2 Jon 1 - Label

¹ Iau e Jon, a ningnigo, a tumtumus tetek u, a hane ning e God i aslang pas u, pa na natnatum, ning a mang kol sur mulo ana momolna. Pa bel ia ka, mila rop otleng ning mila tasman a momolna.

² Mila mang sur mulo anasa ana momolna ning i laun ondala, pa ir kes tikin taum ondala.

³ A marmaris, a wakak a toltol pa a bal molmol miting ta e God a Tamandala pa e Iesu Karisito e Natnalik, ir kes taum ondala ning dala kes ana momolna pa dala mang artalai sur dala.

Dalar mang artalai sur dala

⁴ A gas kol ning a longori mang na natnatum la mur a momolna, arlar ana warkurai e Tamandala ka saran tari tetek dala.

⁵ Pa onone a nunung u, wan, sur dalar mang artalai sur dala. Bel a tumus ta tona warkurai tetek u. A warkurai ka ning dala longor tari nating ot.

⁶ A marmaris i manglarne: Dalar mur a warkurai ane God. Anuna warkurai, ning nating mulo ka longor tari, i manglarne, mulor laun ana marmaris.

Mulor tai alar mulo kusun a tena asasongola

⁷ A galis a tena asasongola ning la puai mang e Iesu Karisito bel i hanot a barsan momol, la ka han sarara te na rakrakan hanua. A ngas a taraila ning, la na tena asasongo, pa la na hiruala ane Karisito.

⁸ Mulor tai alar mulo sur gong mulo suah sen a utna ning mulo ka titol suri. Ika, mulor tur rakrakai sur mulor kibas pas anumulo na kidol a arlou.

⁹ La ning la han masik kusun a asasaerla ane Karisito pa bel la muri, e God bel i kes onla. Ika la rop ning la mur a asasaerla ne, a Tamandala pa e Natnalik dia kes onla.

¹⁰ Ning tik ir han tetek mulo anal asasaer ning bel i arlar ana asasaer o e Karisito, gong mulo gasgas pasi pa mulo ben kasi ana numulo na rumaila.

¹¹ Ning tik ir gasgas pasi, i harnangai ana nuna na laulau a titol.

A ararop a warwara

¹² A galis a utna ning ar tumusi tetek mulo, ika bel a mang sur ar tumtumus ana paka buk pa pen. Ika a nuki mang ar geren mulo, par awara mulo, sur a gasgas anundala ir itna kol.

¹³ Na natnat a tasimhane ning e God ka aslang pasi, la saran anunla marmaris tetek u.