Hibru 3 - Label

E Iesu i leklek ta e Moses

¹ I maining na tastasikla ning e God i kabah pas mulo sur mulo anuna tarai, mulor nuk akes e Iesu. Esaning Aposel pa a ningnigo na tena artabar tetek e God ning dala tortorot onoi pa dala warwara talapor ono.

² E God ka aslang tari sur a titol ne, pa i momol onoi, larning e Moses i momol ana nuna titol na arpotor ana tarai ane God.

³ A hanrawai ning di sarani tetek a barsan ning i tol a rumai, i itna kol tana hanrawai ning di sarani tetek a rumai ning i toli. I mang otleng larning, a hanrawai ning di sarani tetek e Iesu i itna kol tana hanrawai ning di sarani tetek e Moses.

⁴ Na rumai taktakai rop taktakai barsan i toli, ika e God i tol a ututnala rop.

⁵ E Moses, i a tena titol oros ane God, pa i momol ana nuna titol ting na rumai ane God. I warwara talapor nigo tar ana ututnala ning e God ir warwara talapor ono lamur.

⁶ Ika e Karisito, i a Nat e God pa i momol ana nuna titol ning i tai alar a rumai ane God. Ning dala tur rakrakai ana tortorot, pa bel dala matmataut, pa dala harnanai sur a ututnala ning e God ir toli, dala a rumai ane God.

La ning bel la tortorot bel lar kas ting na hanua na manah ane God

⁷ Dala a tarai ane God, dalar mur a warwara ana Talngan Tabu ning i atongi larne, “Onone ning mulo longor a elngena e God,

⁸ gong mulo arakrakai alar a balamulo arlar larning na tumtubumulola nating la toli, ning la gilam ris, ana raula ning la kes ting na hanua bel, pa la lar iau.

⁹ La lar iau tingia, pa la oroi ot anuk na titol ana diat a bonot a rau.

¹⁰ Ine a kamkamna ning a balakut tetek a tarai ning, pa a atongi larne, ‘A nuknukinla i han rongo bolbolos, pa bel la mur anuka ngas.’

¹¹ I maining, a balakut pa a lele larne, ‘Bel lar kas ting na nuka hanua na manah.’” Buk Song 95:7-11

¹² Na tastasikla, mulor tai alar mulo, sur gong tik o mulo a nuknukna ir mur a toltol laulau pa bel ir tortorot, pa ir han masik kusun e God, ning i laun.

¹³ Mulor warwara na harnangai artalai tetek mulo, ana pukpukakiarla rop ning di atongi mang “onone.” Mulor toli larning, sur gong a toltol laulau ir asongo pas tik o mulo, pa ir arakrakai alar a balana.

¹⁴ Dala o e Karisito, ning dalar tur rakrakai ana tortorot tuk ana araropna, arlar larning dala turpasi nating.

¹⁵ Larning di ka atong tari ting na Buk Tabu larne, “Onone ning mulo longor a elngena e God, gong mulo arakrakai a balamulo, arlar larning na tumtubumulola nating la toli, ning la gilam ris kusun iau.” Buk Song 95:7-8

¹⁶ Esi la ning la longor a elngena e God, ika la gilam ris? La rop ning e Moses i ben purum pas la mitimo e Ijip.

¹⁷ Esi la ning e God i balakut tetek la diat a bonot a rau? La ning la tol a toltol laulau pa la mat ting na hanua bel.

¹⁸ Esi la ning e God i lele mang bel lar kas ting na nuna hanua na manah? La ning bel la mur anuna warwara.

¹⁹ I maining dala oroi mang bel la tolsot pasi sur lar kas, anasa bel la tortorot.