Hibru 8 - Label

E Iesu anundala ningnigo na tena artabar tetek e God ana tona kunubus

¹ A tnan utna ning mila ka warwara pas ono i mange: Anundala ningnigo na tena artabar tetek e God, ning ka kes tar ana ris a sot a kuna keskes ane God, a leklek a King kol saot na langit.

² I titol tetek e God saot na langit uting na pukna ning i Tabu Kol ting na rumai a sel ane God. I ne a rumai a sel momol, ning a Leklek ot i toli, bel a tarai la toli.

³ A ningnigo na tena artabarla rop tetek e God, e God i suah tar la sur lar saran tar a artabarla pa lar tun a inagoila sur a artabar teteki. Manglarning i tostos sur e Iesu anundala ningnigo na tena artabar otleng ir artabar ot anal utna.

⁴ Ngandek ning ir kes te lapiu, bel ir tena artabar tetek e God, anasa dingla na tena artabar kanet la lapiu, pa la sira saran a artabarla arlar ana Warkuraila ane Moses.

⁵ A titol na artabar la sira toli ting na rumai a artabar. A rumai ning i arlar ka ana manar a rumai saot na langit. Ine kamkamna ning e God i atumarang e Moses, ning i sang sur ir tol a rumai a sel ning lar tun artabar ono. I atongi tana mange, “Tumarang tar! Ur tol a ututnala rop, arlar ot ana manar a rumai ning ia ka asangan tari tam saot na mangir.” Kisim Bek 25:40

⁶ Ika e Iesu ka kibas pas a titol na tena artabar ning i itna kol tana titol na artabar anuna tena artabarla. Mang otleng larning a kunubus ning e Iesu ka tolsot pasi sur ir dat taum e God pa tarai, i itna kol tana ningnigo na kunubus. A lelela ning la a kama kunubus, la wakak kol tana ningnigo na lelela.

⁷ Ngandek ning a ningnigo na kunubus kar tostos kol, bel dir tai ulak sur tik.

⁸ Ika e God i oroi mang a toltol laulau kaning ot ona tarai pa i atongi larne, “A Leklek i atongi mang: Oroi, a pukakiarla lar hanot, ning ar tol a tona kunubus taum ana tarai Israel pa tarai Juda.

⁹ Bel ir arlar ana kunubus ning a toli taum ana tumtubunla ana pukakiar ning a ben purum pas la mitimo e Ijip, anasa bel la mur anuka kunubus, pa a gilam ris kusun la.

¹⁰ A Leklek i atongi larne: A kunubus ning ar toli taum ana tarai Israel, ana pukakiarla lamur, i mange: Ar suah tar anuka warkuraila ting na nuknukinla, pa ar tumus tari uting na balanla. Pa iau a God anunla, pa la anuka tarai.

¹¹ Bel tik ir asaer ta halna, o ta tasnalik ulak ma larne, ‘Ur tasman a Leklek,’ anasa la rop lar tasman iau, a tarai oros ka pa la otleng ning la leklek.

¹² Ar kepsen sen anunla na rongo, pa bel ar nuk ulak pas ma nunla na toltol laulaula.” Jer 31:31-34

¹³ Ning e God i atong a kunubus ne mang “a tona kunubus”, i talapor mang a ningnigo na kunubus ka muar. Pa utna i muar pa ka bongnani ono, milau ma sur ir rorom.