Jon 1 - Label

E Iesu ot a Warwara ane God

¹ Natnating ot ning belot di akes a rakrakan hanua, a Warwara ka kes nigo. A Warwara i kes taum o e God, pa a Warwara i ot e God.

² Natnating ot i kes taum o e God.

³ Ana Warwara ot, e God i akes a ututnala rop, bel ta utna ning e God i akesi bel i akesi taum ana Warwara.

⁴ A lalaun i kes onoi, pa a lalaun ning, i a talapor anuna taraila rop.

⁵ A talapor i atalapor ana mormorom, pa a mormorom bel i tolsot pasi.

⁶ E God i sune sen ning a barsan, a risana e Jon.

⁷ I hanot sur ir warwara talapor ana talapor, sur a taraila rop lar tortorot onoi.

⁸ I ot bel a talapor, i hanot ka sur ir warwara talapor ana talapor.

⁹ Anasa a talapor momol ning ir atalapor a taraila rop, ir hanot ute na rakrakan hanua.

¹⁰ A Warwara i kes ana rakrakan hanua. Pa ana Warwara e God i akes a rakrakan hanua, ika a taraila ana rakrakan hanua bel la oroi lalani.

¹¹ I hanot sur anuna taraila, ika anuna taraila ot bel la malmaling pasi.

¹² Ika, la rop ning la maling pasi, pa la tortorot ana risana, i malmaling pas la, sur la na natnat e God.

¹³ Bel di atong la mang a natnat e God ana agon ana mangis a tarai, o ana nemnem ana ta barsan mite lapiu. E God ot e tamanla.

¹⁴ A Warwara i hanot a barsan momol, pa i kes na arpotor ta mila. Mila ka oroi tar anuna matatar, a matatar ane Natnalik takai sot ka, ning i han kusun e Tamana, i bukus ana marmaris pa a momolna.

¹⁵ E Jon i warwara talapor onoi, pa i warwara ana tnan elngena mange, “I ot ne, ning a warwara nigo ono mang, ‘Esining ir mur tak, i leklek kol hok, anasa i ot i laun nigo tak.’”

¹⁶ I bukus ana marmaris, pa ana nuna tnan marmaris, i sira angisngis dala taum ana galis a wakak a utna.

¹⁷ Ta e Moses, e God i saran tar a warkurai tan dala, ika o e Iesu Karisito i saran tar a marmaris pa a momolna tetek dala.

¹⁸ Bel tik i oroi tar e God tuk onone. Ika e Natnalik ka, takai sot ka, i kes taum o e Tamana, i asangan e God tetek dala. Pa i ot e God.

E Jon a Tena Baptais i warwara onoi ot

¹⁹ A ningnigola ana tarai Juda la mitisa e Jerusalem, la sune sen a tena artabarla, pa dingla na tarai tagun a mangis a tarai Liwai, tetek e Jon sur lar dekeni mang, “U esi?”

²⁰ E Jon bel i warwara alari, i warwara talapor ot onoi mang, “Bel sur iau e Karisito.”

²¹ La deken ulaki mang, “U esi? U e Elaija?” Pa i keles la mange, “Belal, iau bel e Elaija.” La deken ulaki mange, “U a propet ning di atongi mang ir hanot?” I keles la mang, “Belal.”

²² Lamur la atai i mange, “U esi? Ur atai mila sur milar atai la ning la sune mila ute. Asa ning ur atongi hom?”

²³ E Jon i keles la mange, “Iau a barsan ning a propet Aisaia i warwara nigo ono mang, ‘A elngena mainla i arkabah ting na hanua bel mang: Mulor atostos a ngas anuna Leklek.’” Ais 40:3

²⁴ A Parisaiola ning di sune la tetek e Jon,

²⁵ la dekeni mange, “U atongi mang, u bel e Karisito, pa bel otleng u e Elaija, pa bel u a propet, ning di atongi mang ir hanot. Ning i manglarning, sur asa u baptais a taraila?”

²⁶ E Jon i keles la mange, “A baptais mulo ana malum, ika takai kane i tur na arpotor ta mulo ning bel mulo tasman lalani.

²⁷ Esaning ir mur tak, i leklek tak. Pa bel a tolsot pasi sur ar paksen a inau ana anuna su. A natarna kol tana.”

²⁸ A ututnala ne, la hanot tumo e Betani ana ris a malum Jodan ning e Jon i baptais a taraila ano.

E Iesu a Nat a Sipsip ning ir mat ana laulau a ginina taraila

²⁹ Ning a pukakiar lamur, e Jon i oroi pas e Iesu i han amon teteki, pa i atongi mange, “Mulo oroi i, a Nat a Sipsip ane God, ning ir kepsen a laulau a ginina rakrakan hanua.

³⁰ A barsan kane, ning a warwara nigo ono mange, ‘A barsan ning ir mur tak, i leklek kol hok, anasa i laun nigo tak.’

³¹ Lanigo iau otleng bel a tasmani. Ika a baptais ana malum sur ar asangan a barsan ne tetek a tarai Israel.”

^32-33 Pa e Jon i warwara talapor mange, “Bel a tasmani esi e Karisito. Ika e God, ning i sune iau sur ar baptais ana malum, i atai iau mang, ‘Ur oroi a Talngan Tabu ir han purum pa ir kes ana ning a barsan. A barsan ning, ir baptais ana Talngan Tabu.’ Pa a oroi a Talngan Tabu i han purum misaot na langit, i arlar ana tabun pa i kes saot o e Iesu.

³⁴ Ia ka oroi tar a utna ning i hanot, pa a warwara talapor onoi mang, i a Nat e God.”

A ningnigo na kakak a asaerla ane Iesu

³⁵ Ning a pukakiar lamur, e Jon taum ana naur a kaklik tagun a kakak a asaerla anunai, ditol kaning ia ulak.

³⁶ Ning i oroi e Iesu i bolos ditol, i atongi ono mange, “Oroi, a Nat a Sipsip ane God.”

³⁷ Ning naur a kaklik a asaer dia longor a warwara ning, dia muri ot ma e Iesu.

³⁸ Ning e Iesu i talingir, i oroi diau ning dia muri, pa i deken diau mange, “Asa ning mu mang suri?” Dia kelesi mange, “Rabi” (a kamkamna mang Tena Asaer), “u kes taha?”

³⁹ E Iesu i keles diau mange, “Mur han ute sur mur oroi.” Pa dia muri, pa dia oroi a pukna ning e Iesu i kes ano. Ning ditol hanot, ka diat a mais a kamis pas, pa ditol kes a rah kidol ning tingia.

⁴⁰ Ning a halindiau ning dia longor a warwara ane Jon pa dia mur e Iesu, a risana e Endru, a tas e Saimon Pita.

⁴¹ A ningnigo na utna ning e Endru i toli, i seren pas e tasnalik e Saimon, pa i atai i mange, “Mila ka pastetek pas a Mesaia!” (a kamkamna mang e Karisito).

⁴² E Endru i ben e Saimon tetek e Iesu. Ning e Iesu i oroi i, i atai i mange, “U e Saimon, a nat e Jon, dir atong a risam mang e Kepas.” (Ana warwara Grik di atongi mang e Pita, a kamkamna a hat.)

E Iesu i kabah pas e Pilip pa e Natanael

⁴³ Ning a pukakiar ulak, e Iesu i mang sur ir han utumo e Galili. I pastetek pas e Pilip, pa i atai i mange, “Ur mur iau.”

⁴⁴ E Pilip i mitimo e Betsaida, a hanua ane Endru pa e Pita.

⁴⁵ E Pilip i pastetek pas e Natanael, pa i atai i mange, “Mila ka pastetek pas a Karisito ning e Moses i warwara nigo tar ono ana Buk a warkurai, pa propetla otleng la ka warwara nigo tar ono ana nunla na tumtumus, i e Iesu a te Nasaret, a nat e Josep.”

⁴⁶ Ika e Natanael i kelesi mange, “Nasaret! Mangmangasa, ta wakak a utna ot ir hanot mitingia?” E Pilip i kelesi mange, “Ur han ute pa dar han sur ur oroi.”

⁴⁷ Ning e Iesu i oroi pas e Natanael i hanot teteki, i atongi ono mange, “A te Israel momol, bel i tasman a asasongo.”

⁴⁸ E Natanael i deken e Iesu mange, “U tasman mangmangasa iau?” I kelesi mange, “Ning belot e Pilip i ben u ute, ia ka oroi nigon tar u, ning u kes ting nahai a rakai a fig.”

⁴⁹ E Natanael i atai i mange, “Tena asasaer, u a Nat e God, u a King anuna tarai Israel.”

⁵⁰ E Iesu i atai i mange, “Mangmangasa, u tortorot hok, anasa a atai u mang u kes tar nahai a rakai a fig? Lamur ur oroi a tatatnan utna kol ir hanot, ir itna ana utna ne.”

⁵¹ Lamur e Iesu i atai i mange, “A atong momoli ta mulo, mulor oroi a langit ir sapang, pa a angelola ane God lar hanan kas pa lar hanan purum tetek a Nat a Barsan.”