A Wakak a Warwara o e Iesu Karisito i tumusi 6 - Label

A tarai Nasaret bel la tortorot o e Iesu

¹ E Iesu taum ana nuna kakak a asaer la han mitingia pa la hanot ting na hanua ane Iesu.

² Ana Pukakiar Sabat i asaer a tarai la ting na rumai lotu, pa a galis a tarai ning la longori la kulkulan kol, pa la kabah mang, “A barsan ne i kibas a tastasmaila ne taha ia? Esi na ngas a tastasman ning di ka saran tari tana sur ir tol a tatatnan utna na kulkulan?

³ I a tena tol rumai ka, a nat e Maria. Na tastasna otleng, e Jems, Josep, Judas pa e Saimon, pa na tastasna hane kanet ka dala laun taum.” Pa bel la gas ono.

⁴ E Iesu i atai la mang, “Di sira hanrawai a propet ting na hanua masik, ika la ot ting na hanua ngasna, na mainala pa la ot ting na rumai ngasna bel la hanrawai i.”

⁵ E Iesu bel i tolsot pas al galis a utna na kulkulan tingia, ika i suah naur a kuna ana dingla na tinsaman, pa i alangolango pas la.

⁶ Pa e Iesu i kulkulan mang bel la tortorot ono. Lamur e Iesu i han ting na hanhanuala pa i asaer a taraila.

E Iesu i sune sen ning a bonot pa pisir naur a kakak a asaerla

⁷ I kabah pas ning a bonot pa pisir naur a kakak a asaerla, pa i sune naunaur onla, pa i saran tar a rakrakai tanla sur lar kepsen a motla.

⁸ I atai la mang, “Gong mulo los tar al utna ting na numulo a tinan, mulo los ka a bulse. Gong mulo los al utna na hangan, gong ta bek pa gong mulo los tar al mani ting na bak.

⁹ Mulor han ka ana su ting na ham mulo, pa gong mulo los al kelkeles.”

¹⁰ I atai la otleng mange, “Ning mulor kes ting na ta rumai, mulor kes ot tingia tuk ana pukakiar ning mulor han kusun a hanua ning.

¹¹ Ning ta hanua bel lar gasgas pas mulo, pa bel lar longor anumulo na warwarala, ning mulor han kusun a hanua ning, mulor tang sen a kubus kusun a hamulo, sur a asilang na tumarang tetek la.”

¹² Pa la han pa la warawai tetek a taraila sur lar lingir a nuknukinla.

¹³ La kepsen a galis a mot, la sabar a galis a tinsaman ana wel, pa la alangolango pas la.

E Herot i nuki mang e Iesu i ka e Jon

¹⁴ E King Herot i longor a warwara o e Iesu, anasa a tarai la rop la ka tasman e Iesu. Dingla la atongi ono mang, “A barsan ne e Jon a Tena Baptais, ka laun ulak kusun a minat. I maining i tol a ututnala na kulkulan.”

¹⁵ Dingla la mang, “Ai e Elaija.” Dingla otleng la atongi ono mang, “E Iesu i ning a propet arlar ana propetla tagun nating.”

¹⁶ Ika ning e Herot i longor a ututnala ne o e Iesu, i atongi mange, “Ia ka umsem tar ana ruana e Jon, pa ne ka laun ulak kusun a minat!”

E Herot i umsem a pukul e Jon a Tena Baptais

^17-18 Lanigo e Herot i sune sen anuna tena harumla pa la tong pas e Jon, la doti pa la akasi ting na rumai a dodot. E Herot i toli larne anasa e Jon ka usur tari ono mang, “Bel i tostos ning u taulai e Herodias, e harimlik.” E Jon i atongi larne anasa e Herot ka dat pas e Herodias, a hane ane Pilip e tasnalik, pa i taulai i.

¹⁹ E Herodias i nget e Jon pa i mang sur ir umkoli anasa i warwara on diau ana nundiau a tinaulai. Bel i tolsot pasi sur ir umkoli,

²⁰ anasa e Herot i matatan e Jon, pa i tasmani mang i a wakak a barsan pa a tena tostos. Pa e Herot i tai alar e Jon. I gas sur ir longor anuna na warwara, maika i loklokron a nuknukna ono.

²¹ E Herot i nuk pas a pukakiar ning di agoni ono, pa i tol a tnan ngasa. Io, e Herodias i nuk pas ning a ngas sur dir umkol e Jon. E Herot i tol a tnan ngasa sur a ningnigola tagun anuna matanitu, pa a ningnigola anuna tena harumla, pa ningnigola mitisa e Galili.

²² Ning la kes ana ngasa, e nat na hane Herodias i kas pa i tortor tanla. E Herot pa a taraila ning la hangan taum ano, la gas kol ono. Pa i atai a basbas ning mange, “Ar tabar u ana ta utna ning ur mang suri tak.”

²³ Pa i lele rakrakai tana mange, “Asa kama ning ur nunung iau suri ar sarani ka. Ning ur nunung iau sur ta tuk a matanitu ar sarani ka.”

²⁴ Pa i han tetek e tana pa i dekeni mang, “Asa ning ar nunung suri?” E tana i kelesi mang, “Ur nunungi sur a pukul e Jon a Tena Baptais.”

²⁵ Aiap ka a basbas ning i kas tektek e King Herot, pa i atai i mange, “Ano otne a mang sur ur suah a pukul e Jon a Tena Baptais ting na ta pelet pa ur sarani tak.”

²⁶ A king i bal maris kol. Ika bel ma i tolsot sur ir ngongoio, anasa ka lele tar mang asa kama ning ir nunung suri, ir sarani ka, pa a tarai ning la kes taum ano ana ngasa, la ka longor tar anuna warwara.

²⁷ I sune kapit ning a tena harum sur ir los tar a pukul e Jon teteki. A tena harum i kas uting na rumai a dodot, pa i umsem ana pukul e Jon.

²⁸ I suahi ting na pelet pa i sarani tana basbas, pa i sarani ta e tana.

²⁹ Pa ning a kakak a asaerla ane Jon la longori, la hanot pa la los pas a minatna pa la akasi ting na kulam a minat.

E Iesu i tabar dilima na rip a tarai

³⁰ Pa a aposella, la atalilis pas e Iesu, pa la atai i ana ututna rop ning la ka tol tari, pa la ka asaer tar a taraila ono.

³¹ Pa e Iesu i atai la, “Mulo lamut, dalar han sur a hanua bel, sur mulor manah pas.” I atongi larne anasa a galis a tarai la hananot, pa bel ta pukakiar sur e Iesu pa nuna aposella lar hangan ono.

³² Pa la kas ana mon pa la han uting na hanua bel.

³³ A galis a tarai ning la oroi pas a mon, la oroi lalan pas e Iesu taum ana nuna kakak a asaerla. La dun kusun a hananuala, pa la nigo ot uting na pukna ning lar sot ono.

³⁴ Ning e Iesu i sot tingia, i oroi a tnan kunum a tarai. I maris kol la, anasa la arlar ana sipsipla ning bel ta tena tai alar anunlai. Pa i turpasi sur ir asaer la ana galis a ututnala.

³⁵ Ning ka rah anuna kakak a asaerla la han teteki, pa la atai i mange, “A hanua bel ka ine, pa ka rah otleng.

³⁶ Ur sune sen a taraila ne sur lar han uting anal hananua milau, pa tatatnan hanua otleng sur lar lou pas al utna na hangan sur lar ieni.”

³⁷ E Iesu i keles la mange, “Mulo ot mulor tabar la.” La atai i mang, “Ning milar tabar la, ir arlar ana arlou tagun a siwal a kalang. Mangasa, milar sai a tnan mani ne?”

³⁸ E Iesu i deken la mang, “Naisa bret kaning mulo losi? Mulor han pa mulor tai.” Ning la ka talapor pas, la atai e Iesu mang, “Dilima na bret pa naur a sis.”

³⁹ Pa e Iesu i sune anuna kakak a asaerla sur lar atai a taraila, sur lar kes ana taktakai kunum ting na ulai.

⁴⁰ Pa la kes ana taktakai kunum, dingla na kunum taktakai a mar, pa dingla dildilima na bonot.

⁴¹ Pa e Iesu i kibas pas dilima na bret pa naur a sis, i tadai usaot na langit, i atong wakak tetek e God onoi. I kibik dilima na bret, pa i sarani tana nuna kakak a asaerla sur lar asalar a taraila ono. I tabar la otleng ana naur a sis.

⁴² La rop la hangan pa la masur.

⁴³ Pa la song bukus pas ning a bonot pa pisir naur a rat ana mah na bret pa sis.

⁴⁴ A wawas ana tarai ka i arlar ana dilima na rip, ika a gurarala pa kakakla otleng la hangan taum onla.

E Iesu i han saot na palai a tasi

⁴⁵ Aiapiap ka e Iesu i sune sen anuna kakak a asaerla sur lar kas ana mon pa lar nigo utumo e Betsaida tumo na ris a puka tasi. Pa i, i kes ot sur ir sune sen a tarai.

⁴⁶ Ning a tarai la ka han sarara, e Iesu i han usaot na mangir sur ir nunung.

⁴⁷ Ning ka rah morom, a mon i han potor a puka tasi, pa e Iesu kama kaning i kes tumo korot latasi.

⁴⁸ E Iesu i oroi la mang ka tekes la ana ulusu, anasa a wuwu i harum misa lanigo. Ana lar, e Iesu i han saot na palai a puka tasi tetek la. Pa siklik ir han bolos la.

⁴⁹ Ning la oroi pasi ning i han saot na palai a puka tasi, la nuki mang a ingun, pa la kukukuk,

⁵⁰ anasa la rop la oroi, pa la matmataut kol. Pa e Iesu i warwara kapit tetek la mang, “Mulor kosom, iau ka ne. Gong mulo matmataut.”

⁵¹ Ning e Iesu ka kas tetek la uting na mon, a wuwu i rop kakat. Pa la kulkulan kol,

⁵² anasa bel la tastasman wakak ana utna na kulkulan ning e Iesu ka tol tari ana dilima na bret pa naur a sis. Anasa bel la mang sur lar kibasi.

E Iesu i alangolango a tinsamanla tumo e Genesaret

⁵³ Ning la ka han lakai tumo na ning a ris a puka tasi, la sot tumo na papar Genesaret pa la dot akes tar a mon.

⁵⁴ Ning la purum kusun a mon, a tarai la oroi lalan kapit pas e Iesu.

⁵⁵ La dun sur a tinsamanla ting na hananuala rop ting na papar ning. Pa ning la longori mang e Iesu kaning i kes ting na ta hanua, la los a tinsamanla ana logola sur a hanua ning.

⁵⁶ Ana nanatar a hanhanua pa tatatnan hanhanua ning e Iesu i han ia, la aborbor a tinsamanla ting na arpotor a hanua. Pa tinsamanla la nunung e Iesu sur lar tuk tar ka a tuka kaen anunai. La rop ning la tuk tari la langolango.