A Wakak a Warwara o e Iesu Karisito i tumusi 1 - Label

E Jon a Tena Baptais i warawai

¹ Ine a kamkamna ana Wakak a Warwara o e Iesu Karisito, a Nat e God.

² A warwara ane God ning di ka tumus tari ana buk anuna propet Aisaia i atongi mange, “Oroi, ar sune anuka tena los warwara sur ir nigon u, pa ir atalapor anuma ngas.

³ A elngena mainla i arkabah ting na hanua bel mang, ‘Mulor sang a ngas anuna Leklek, mulor atostos anuna ngasla.’”

⁴ Io, e Jon a Tena Baptais i hanot ting na hanua bel, pa i sira baptais pa i warawai sur a tarai lar lingir a nuknukinla pa dir baptais la, pa e God ir kepsen anunla na toltol laulaula.

⁵ A taraila rop misaot e Jerusalem pa miting na hananuala rop tumo na papar Judia rop, la han teteki. La patuai talapor ana nunla na toltol laulaula, pa i baptais la ting na malum Jodan.

⁶ E Jon i mermer ana kaen di toli ana hih a kamel, pa i dot ahati ana let di toli ana palaona bulumakau. I sira ien a mumla pa polona tatos.

⁷ I warwara talapor mange, “Esaning i mur tak i leklek tak. Pa bel a tolsot pasi sur ar paksen a inau ana anuna su. A natarna kol tana.

⁸ Iau ar baptais mulo ana malum, pa i ir baptais mulo ana Talngan Tabu.”

E Jon i baptais e Iesu pa e Satan i lari

⁹ Ana pukakiarla ning e Jon i baptais a taraila, e Iesu i hanot mitisa na hanua Nasaret ana papar Galili. Pa e Jon i baptaisi ting na malum Jodan.

¹⁰ Ning e Iesu i saur miting la malum, i oroi a langit i sapang, pa a Talngan Tabu i han purum teteki arlar ana tabun.

¹¹ Pa a elngena mainla misaot na langit i atongi mang, “U a Natuklik, a katnan u, a gas kol hom.”

¹² Pa ono otning a Talngan Tabu i sune sen e Iesu uting na hanua bel.

¹³ I kes tingia diat a bonot a pukakiar pa e Satan i lari. I kes taum ona rokoiola pa a angelola la nangani.

E Iesu i kabah pas diat a tena migei uben

¹⁴ Ning di ka akas tar e Jon uting na rumai a dodot, e Iesu i hanot utumo na papar Galili, pa i warwara talapor ana Wakak a Warwara ane God,

¹⁵ i atongi mange, “A pukakiar ka hanot, pa a matanitu ane God ka milau. Mulor lingir a nuknukimulo pa mulor tortorot ana Wakak a Warwara.”

¹⁶ Ning i asal ana hang ana puka tasi Galili, i oroi tetek naur a tas, e Saimon pa e Endru kaning dia minggen a uben tisa latasi, anasa diau naur a tena minggen uben.

¹⁷ I atai diau mang, “Mu lamut, mu mur iau, sur mu naur a tena ben tarai.”

¹⁸ Ono otning dia kamtur pas kusun a ubenla pa dia muri.

¹⁹ Ning i asal siklik kale, i oroi pas maleng naur a tas e Jems pa e Jon, naur a nat e Sebedi, dia kes tingui na mon pa dia suk anundia na ubenla.

²⁰ Ono otning e Iesu i kabah pas diau, pa dia han kusun e tamandiau taum ana tarai a titol ting na mon, pa dia muri.

E Iesu i kepsen a mot kusun ning a barsan

²¹ Pa la han utumo e Kapernaum, pa ana Pukakiar Sabat, e Iesu i kas uting na rumai lotu, pa i asaer la.

²² La kulkulan ana nuna asasaer, anasa i asaer la, arlar o esaning a warkurai kaning tana. Bel i asaer la arlar ana anunla na tena asaer tagun a warkurai la sira toli.

²³ Ning a barsan, a mot i solongi i kes ting na rumai lotu, ono otning i kukuk mange,

²⁴ “U e Iesu a te Nasaret. Ur tol asa omila? U hanot sur ur alaulau mila? A tasman u ot, u a Tena Totoh ane God.”

²⁵ E Iesu i sairasi mange, “Gong u warwara! Purum kusun a barsan ning!”

²⁶ A mot i gulen rakrakai tari, pa i kukuk, pa i purum kusuni.

²⁷ A tarai rop la kulkulan kol, pa la deke artalai la mang, “Asa ine? A tona asasaer. A barsan ne i tong a warkurai pa ana nuna warwara i kepsen sen a motla, pa la longor tana.”

²⁸ Pa a warwara o e Iesu i han sarara ana hananuala rop ting na papar Galili.

E Iesu i alangolango a galis a tinsaman

²⁹ Ning e Iesu taum ana kakak a asaer la purum miting na rumai lotu, la han taum ma e Jems pa e Jon, sur uting na rumai ane Saimon pa e Endru.

³⁰ E anmuna e Saimon, a hane i sasam, pa i borbor taum ana laplapang, pa la atai e Iesu ono.

³¹ Pa e Iesu i han teteki, i tong pas a kuna, pa i dat atur pasi, pa a laplapang i rop kusuni. Pa a hane ning i tabar la ana utna na hangan.

³² Ning a kamis ka sup tar, a tarai la ben pas a tinsamanla rop pa la otleng ning a motla kaning onla tetek e Iesu.

³³ A tarai rop miting na hanua ning, la bukus ting na taman.

³⁴ Pa i alangolango pas a galis a tarai ning la sasam ana urmatana tinsaman, pa i kepsen a galis a mot kusun la. Pa i sairas a motla sur gong la warwara, anasa la tasman ot e Iesu.

E Iesu i warawai ting na papar Galili

³⁵ Ana lar, e Iesu i mata pa i purum. I han uting ana hanua bel pa i nunung tetek e God.

³⁶ Pa e Saimon taum onla ning la han taum, la seren e Iesu.

³⁷ Pa ning la pasteteki, la atai i mange, “A tarai rop la seren u.”

³⁸ Pa e Iesu i atai la mange, “Dalar han uting anal hanua milau, sur ar warawai otleng tetek la. Ine a kamkamna ning a hanot suri.”

³⁹ Pa i han taltal ting na papar Galili rop. I warawai ting na rumai lotu anunla, pa i kepsen a motla kusun a taraila.

E Iesu i alangolango pas a lepra

⁴⁰ Ning a barsan, a lepra, i han tetek e Iesu, i kes ana bokona hana, pa i nunung rakrakai i mang, “Ning u mang, ur tolsot sur ur alangolango pas iau.”

⁴¹ Pa e Iesu i marisi, pa i tuslan a kuna, i tong a palaona, pa i atai i mang, “A mang ot, ur langolango.”

⁴² Ono otning a lepra i rop kusuni, pa i langolango ulak.

⁴³ Pa e Iesu i sune seni taum ana rakrakai a warwara mang,

⁴⁴ “Gong u atai tar tik ono. Ur han pa ur asangan u tetek a tena artabar tetek e God, pa ur saran a artabar tetek e God larning e Moses ka atong tari. Ning ur toli larne ir talapor tetek a taraila mang a palaom ka wakak ulak.”

⁴⁵ Ika ning i purum, i warwara taltal onoi tetek a taraila. Ana toltol ning, i asanan tar e Iesu, pa bel ma i tolsot sur ir hanot talapor ting na ta hanua. I taltal kama ting na hanua bel, maika a taraila miting na hanhanua la han ot teteki.