Romaindjé 9 - Mbede Lə Luba Kone Gə Sigi

IJIRAYƐL JE GƏ GƏL KUJIJE Luba gə dəw dɔ rɔ-ɛ

¹ M-pa tar gə tɔgərɔ mə Kirisi gə, m-ɗəgərə ang, Njil Njerɔsangə pa tar naj-ɛ mə kəji gə lə-m,

² mə-m gangə man to gə boy ngaɓa ɓəngərə-m ti mbidi gə kede-kede.

³ Mba m-njinga kar ꞌma ja ɓa kugu uwa-m ngaɓa kar ꞌma ja m-um naa gə Kirisi ang mba may lə ngan ko̰-m, njenujije lə-m gə ɗəw darɔ gə,

⁴ gə to Ijirayɛlje, gə Luba ja turu-je gə ngan-ɛ, gə rɔnduba lə-a, gə koneje, gə torondu, nepolo ngaɓa kuwa dɔ gɔl neje to kar-je,

⁵ gə bɔ-sijee-je, ngaɓa ɗəw gə lə-je gə darɔ gə ɓa Kirisi gə to dəw dɔ neje tɔ̰y ɗe ne, may kar ndu tɔr to dɔ Luba gə gə ndɔ gə ndɔ. Oyo!

⁶ Ə̰ə̰ə̰, tar lə Luba oso nangə baa ang. Mba dəwje tɔ̰y gə d-uji-je gəl ka Ijirayɛl gə ja ɓa to gə Ijirayɛlje ang,

⁷ ngaɓa dəwje tɔ̰y gə d-uji-je gəl Abəraham gə le, ꞌto ngan-ɛ ja tɔ̰y ang; ngaa ꞌpa na: Ɗəw gə lə Ijagə ja gəl kuji dəwje bula d-a ce kəne ɗaa d-a ɓar-je gə ri-i

⁸ mə tar gə nee le na: Nganje gə ɗəw darɔ gə ɓa ꞌto gə nganje lə Luba ang, ngaa nje gə d-uji-je gə go ɗəw gə Luba uwa dɔ gɔl-ɛ ja ɓa ꞌtura-je gə gəl kuji lə-a.

⁹ Mba tar gə ꞌpa d-uwa ne dɔ gɔl ne le ɓa nee: Dɔ kar a to to gə mar-ɛ nee ɗaa, m-a ɗe ngaɓa Sara a kuji ngon gə jingaw.

¹⁰ Ə̰ə̰ə̰, ye ja go kara baa ang, ngaa Rebeka kara uji gə ka-sijee Ijagə ja kara baa;

¹¹ mba logə nganje le d-uji-je ang ja ɓi ngaɓa ꞌgərə ne gə kṵra̰y gə ne may ang ɓi ja ngaa mba kar ne gə Luba ɔji mba ɗa le aw ne lo-e gə,

¹² ngaɓa gə go kula ɗaje ang ngaa gə mə njigi lə nje ɓar-je ja, be ɓa ꞌpa d-ar Rebeka na: ꞌYe gə buba a to ngon njekula lə ꞌye gə ngon,

¹³ be ɓa ꞌɗa mə mbede gə na: M-njigi Jakobo Ɗaa m-njigi Esaw ang gə kɔrɔ.

Tar gə ɔji dɔ dəwje gə ꞌgərə Luba ang

¹⁴ J-a pa na ɗi wa? Luba to njebuguru wa? Be ang baa!

¹⁵ Mba n-pa n-ar Moyiji na: M-a ɗa məmay gə dəw gə mə-m njigi ɗa sə-a məmay, ngaɓa m-a ko kəmtondoo gə dəw gə mə-m njigi ko kəmtondoo lə-a.

¹⁶ Be ɓa ɔji go mə njigi lə dəw ang nəm ɔji dɔ singa gə n-unda dɔ mar-ɛ gə ang, ngaa gə go məmay lə Luba.

¹⁷ Mba mbede pa ar Parawo̰ na: M-o som ja ɓa m-un-i m-unda-i mba tɔji ne singamongə lə-m ngaɓa gə mba kar ri-m ta ne lo dɔ nangə nee tɔ̰y.

¹⁸ Be ɓa, n-ɗa məmay gə na-na kara gə mə njigi lə-a ꞌne ja, ngaɓa na-na kara n-ar m-e kədərə gə go mə njigi lə-a ꞌne ja tɔ.

¹⁹ A pa kar-m na: N-nḭ gə jingaw mba ɗi cibi wa? Mba na ɓa asə kila karəw gə mə njigi lə-a wa?

²⁰ ꞌI, ꞌto na ja ɓa ꞌma̰y gə Luba tar wa? Jo asə pa kar nje kuba-a na: Mba ɗi ɓa uba-m to gə be wa ang.

²¹ Nje kuba jo le to ꞌɓəə ənji, ɗaa ənji gə njekara gə n-mbo̰y nee ja, n-asə kuba ne bay ɗɔy dəwje ngaɓa kar ɗa ne kulaje gə baa nəm ang wa?

²² Ngaɓa to gə ɓo Luba njigi tɔji wungu lə-a ngaɓa gə tɔji singamongə lə-a, ɓa ore ur-e ndəng dɔ nje gə d-asə kar wungu lə-a ɗe dɔ-je gə ngaɓa tuji-je.

²³ Ngaɓa mba kar ꞌgərə ne nebaw riɓar lə-a gə ɔji dɔ bayje gə kar məmay gə gə n-gɔl kede mba rɔnduba.

²⁴ Sijee gə n-ɓar-si horo Jiibije ja kara baa ang, ngaa horo dəwje gə ꞌgərə Luba ang ja cibi,

²⁵ to gə n-pa ne mə mbede gə lə Oje na: Nje gə ꞌto dəw mə ɓeje lə-m ang ja, m-a ɓar-je dəw mə ɓeje lə-m, Ngaɓa gəl kuji gə m-njig-e ang ja m-a ɓar-ɛ ye gə m-njig-e ya̰;

²⁶ Ngaɓa lo gə njekara gə ꞌpa kəne d-ar-je na: ꞌToje dəw mə ɓeje lə-m ang! D-a ɓar-je kəne gə ngan lə Luba gə nje kisi kəm baa.

²⁷ Ejay pa k-ɛ ɓolong ər kara gə, ɔji dɔ Ijirayɛl na: Logə kɔr ngan Ijirayɛlje a to to gə ꞌnangəra̰ gə ta babo gə be le, Kɛsə-je ja baa d-a kaji.

²⁸ Mba Mbayɓe a kar tar lə-a aw lo-e yɛrɛrɛ ngaɓa gə tɔg-ɛ baa dɔ nangə nee.

²⁹ Ngaɓa, to gə Ejay pa ne kede na: To gə ɓo Mbayɓe lə njeɗɔje ḭya̰ gəl kuji kara ar-si ang nama, J-a təl to to gə Sɔdom, J-a kḭ ta naa gə Gɔmɔr be.

Ijirayɛl je gə tar gə ɔji dɔ takagə

³⁰ Ɗi ɓa ja pa ɓi wa? Dəwje gə to Jiibije ang gə ꞌsangə go gadə-gadə ang ja, d-inga-a, gadə-gadə gə ɗe gə go takagə,

³¹ ngaa Ijirayɛl gə sangə torondu ɓa mba to ne gadə-gadə le inga-a ang.

³² Mba ɗi wa? Mba Ijirayɛl sangə to gadə-gadə gə go takagə ang, ngaa ɗəw kula ɗaje gə. Be ɓa d-ar dɔ-je dɔ ne gə to jigi no-je gə,

³³ to gə ꞌɗa ne mə mbede gə na: Oje, m-ila kɔr ər tuga Siyo̰ gə, gə Jigi kar tuga koso, Ngaa ɓo dəw gə ta kag-ɛ nama rɔ kul a kuwa-a ang.