A Wakak a Warwara o e Iesu Karisito i tumusi 16 - Label

A kamkamtur ane Iesu kusun a minat

¹ Ning a Pukakiar Sabat ka rop, e Maria Magdalen, pa e Maria tana e Jems, pa e Salome ditol lou pas a ututnala ning i tomtobo sur ditol ar atomtobo a minat e Iesu ono.

² Ana kobot ning ot ana ningnigo na pukakiar ana wik, ditol han sur a kulam a minat.

³ Ning ditol han amon ditol deken artalai ditol, “Esi ma ir nangan datol sur ir lakir sen a hat numo kusun a taman ana kulam a minat?”

⁴ Ning ditol tai tostos utumo, ditol oroi mang di ka lingir sen a tnan hat ning.

⁵ Ning ditol kas uting na kulam a minat, ditol oroi ning a barman, i kes tar ana sot a kunditol, i mermer taum ana kokok a kaen. Pa ditol matmataut.

⁶ I atai ditol mange, “Gong mutol matmataut. A tasmani mang mutol tai sur e Iesu a te Nasaret, esining di sai ahat tari saot na rakai kutus. Bel i ma te, ka laun ulak. Mutol oroi a pukna ne di aborbor tari ano.

⁷ Mutol han, mutol ar atai anuna na kakak a asaerla pa e Pita otleng mange, ‘E Iesu ir nigo utumo e Galili. Mulor oroi tumo, lar ot ning ka atai nigon tar mulo.’”

⁸ Pa ditol purum pa la dun kusun a kulam a minat taum ana nuknuk kol pa ditol koloron. Bel ditol atai tik ana ta warwara anasa ditol matmataut kol.

E Iesu i hanot tetek e Maria Magdalen

⁹ [Ning e Iesu ka laun ot ulak ana kobot ning ot ana ningnigo na pukakiar ana wik, i hanot tetek e Maria Magdalen, esining i kepsen mais a mot kusuni.

¹⁰ E Maria Magdalen i han pa i atai la ning la sira mur e Iesu, ning la balmamahat pa la tangis suri.

¹¹ Ning la longori mang e Iesu ka laun ulak pa e Maria ka oroi tari, bel la tortorot ono.

E Iesu i hanot tetek naur a kaklik asasaer

¹² Lamur e Iesu i hanot tetek naur a kaklik asasaer ning dia han amon ana ngas. A palaona e Iesu i ries.

¹³ Dia ulak, pa dia atai a kakak a asaerla, ika bel la tortorot otleng on diau.

E Iesu i hanot tetek ning a bonot pa pisir takai a kakak a asaerla

¹⁴ Lamur i hanot pas tetek ning a bonot pa pisir takai a kakak a asaerla kaning la hangan. Pa i warwara rakrakai onla, anasa bel la tortorot, pa a balanla i rakrakai, pa bel la tortorot onla ning la ka oroi tari ning ka laun ulak.

¹⁵ I atai la mange, “Mulor han uting na rakrakan hanua rop, pa mulor warawai ana Wakak a Warwara tetek a taraila rop.

¹⁶ Esining i tortorot pa di baptaisi dir alauni. Ika esining bel i tortorot, God ir saran a rakrakai a warkurai teteki sur ir mat.

¹⁷ A tena tortorotla lar tol a ututnala na kulkulan larne: Lar kepsen a motla ana risak, lar warwara ana urmatana tona warwara,

¹⁸ lar tong a soila, pa ning lar gang a malum laulau, bel ir alaulau la, pa lar suah a kunla ana tinsamanla, pa lar langolango.”

E Iesu i han kas usaot na langit

¹⁹ Ning a Leklek e Iesu ka warwara tar tanla, e God i rakan pasi usaot na langit, pa i kes ana sot a kuna.

²⁰ Anuna kakak a asaer la han, pa la warawai ana hanhanua rop. Pa a Leklek i nangan la, pa i amomol tar anuna na warwara ana ututnala na kulkulan ning i han taum ono.]