Matiu 21 - Label

E Iesu i han usaot e Jerusalem arlar ana king

¹ Ning la han milau e Jerusalem, la hanot tingia e Betpage na Mangir Oliw, e Iesu i sune naur a kaklik a asaer.

² I atai diau mang, “Mur han sur a hanua kaning lanigo tamu. Ning mur hanot mur oroi ning a dongki kaning di dot akes tari, taum ana natnalik. Mur pak pas diau, pa mur ben diau ute tetek iau.

³ Ning tik ir deken mu on diau, mur atongi mang, ‘A Leklek i mang sur diau,’ pa ono otning ir noren sen diau tetek mu.”

⁴ Di tol a utna ne sur dir tolsot pas a warwara ane God ning a propet ka atong tari nating mang,

⁵ “Mulor atai a tarai Saion mang, ‘Oroi i, anumulo a king anone i hanot tetek mulo, i anatarna pasi, pa i kas ana dongki, a barman a dongki.’” Sekaraia 9:9

⁶ Naur a kaklik a asaer dia han, pa dia toli arlar ana warwara ning e Iesu ka atong tari tandiau.

⁷ Dia ben pas a dongki taum ana natnalik, dia kepsen a nundiau naur a saket, pa dia suah tari saot na palai naur a dongki, pa e Iesu i kes on diau.

⁸ A tnan kunum a tarai otleng la kepsen anunla na saket, pa la sageni ting na ngas. Pa dingla na tarai otleng la ting pas a rakarakaila pa la suahi ting na ngas.

⁹ A kunum a tarai ning la nigo tana, pa la otleng ning la mur, la kukukuk mange, “Hosana tetek a Nat e Dewit! Esaning i hanot ana risan a Leklek i angis.’” Buk Song 118:25-26 “Hosana usaot kol!”

¹⁰ Ning e Iesu i hanot saot e Jerusalem, a tarai Jerusalem rop la aregaia pa la deke mang, “Esi ning?”

¹¹ Pa a kunum a tarai ning la han taum onoi la atongi mang, “A barsan ne e Iesu, a propet mitumo e Nasaret ana papar Galili.”

E Iesu i kas ting na rumai a artabar

¹² E Iesu i kas tingui na woroh a rumai a artabar, pa i lu purum sen la rop ning la siusiurai, pa la otleng ning la lolou tingia. I minggen lingir sen a logola anuna tena keles manila, pa a keskesla anunla ning la siuran a tabunla.

¹³ Pa i atai la mang, “Di ka tumus tari ting na Buk Tabu mang, ‘Dir atong anuka rumai ana rumai a nunung.’ Ais 56:7 Ika mulo ka keles pasi sur ir arlar ana ‘pukna na mumun ana tena kinkinaula.’” Jer 7:11

¹⁴ A kutla pa la ning a hanla i mat la han teteki ting na rumai a artabar pa i alangolango pas la.

¹⁵ Ika, ning a leklek na tena artabarla tetek e God pa na tena asaer tagun a warkurai la oroi a wakak a utnala kol ning i toli, pa la longori otleng kakakla la kukukuk ting na woroh a rumai a artabar mang, “Hosana tetek a Nat e Dewit,” la balakut kol.

¹⁶ Pa la deken e Iesu mang, “U ka longor tar a warwarala ne anuna kakakla?” E Iesu i keles la mang, “Ma! I mangasa, belot mulo was a warwara miting na Buk Tabu? I atongi mang, ‘U ka asaer tar kakakla sur lar rakan aleklek pas u.’” Buk Song 8:2

¹⁷ Pa i han kusun la tingia, pa i han utumo e Betani pa i borbor pas ning a puka morom tumo.

E Iesu i bor a rakai a fig

¹⁸ Ana kobot ning ot, ning e Iesu i ulak usaot e Jerusalem i murak.

¹⁹ I oroi pas a rakai a fig i tur tar ting na ris a ngas. I han milau i, ika bel i oroi al wana, a pakana rop ka. Pa i atongi tana rakai ning mang, “Turpasi anone pa lamur, bel ur wai ulak ma.” Ono otning, a rakai i marang.

²⁰ Ning a kakak a asaerla la oroi i, la kulkulan, pa la dekeni mang, “A rakai a fig ne, i marang kapit mangasa?”

²¹ E Iesu i keles la mang, “A atong momoli ta mulo, ning mulo tortorot, pa bel mulor urmatana nuknuk, mulor tol a titol ne a toli ana rakai a fig. Belsur i ka ine ning mulor toli. Ning mulor atongi otleng tetek a mangir ne mang, ‘Ur takakan pa ur sirok parung usa latasi,’ ir toli ka.

²² Ning mulo tortorot, a ututnala rop ning mulo nunung suri, mulor kibasi.”

La kabah ana rakrakai ning e Iesu i sira titol ono

²³ E Iesu i kas tingui na woroh a rumai a artabar, pa i asaer a tarai. A leklek a tena artabarla tetek e God pa a ningnigola anuna tarai la han teteki. Pa la dekeni mang, “Esi na ngas a rakrakai ning u tol a ututnala ne ono? Esi i saran a rakrakai ne tetek u?”

²⁴ Pa e Iesu i keles la mang, “Iau otleng ar deken mulo ana ning a kabah. Ning mulor kelesi, ar atai mulo ana rakrakai ning a sira tol a ututnala ne ono.

²⁵ Mitaha a baptais ning e Jon i baptais a tarai onoi? Ta e God, o tan a tarai ka?” Pa la warwara artalai tanla mang, “Ning dalar atongi mang, ‘Ta e God,’ ir keles dala mang, ‘Sur asa ning bel mulo tortorot onoi?’

²⁶ Ika ning dalar atongi mang, ‘Tan a tarai,’ dalar matatan a tarai, sakana lar balakut tetek dala, anasa la rop la tortorot o e Jon mang, i a propet.”

²⁷ Pa la keles e Iesu mang, “Bel mila tasmani.” Lamur e Iesu i atai la mang, “Iau otleng, bel ar atai mulo ana rakrakai ning a sira tol a ututnala ne ono.”

A warwara larlar ana naur a nat a barsan

²⁸ E Iesu i atai la mang, “Asa mulo nuki? Ning a barsan naur a natnalik, naur a kaklik barsan. I han tetek a ningnigona, pa i atai i mang, ‘Natuklik, anone ur han uting na barim a wain pa ur titol.’

²⁹ Pa i kelesi mang, ‘Bel ar han,’ ika lamur i lingir a nuknukna, pa i han.

³⁰ Pa e tamana i han maleng tetek ning a halindiau, pa i atai i otleng larning, pa e natnalik i kelesi mang, ‘I wakak ka tata, ar han ot,’ ika bel i han.

³¹ Esi na halindiau ning i longor ta e tamandiau?” La kelesi mang, “A ningnigona.” E Iesu i atai la mang, “A atong momoli ta mulo, na tena los totokom pa a pamuk a gurarala, kaning la kas ting na matanitu ane God lanigo ta mulo.

³² Anasa e Jon i hanot pa i asaer mulo ana tostos a toltol, pa bel mulo tortorot ono, ika na tena los totokom pa na pamuk a gurara la tortorot ono. Mulo oroi tar la ot, ika bel mulo lingir a nuknukimulo pa bel mulo tortorot onoi.”

A warwara larlar ana tena titolla ting na barim a wain

³³ “Mulor longor ning a warwara larlar maleng ne: Ning a barsan i oman tar a barim a wain, pa i tol alar tari ana woroh. Tingui na tinine barim, i kel tar a tung sur dir pas miren a wain ono sur a polona ir hanot. Pa i tol tar a natar a rumai i tur kas sur ana tena tai alar. Lamur i saran tar kaba a barim tetek dingla na tena titol sur lar tai alari, pa i han uting na ning a hanua masik.

³⁴ Ning ka milau a kalang sur dir git taum a wana wain, i sune sen anuna na tena titol oros tetek a tarai a titol, sur lar los pas anuna al wana wain.

³⁵ A tarai a titol ning, la tong akes pas anuna na tena titol oros. La um ning na halinla, takai la umkoli pa takai otleng la wolot koli ana hatatla.

³⁶ I sune ulak anuna dingla na tena titol oros, la galis tanla ning i sune nigon tar la. Ika a tarai a titol la tol ulaki ka larning tetek la.

³⁷ Lamur i sune sen e natnalik tetek la, anasa i atongi mang, ‘Lar hanrawai i.’

³⁸ Ika, ning a tarai a titol la oroi pas e natnalik la warwara artalai tanla mang, ‘Esaning ir keles e tamana, i ma ine ot. Mulo lamut, dalar umkoli, sur anundalai ma a barim a wain.’

³⁹ Pa la tong akes pasi, la minggen purum seni miting na barim, pa la umkoli.”

⁴⁰ “Ning a tamana barim a wain ir hanot, asaning ir toli tetek a tarai a titol?”

⁴¹ La kelesi mang, “Ir umkol arop sen a laulau a tarai ning, pa ir saran tar anuna barim a wain tetek al tarai a titol masik, sur lar tai alari. A tarai a titol ning, lar bot saran tar anunal wana wain ana kalang a sol.”

⁴² E Iesu i atai la mang, “I mangasa, belot mulo was a warwara ne ting na Buk Tabu? I atongi mang, ‘A hat ning na tena tol rumai la kepseni, i ot ning, a wakak a hat kes, ning di tol a rumai saot ono. A utna ne, a Leklek ot ka tol tari, pa i wakak kol ana numila a tatatai.’ Buk Song 118:22-23

⁴³ I maining a atongi ta mulo mang, dir rakan sen a matanitu ane God kusun mulo, pa dir saran tari tan al tarai ning lar suah a wakak a wanala ning i sot.”

⁴⁴ Esi ning ir punga tar ana hat ne, ir tagingini, ika esining a hat ne ir punga tar ono, ir tamire arlar ana kubus.

⁴⁵ Ning a leklek tena artabar tetek e God pa a Parisaiola la longor a warwarala larlar ane Iesu, la tasmani ot mang i warwara ka onla.

⁴⁶ Pa la tai sur ta ngas sur lar tong akesi ono, ika la matatan a kunum a tarai, anasa a tarai la tortorot ono mang i a propet.