Hibru 1 - Label

A Nat e God i itna kol tana angelola

¹ Nating ot e God i warwara ana elgen a propetla tetek na tumtubundala. I warwara larning ana galis a taem ana urmatana ngas.

² Ika ana ararop a pukakiarla ne, i warwara ana elgena e Natnalik tetek dala. E Natnalik ning i aslang pasi sur ir kibas a ututnala rop. Pa ana kuna e Natnalik, e God i akes a rakrakan hanua rop.

³ E Natnalik i talapor kol ana matatar ane God, pa i arlar momol ot o e God. Ana nuna warwara ning i rakrakai kol, i tong akes a rakrakan hanua rop sur ir titol taum wakak. I saran tar anuna lalaun, sur ir atotoh dala kusun a toltol laulaula rop. Pa ning ka tol arop tar a titol ne, i kes ting na ris a sot a kuna e God, a tnan king kol, saot na langit.

⁴ I maining e God i aitna pas e Natnalik sur ir itna kol tana angelola. I itna kol, arlar ana risana ning i itna kol tana risana a angelola. A risana ning e Tamana i saran tari tana.

⁵ Anasa e God bel i atongi tetek ta angelo larne, “U a Natuklik, pa onone ia ka hanot e Tamam.” Buk Song 2:7 pa bel i atongi otleng on ta angelo mang, “Iau e Tamana, pa i a Natuklik.” 2 Sam 7:14

⁶ Pa ning e God i sune sen a ningnigo na Natnalik ute na rakrakan hanua, i atongi ono larne, “I wakak ning a angelola rop ane God lar lotu teteki.” Lo 32:43

⁷ Pa i atongi ana nuna angelola larne, “I lingir anuna angelola sur lar arlar ana wuwu, a angelola ning la anuna tena titolla, i lingir la sur lar arlar otleng ana irnga na iah.” Buk Song 104:4

⁸ Ika i atongi o e Natnalik larne, “God, anuma keskes a king ir kes tikin pa bel ir rop. U sira warkurai anuma matanitu ana tostos a toltol.

⁹ U mang kol sur a tostos a toltol, pa u nget a toltol laulau. Ine a kamkamna ning e God, anuma God, i aslang pas u pa i saran tar a gasgas pa a hanrawai tam, ning i itna kol tana gasgas pa a hanrawai ning i sarani tetek na halalim.” Buk Song 45:6-7

¹⁰ Pa e God i atongi otleng tetek e Natnalik larne, “Leklek, ana turturkamna, u, u akes tar a kama rakrakan hanua, pa u akes a langit ana kum.

¹¹ Diar rop oros ka, ika u, ur kes tikin. Diar turai amon arlar ana kaen.

¹² Ur hin diau arlar ana kaen a polpol, ur keles diau arlar lar tik ning i keles sen a turai a kaen. Ika u, bel ur ries, pa num na raula bel ir rop.” Buk Song 102:25-27

¹³ E God bel i atongi otleng tetek ta angelo larne, “Ur kes te na sot a kuk, tuk ning ar tolsot pas anum na hirua sur lar kes nahaim.” Buk Song 110:1

¹⁴ A angelola rop la na ingun, ning la titol tetek e God. I sune sen la sur lar nangan a tarai, la ning ir alaun la.