Romaindjé 8 - Mbede Lə Luba Kone Gə Sigi

Tar uwa dɔ nje gə d-um naa gə gə Jeju Kirisi ang

¹ Ɓisine ɗaa tar kara kara uwa dɔ nje gə d-um naa gə gə Kirisi Jeju ang.

² Mba torondu lə Njil gə ar təbə dəw andə ne naa gə gə Kirisi Jeju le ɔr-m ji torondu gə lə neɗa gə kṵra̰y gə ngaɓa kar yo gə.

³ Ne gə torondu asə ɗa ang, mba mbɔr-ɛ lə darɔ ɓa Luba ɗa, ula Ngon-e ja ar-ɛ un darɔ gə ta naa gə njeneɗa gə kṵra̰y be, ila ne tar dɔ neɗa gə kṵra̰y gə darɔ gə,

⁴ mba kar neɗa gə gadə-gadə gə torondu dəji le uy ne bɛm mə-sijee gə ja nja ɗəw darɔ gə ang, ngaa ɗəw Njil gə.

⁵ Mba, nje gə d-aw kəm baa gəl darɔ gə le, ꞌnja gə go neje lə darɔ, ngaa nje gə Njil o̰ dɔ-je ɗaa ꞌnja go neje gə ɗəw Njil gə tɔ.

⁶ Nja gə go ɓo neje gə darɔ gə to yo, nja gə go ɓo neje lə Njil le to gə təbə, gə ɗɛgɛgɛ.

⁷ Mba ɓo ne lə darɔ le to njeba̰a̰ lə Luba mba darɔ ila kuji dɔ torondu gə lə Luba ang, ɓa kasə ja kara n-asə ang.

⁸ Be ɓa nje gə darɔ o̰ dɔ-je le, d-a kasə ta kəm Luba ang.

⁹ Sisəy le ɗaa, darɔ o̰ dɔ-si ang, nga Njil ngaɓa o̰ dɔ-si, to gə ɓo tɔgərɔ ja Njil Luba isi mə-si gə. To gə ɓo dəw gə Njil Kirisi godo m-e gə nama to nje kar Kirisi ang baa.

¹⁰ Ngaa to gə ɓo Kirisi ga̰ mə-si gə nama darɔ le uy ɗəw neɗa gə kṵra̰y gə tɔgərɔ ja, ngaa njil to gə təbə ɗəw to gadə-gadə gə.

¹¹ Ngaɓa to gə ɓo Njil gə nje ndol Jeju horo nje gə d-uy gə le isi mə-sisəy gə nama, ꞌne gə nje ndol Kirisi Jeju horo nje gə d-uy gə nee le n-a kar darɔ-sisəy gə a kuy le inga təbə ɗəw gə lə Njil-e gə isi mə-sisəy gə le.

¹² Be ɓa, ngan ko̰-mje, ɓangə to dɔ-si gə ja, nga to ɓangə lə darɔ ɓa gə mba kar-si ja ɗa ne mə njigi lə darɔ ang ngaa.

¹³ To gə ɓo awje kəm baa ɗəw darɔ gə nama a kuyje, ngaa to gə ɓo ꞌtujije kula ɗaje lə darɔ pugudu ɗəw Njil gə nama, a kawje kəm baa,

¹⁴ mba dəwje tɔ̰y gə Njil lə Luba ɔr no-je le ꞌto ngan lə Luba.

¹⁵ Ngaɓa sisəy le ingaje njil gə uwa-si gə ɓərə ɓa a ɓəəlje gə ɓəəl ja jaga-jaga ang, ngaa ingaje Njil gə təl-si gə ngan lə Luba, gə ɗəw gə lə-a ɓa j-uru ne ꞌkuwi na: Aba! Bɔy!

¹⁶ Njil nee le ja pa mə kəji gə lə-si ar-si to gə j-a to ngan lə Luba.

¹⁷ Be ɓa, to gə ɓo j-a to ngan-ɛ nama j-a to nje kuwa nendubaje tɔ, nje kuwa nendubaje lə Luba, ngaɓa nje baa kuwa nendubaje gə Kirisi, mba to gə ɓo tɔgərɔ ja j-o sə-a ꞌməsərə naa gə nama, d-a kula rɔnduba dɔ-si gə sə-a naa gə.

Rɔnduba gə a ɗe

¹⁸ M-o to gə ko ꞌməsərə lə-si gə ɓogəne le, a kasə naa gə rɔnduba gə d-a kila gə ɗaga kar-sijee gə dɔ ndɔ gə bara gə ang.

¹⁹ Mba nekundaje ꞌngina kəgəgə kar Luba kila ngan-ɛ gə ɗaga.

²⁰ Mba nekundaje le d-umje gəl singa gə gə to gə ne gə baa, gə go mə njigi lə-je ang, ngaa gə go mə njigi lə nje kum-je gəl-e gə ja baa, be kara məkunda ga̰,

²¹ nekundaje nee le, dɔ ndɔ-ɛ nama d-a kɔr-je ji singa gə nje kuwa-je gə ɓərə dan tuji gə mba kar dɔ-je a to doy dan rɔnduba gə naa gə kara baa gə nganje lə Luba.

²² Mba j-a gərə to gə saar ɓisine, dɔ nangə nee tɔ̰y ja suum ngaɓa o ꞌməsərə to to gə jene gə ndo to-e be.

²³ To gə dɔ nangə nee gə kar-ɛ baa ang, ngaa sijee gə j-inga Njil gə dɔngɔr nekarə baa le, sijee ja kara j-a suum mə-si gə kəy, j-a ngina ne dɔ ndɔ gə Luba a kila ne si gə ɗaga gə ngan-ɛ ngaɓa kar darɔ-sijee inga ne dɔ to doy.

²⁴ Mba j-inga kaji ja ngaa gə go nekunda mə, to gə dəw o ne nam ɓa unda m-e kəne nama to gə nekunda mə ang baa. Ne gə dəw o nda̰ nam le a kunda m-e kəne cibi wa?

²⁵ Ngaa to gə ɓo j-unda mə-si dɔ ne gə j-o ang gə nama may kar j-uwa gədərə dɔ ngina-a gə.

²⁶ Ngaɓa to gə be ja tɔ ɓa Njil ɗe la ne gə si dɔ mbɔr-ɛ gə lə-sijee, mba j-a gərə dəji Luba gə go ɗəb-e ang. Ngaa Njil gə darɔ-ɛ ja dəji Luba mba-si gə tar gə dəw asə pa ang;

²⁷ ngaɓa ꞌne gə nje njenga̰ mə dəwje le n-gərə ne gə Njil njigi dəji, mba Njil le ɗaa dəji Luba mba njerɔsangəje gə go ɗəb-e gə Luba njigi.

²⁸ Ngaɓa j-a gərə to gə neje tɔ̰y ꞌmbo̰ naa kara baa ɗa ne mba may lə nje gə ꞌnjigi Luba, gə nje gə n-ɓar-je gə go ɗəw gə ꞌne ja n-gɔl.

²⁹ Mba nje gə n-gərə-je kede nam le, n-gɔl kede mba kar ꞌta naa gə ndaji Ngon-e, kar Ngon-e nee le to ne ngon dəər no ngan ko̰ naaje gə bula.

³⁰ Ngaɓa nje gə n-gɔl mba-je kede nam le, n-ɓar-je tɔ, ngaɓa nje gə n-ɓar-je le, n-tura-je gə dəwje gə gadə-gadə, cibi nje gə n-tura-je gə dəwje gə gadə-gadə le, n-ula rɔnduba dɔ-je gə tɔ.

³¹ Tar ɗi ɓa j-a pa dɔ-ɛ gə cibi wa? To gə ɓo Luba ila gəl-sijee gə ɗaa na cibi ɓa a kasə kal dɔ sijee wa?

³² ꞌNe gə Ngon-e ja ɓi ɓa n-ɔr kəm-e ang, ngaa n-un-e mba dəwje tɔ̰y nee le ja n-a kasə kar-si ne tɔ̰y sə-a ɗəw mənuji gə ang wa?

³³ Na ɓa a kila tar dɔ nje gə Luba mbərə-je gə wa? Luba ja to nje kar dəw to gadə-gadə!

³⁴ Na ɓa a kar tar uwa dɔ-je wa? Kirisi Jeju le ɓa to dəw gə uy, cibi ɓa ndol, aw isi dɔ ji kɔl Luba gə, aw dəji Luba mba sijee!

³⁵ Na ja a kɔrə sijee mə njigi gə lə Kirisi wa? ꞌMəsərə, ose kar gə gəd gədə, ose nekəmandoo, ose ɓo, ose kaw kudu dum, ose ne gə a ce yo, ose kiya bayi wa?

³⁶ To gə ꞌɗa ne mə mbede gə na: Mba tar lə-i ɓa j-o ne yo gə kəm-si nda̰-nda̰ gə ndɔ-ndɔ. ꞌƊa-si to to gə badəmje gə d-aw gə je gə lo tɔl-je gə be.

³⁷ Ngaa dan neje gə nee tɔ̰y le, sijee j-a to njecɛdə ɗɔje gə to ɓəəl ɗəw gə lə nje njigi-si.

³⁸ Mba m-gərə gə maj-ɛ to gə yo ang nəm, təbə ang nəm, anjije ang nəm, njeko̰ dɔ loje ang nəm, ndɔ gə ɓogəne ang nəm, ndɔ gə bara ang nəm,

³⁹ singamongəje ang nəm, nekundaje gə dara ang nəm, nekundaje gə nangə nee ang nəm, nekunda gə ɗa-ɗa kara a kɔr sijee mə njigi gə Luba njigi sijee ɗəw gə lə Mbayɓe lə-sijee Kirisi Jeju le ang.