Romaindjé 7 - Mbede Lə Luba Kone Gə Sigi

Dɔ to doy lə njetakagə Kirisi no torondu gə

¹ Ose ꞌgərə-je ang wa? Ngan ko̰-mje. M-pa tar m-ar dəwje gə ꞌgərə torondu, to gə dəw aw kəm baa ɓi le torondu o̰ dɔ-ɛ ja jaga-jaga ang wa?

² Be ɓa, jene gə ta ngaw le, ɓo ngaw le aw kəm baa ɓi nama torondu tɔ-je gə ngab-ɛje naa gə jaga-jaga; ngaa to gə ɓo ngaw le uy nama torondu gə tɔ-je gə ngab-ɛje naa gə le o̰ dɔ-ɛ ang ngaa.

³ To gə ɓo ngab-ɛje aw kəm baa ɓi ɓa n-təl to jene lə dəw gə ɗangə nama, d-a ɓar-ɛ nje ɓogo lo to, ngaa to gə ɓo ngab-ɛje uy ɗɔdə nama dɔ-ɛ to dɔy no torondu gə, ngaɓa ɓo n-təl, n-to jene lə dəw gə ɗangə nama n-to nje ɓogo lo to ang.

⁴ Ngan ko̰-mje, sisəy kara ɗəw kara baa d-ar-si uyje ɗəw torondu gə gə go darɔ Kirisi, mba təl ꞌtoje ne nje kar dəw gə ɗangə, nje kuy ɓa ndol horo nje gə d-uy gə, mba kar osoje kandə ɔji dɔ Luba.

⁵ Mba kede, logə j-a nay darɔ gə ɓi le, ɓo neɗa gə kṵra̰y ɗa kula rɔ-si gə ɗəw gə lə torondu ngaɓa kar j-oso kandə ɔji dɔ yo.

⁶ Ngaa, ɓisine ɗaa, dɔ sijee to doy no torondu gə, mba j-uy ɗəw gə lə ne gə uwa sijee ɓərə gə, mba kar j-a ɗa kula gə ji-a gə sigi gəl Njil gə ngaa ɓo gə ji-a gə ləw gəl torondu ang.

Torondu ɔr dəw ji neɗa gə kṵra̰y gə ang

⁷ J-a pa na ɗi wa? Torondu to neɗa gə kṵra̰y wa? Jagə ang! Ngaa, ɗəw gə lə torondu ja baa ɓa m-gərə ne neɗa gə kṵra̰y. Mba, torondu gə na: ꞌI a ɗa kəm kə̰y ang le, to gə ɓo torondu pa ang nama m-a gərə ne gə ri-a na kəm kə̰y ang baa.

⁸ Ngaɓa neɗa gə kṵra̰y inga ɗəw uji ne ɓo neje dang-dang mə-m gə ɗəw gə lə ndu, mba torondu godo nama neɗa gə kṵra̰y uy gə kuy ja ngaa.

⁹ Kede ləw, gə torondu godo le, m-aw kəm baa ja, ngaa logə ndu ɗe ngaɓa neɗa gə kṵra̰y təl təbə,

¹⁰ ɗaa ꞌma m-uy, ndu gə a kar m-inga təbə le ɗaa, təl ar-m m-inga yo.

¹¹ Mba neɗa gə kṵra̰y inga ɗəw ərə-m ne ɗəw gə lə ndu, ngaɓa ɗəw gə lə neɗa gə kṵra̰y ja m-inga ne yo.

¹² Be ɓa torondu to gə losang-ɛ, ngaɓa ndu kara to gə losang-ɛ, to gadə-gadə ngaɓa may nəm.

¹³ Ne gə may le cibi ɓa təl gəl yo-m wa? Jagə ang! Ngaa neɗa gə kṵra̰y ja, mba neɗa gə kṵra̰y le un ne gə may ngaɓa ar təl gəl yo-m, mba kar ɗəw gə lə ndu ja kar dəw gərə ne to gə neɗa gə kṵra̰y le ɓar mii gə kede.

¹⁴ Be ɓa j-a gərə to gə torondu le to ne gə ɗəw njil gə, ngaa ꞌma m-to dəw, ꞌɗabə-m d-ar neɗa gə kṵra̰y.

¹⁵ Mba ne gə m-ɗa le ɗaa m-gərə gəl-e ang. Ne gə m-njigi ɗa nama m-ɗa ang, ngaa ne gə m-njigi ang gə kɔrɔ ja ɓa m-ɗa.

¹⁶ Ngaa, to gə ɓo ne gə mə-m njigi ang ɓa m-ɗa nama m-tɔji to gə m-njigi go tar gə lə torondu ngaɓa m-təl m-gərə to gə torondu may gə may.

¹⁷ Ɓisine to gə ꞌma ɓa m-ɗa ne gə nən le ang ngaa tɔgərɔ ɗaa to neɗa gə kṵra̰y gə to mə-m gə.

¹⁸ Mba m-gərə: m-njigi pa to gə darɔ-m ꞌma gə ja, ne gə may godo kəne. Mba mə-m njigi ɗa may ja ngaa m-ɗa ang.

¹⁹ May gə mə-m njigi ɗa le m-ɗa ang, ngaa ne gə kṵra̰y gə m-njigi ɗa ang ɓa m-ɗa.

²⁰ Ngaa, to gə ɓo m-ɗa ne gə m-njigi ang nama to ꞌma ɓa m-ɗa ang, ngaa neɗa gə kṵra̰y gə ɗa ɓe mə-m gə.

²¹ Kəm-m unja ar-m m-gərə ɗəw gə lə pa ɗ-ɛ gə nee to gə ꞌma gə m-njigi ɗa ne gə may le, ne gə kṵra̰y ja baa ɓa m-asə ɗa.

²² Mba rɔ-m ndɔɔ dɔ torondu gə lə Luba dɔ ɓəngərə-m gə kəy,

²³ ngaa mə bar kəm rɔ-mje gə ɗaa torondu gə ɗangə ɓa m-o kəne, ɗa ɗɔ gə torondu kəji negərə lə-m ngaɓa uwa-m gə ɓərə lə torondu kar neɗa gə kṵra̰y gə to mə bar kəm rɔ-mje gə.

²⁴ Nekəmandoo gə to dɔ-m gə! Na ɓa a ta-m ji darɔ gə a kuy gə nee wa?

²⁵ Oyo ar Luba ɗəw gə lə Jeju Kirisi, Mbayɓe lə-sijee! Be ɓa, gə go kəji negərə lə-m ɗaa m-to ɓərə kar torondu lə Luba, a ɓo ɗəw darɔ gə ɗaa ɓərə lə torondu kar neɗa gə kṵra̰y.