Tite 1 - Mbede Lə Luba Kone Gə Sigi

Pɔl tɔji rɔ-ɛ ngaɓa ɓar Tar gə May

¹ ꞌMa Pɔl, ngon njekula lə Luba ngaɓa njeka̰ykula lə Jeju Kirisi mba kar takagə lə nje gə Luba mbərə-je may ne pɛdə, ngaɓa ꞌgərə ne tar gə tɔgərɔ gə go kila kuji dɔ ne gə lə Luba.

² Gə mba kunda ne mə dɔ təbə gə a to gə ndɔ gə ndɔ, gə Luba gə tɔgərɔ uwa dɔ gɔl-ɛ nam ɓa ɗa dara gə nangə.

³ Tar gə Luba gə njekaji-si um ji-m gə le dɔ kar-ɛ asə ɗaa ye ja un ndu-e ar-m mba kar-m m-pa gə ɗaga.

⁴ Titə, ngon mə-m gə ɗəw takagə le-si naa gə kara baa: may kar Luba gə Bɔ je gə Jeju Kirisi gə njekaji-si d-ar-i mənuji gə ɗɛgɛgɛ.

Tar kulaje gə Titə a ɗa mə mbo̰ naa lə njetakagəje gə Kərɛd

⁵ ꞌMa m-iya̰-i mə ɓe gə Kərɛd mba kar-i ꞌgɔl kɛsə kulaje gə nay, cibi gə go ndu-m gə m-un m-ar-i le ɗaa kar-i ꞌmbərə dəwje unda-je gə ngatɔgəje mə ɓeboje gə kara kara,

⁶ dəw gə a to ngatɔgə le tar a kuwa dɔ-ɛ ang gə a ta jene kara baa ngaɓa ngan-ɛ d-a to njetakagəje gə pa nja-je a to gə maj-ɛ gə d-ila kuji ɓa.

⁷ May kar nje ka dɔ njetakagəje le to dəw gə tar uwa dɔ-ɛ ang mba n-nay to gə njengom ne lə Luba, gə n-a to nje ɗa gasəra ang, n-a to njewungu ang, n-a to mbə kodo ang, n-a to nje tɔsə tar ang nəm ɓa, n-a sangə nedɔji gə to ne rɔ kul ang,

⁸ ꞌne n-a to njekuwa mbaje, n-a njigi neɗa gə may, n-a to dəw gə gadə-gadə, n-a sangə rɔ-ɛ mba Luba ngaɓa n-a ko̰ dɔ darɔ-ɛ,

⁹ tar gə tɔgərɔ gə kəm ta ji joo gə ꞌtɔj-ɛ le n-a ngom to gə ngon kəm-e be, to gə be ɓa n-a kasə mba kula ne jingaw mə nje gə kɛm gə gə ɗəw netɔji gə gə dɔ gɔl-ɛ ngaɓa gə mba ndangə ne njema̰y tarje kila-je ne dana.

¹⁰ Tɔgərɔ ja, dəwje bula ꞌto njekula dɔje-je ang, ꞌto nje pa tar gə baaje gə nje kərə dəwje horo Jiibije gə.

¹¹ Be ɓa may kar ɔgə-je lo-e. ꞌTuji-je takagə lə njenujije gə mə kəy kəy gə neje gə kəm tɔji ang ja mba kinga ne ne dɔ ji gə to ne rɔ kul.

¹² Dəw kara horo-je gə to pajambərə lə-je ja pa na: Dəw mə ɓeje gə Kərɛd ꞌto njetar gə ɗəgərəje ja jaga-jaga, ꞌnay to to gə daje gə muu gə njekusa ngan mar-jeje, gə ꞌto njedabəje gə nekusa ja baa uwa mə-je.

¹³ Tar naji lə-a le to tar gə tɔgərɔ ja ɗaa gəl-e gə ne ɓa ꞌsiri-je gə maj-ɛ mba kar ꞌtɔgəje ne ɗəw takagə gə dɔ gɔl-ɛ,

¹⁴ cibi ɓa gə mba kar d-ɔsəje tar gə baa lə Jiibije ngərəng nəm ɓa mba kar d-udu ne mbi-je jigi dɔ torondu dəwje gə ꞌmbadə tar gə tɔgərɔ.

¹⁵ Ne tɔ̰y arə ngadə mba dəwje gə d-ar ngadə tɔ ngaa njeminaje gə nje məkədərəje le negərə lə-je gə kəji lə-je kara mina tɔ.

¹⁶ ꞌƊa rɔ-je to to gə dəwje gə gərə Luba be ngaa kula ɗa-je gə kṵra̰y ja d-a gərə-je ne. ꞌToje yɛm gə nje dɔ ngangəje ngaɓa d-asə ɗa ne gə may kara ang.