार तहज़िमी दोरच़ी दंङ इच्च़ा मकसद रंङ साते इदि-अई दिरंङ साते मिलेकी बंङज़ुंई।

¹¹ छना कुचे हे गिऊ प्यारे साथी विशवासी रे, खलोए ओ टबरातु मीहच़ी गिह्बी कांह पाहठी कंङातेर, कि केहतु बिचंङ झगड़ा शुहबी लेहकी तोह

¹² गिऊ कुट्रिमी मतलब दि तोह कि, केहतु बिचंङ ज़ि अरिया ता एनाबि, “पोलुसो चेला,” दंङ रें “अपुल्लोसो चेला,” रे कैफा “पतरसो,” दंङ रे “मसीहू चेला” कुट्रातोर।

¹³ दि गप्पा रूठे माह, छना कुचे मसीह फासी ठ्रोह माह। शायद केरे गलती रंङ साते दि सोचेक्च़ातंई कि गेह, पोलुस केतिंङ आज़ाद लहज़िमी थल्जी क्रूसो टोईच़ी चढ़ाएसी शुगाह। दंङ शायद केरे गलती रंङ साते दि ला सोचेक्च़ातंई कि केतिंङ दिऊ थल्जी बपतिस्मा रांहषी शुह ताकि केरे गिऊ चेला बणेकपी जूंस।

¹⁴ गेह परमेश्वरो धन्यवाद लहज़ातग, कि क्रिस्पुस ए गयुसा बि छोड़ेके, गेह केहतु बिचंङ ऊई अतिंङ ला बपतिस्मा माह रांईगा।

¹⁵ यह्च़ा अच़िला दि कुट्री मरपोर कि केरे गिऊ चेला तु रूपा रिंङ बपतिस्मा लेहपच़ातंई।

¹⁶ हेंतेग गिह्बी हिद अंजा कि गेह स्तिफनुस ओ टबरातिंङ ला बपतिस्मा रांईगा; दिरे केट्रा गेह माह ञेंहगा कि गेह ऊई अतिंङ बपतिस्मा रांईगा।

¹⁷ छना कुचे मसीह गिह्बी बपतिस्मा रंड्रीमी थल्जी मशत, बल्कि रूठे खबर सुनाएच़िमी थल्जी चरच़ि शुगाह, दंङ अपेहल गेह रूठे खबरो प्रचार लहज़ातग दंङ गेह कुट्रीमी थल्जी संसारो गप्पो इस्तेमाल माह लहज़ातग माह ता मीहरे गिऊ टोईच़ी सिर्फ संसारिक ज्ञानो वहज़ा ज़ि विशवास लोहर, दंङ दोरे क्रूसो टोहकठे मसीहू मौतो सामर्थ माह ञेंहच़ार।

¹⁸ अपेहल मीहरे दि रूठे खबर रेड्रातोर कि मसीह क्रूसो टोईच़ी सिए इलि दंङ दोतु बिचंङ रें मीहरे दि सोचेक्च़ातोर कि दि खबर शुहके शुह। अंऊ मीहरे झांह ठ्रोह सोचेक्च़ातोर दोरे नरको हखा इबि लेहकी तोतोर। पर हेंदु थल्जी अंऊ दू रूठे खबरो टोईच़ी विशवास लहज़ातोर, दि परमेश्वरो मीहतिंङ एनोह सामर्थो दोरच़ी बचाच़िमी तरीका शुह।

मसीह परमेश्वर ओ ज्ञान ए सामर्थ शुह

¹⁹ छना कुचे पवित्र शास्त्रारिंङ दि च़ेहसी तोह, “गेह दि कमोग कि अंऊ मीहतु विचार दि संसारो मीहरे ज्ञानो चेहच़ातोर दोरे हेले रिंङ मुर्खता ओ विचार तोतोर। गेह साबित लोहग कि हेलेरिंङ दोरे बिल्कुल ला समझदार माह तोतोर।”

²⁰ दंङ दि गप्पो दोरच़ी ञेंहच़ी समझेक्च़ातंई कि अंऊ ज्ञानवान तोह दोतु ज्ञानो छल्ले कीमत माह; दंङ धरतीऊ टोईच़ी अंऊ मीहच़ी पढेक्च़ातोर दंङ अंऊ मीहच़ी ञेंहच़ातोर कि छना कुट्री तोह, दोतु समझो ला छल्ले फायदा माह। छना कुचे परमेश्वरे दि प्रगट लहसी ततो कि अंऊ ज्ञान देर धरतीऊ टोईच़ी अपा, दोऊ, दोऊ तुईज़ी छल्ले कीमत माह।

²¹ परमेश्वरे एनोह ज्ञाना रिंङ दि खंई कि दि संसार मीहतु ज्ञानो दोरच़ी दोबि अपेहल ला ञेंई मरपोतो, झांह लेह दोई दू मीहतिंङ बचाच़िमी थल्जी अंऊ विशवास लहज़ातोर दि रूठे खबरो प्रचारो इस्तेमाल लहरिर, हालांकि रे मीहरे दिबी मुर्खता चेहच़ातोर।

²² दि यहुदी मीहतिंङ मुर्खता च़ेहसा छना कुचे दोरे दि गप्पा बि साबित लहज़िमी थल्जी स्वर्गो निशानी जुंज़ातोर। दंङ ऊईजाति तु मीहरे ला मीहतु ज्ञानो खोज लहज़ातोर।

²³ पर हेनर दि प्रचार लहज़ातंई कि मसीह हेंदिंङ हेंदु पापो दोरच़ी छुड़ाएच़िमी थल्जी क्रूसो टोईच़ी सिए इलि। अंऊ यहुदी तु कछंङ ठोकरो वहज़ा, दंङ ऊईजाति तु कछंङ मुर्खता तोह।

²⁴ पर दोरे अतिंङ परमेश्वरे एनोह मीहरे शुहबी थल्जी अंङे चरच़तो, छि यहुदी छि ऊई जाति, दिए मसीहू सामर्थ ए परमेश्वरो ज्ञान तोह।

²⁵ छना कुचे अंऊ परमेश्वरो मुर्खता ठ्रोह च़ेहसा दू मीहू ज्ञान बेहच़ी ला महस ज्ञानवान तोह, दंङ अंऊ परमेश्वर कमज़ोर ठ्रोह च़ेहसा दू ला मीहतु बल बे महसे बलवान तोह।

²⁶ हे गिऊ प्यारे साथी विशवासी रे, दि पाहठी विचार लंहि कि अपेहल परमेश्वरे केतिंङ बुलाकते दू मुक्का केरे छना ठ्रोह तोंहि, संसारो नज़रारिंङ, केहतु बिचंङ महस मीहरे ज्ञानवान माह तोहनी, दंङ माह ए केहतु बिचंङ महसे अगुवा रे तोहनी, दंङ माह ए केहतु बिचंङ महसे तु बाह-मेमेर खास तोईरे।

²⁷ पर परमेश्वरे झांह ठ्रोह मीहरे अंङे च़रति, अतिंङ संसार मुर्ख चेहच़ा, ताकि दोरे दू मीहतिंङ शर्मिन्दा लोहर अंऊ चेहच़ातोर कि दोरे ज्ञानवान तोतोर। दंङ दोई झांह ठ्रोह मीह अंङे च़रति अंऊ कमज़ोर तोतोर, ताकि दोरे दोतिंङ शर्मिन्दा लोहर अंऊ बलवान तोतोर।

²⁸ दंङ परमेश्वरे झांह ठ्रोह मीह अंङे च़रति अंऊ दोतिंङ संसार तुच्छ ञेंहच़ा झांह ठ्रोह मीहरे अंऊ दोतिंङ छल्ले माह समझेक्च़ातोर ताकि दुह दोतिंङ नाश लोहतो अंऊ दोतिंङ संसारो मीहरे खास चेहच़ातोर।

²⁹ परमेश्वरे दि दिऊ थल्जी लहरी ताकि अरिला मीह परमेश्वरो तुईज़ी घमण्ड लेह मरपोतो।

³⁰ पर परमेश्वरे केतिंङ यीशु मसीह रंङ साते इच्च़ा लेह च़रति, दंङ यीशु मसीहू दोरच़ी दोई हेंदिंङ एनोह ज्ञान रंड्रा। परमेश्वर हेंदिंङ एनोह नज़रारिंङ धर्मी ला साबित लहज़ा। यीशु मसीहू दोरच़ी हेनर पवित्र शुहचे तोंहि, दंङ दोई हेंदिंङ पापो दोरच़ी आज़ाद लेह च़रच़ा।

³¹ झांह लेह, छना कि पवित्र शास्त्रारिंङ च़ेहसी तोह, “अच़िया घमण्ड लेह जुंज़ा ता दोऊ टोहकठे घमण्ड लंहि अंऊ परमेश्वरे लहसी ततो।”