Tite 3 - Mbede Lə Luba Kone Gə Sigi

¹ Ole mə njetakagəje tɔ̰y ar-je d-oso kul no njeko̰ dɔ dəwje gə cibi d-ila kuji dɔ njeko̰ ɓeje gə ɓo d-isi pɛrɛrɛ mba ɗa ne kula gə ɗa-ɗa gə may,

² kar d-o̰ dəwje yom-yom ang, gə ꞌto nje tɔsə tarje ang, d-a to njekula nuji naa gə je, d-a kul gə dəwje tɔ̰y gə kul ja yururu.

³ Mba kede ləw le sijee ja kara j-a gərə ne kara ang. J-a mbadə koso kul no Luba gə nəm, j-a ndəəm nəm, j-a to ɓərəje lə ɓoje gə darɔ gə gə mal neje dang-dang. Ja to gə njeməngo̰yje, gə nje ɗa məje, kəm njigi-si ang ngaɓa ja njigi naa ang gə yo gə nee tɔ.

⁴ Ngaa logə Luba gə njekaji-si kila ɗa may lə-a gə njigi lə-a gə ɗaga ɔji dɔ dəwje tɔ̰y,

⁵ ɗaa mba kula ɗa-si gə gadə-gadə ɓa n-aji ne si ang, ngaa to gə məmay lə-a gə n-togo-si ne ɗəw kuji gə sigi gə ngaɓa gə go Njil Njerɔsangə gə ar-si təbə gə sigi.

⁶ Luba ula Njil Njerɔsangə ɗəw gə lə Njekaji-si Jeju Kirisi ar-ɛ ɗusu mə-si tubu,

⁷ be ɓa, n-ɗa-si gə dəwje gə gadə-gadə gə go mənuji lə-a mba kar j-a təl to nje kuwa ndubaje ɗəw ne kunda mə dɔ gə lə-si ɔji dɔ təbə gə gə ndɔ gə ndɔ.

⁸ Tar gə m-pa nee le to tar gə tɔgərɔ, ɗaa may kar ore kəm-i kəne ndəng mba ndəji ne nje gə d-unda mə-je dɔ Luba gə mba kar ꞌɗa ne kulaje gə may gə kede-kede. Ye ɓa to ne gə may gə to kəm kar njetakagə ꞌɗa!

⁹ Ngaa ɔsə ma̰y tar mbə, gə tura gəl kuji, gə ma̰y tar gə ɔji dɔ torondu lə Moyiji rəw gə ɗangə, mba to neje gə baa gə asə la gə dəw ang.

¹⁰ Dəw gə ɓo aw ɗe gə tar kay naa horo njetakagə kirisije gə a ɓo n-ndəji-e gɔl kara, gɔl joo ɓa ɓo o ang nama ɔs-ɛ ngərəng gə ɗangə,

¹¹ kar-i ꞌgərə to gə, dəw gə to gə be le ndəəm ɗəw lə-a ngaɓa ɗa neɗa gə kṵra̰y, ila ne tar dɔ darɔ-ɛ gə ja.

Ɗudu tar ndəji

¹² Logə m-a kula Arətemas ose Tisikə ɓə lə-i nama ḭ gə tɔg-ɛ ꞌɗe inga-m mə ɓe gə Nikopolis mba mə ɓe gə nee ɓa m-njigi kar nay kul nday dɔ-m gə kəne.

¹³ May kar-i ꞌla gə Jenas gə to Njekunja kəm tar je gə Apolos gə maj-ɛ ɗəw mba gə lə-je mba kar ne gə d-aw ndo-e lal-je ang.

¹⁴ May kar njekar-sijee kara ndo ne kula ɗa gə may dɔ-je gə kede-kede mba kar ndɔ gə ne ce dɔ-je gə bus nama ꞌɗa ne, be ɓa kandə takagə lə-je a to ne.

¹⁵ Dəwje tɔ̰y gə d-isi sə-m nee na m-o-i m-ar-je. O nje gə ꞌnjigi-si gə ɗəw takagə gə ar-m. May kar mənuji lə Luba nay gə si tɔ̰y.