Romaindjé 6 - Mbede Lə Luba Kone Gə Sigi

NJETAKAGƏ GƏ GADƏ-GADƏ TA KƏM LUBA Mənuji ɔr kula ɓərə lə neɗa gə kṵra̰y gɔsə dəw gə

¹ Ja pa na ɗi ja wa? Se j-a nay dan neɗa gə kṵra̰y gə mba kar mənuji ɔsə ne kudu naa wa?

² Jagə ang! Sijee gə j-uy ɗəw neɗa gə kṵra̰y gə nam le, j-a təl kisi kəm baa dan neɗa gə kṵra̰y gə to gə ban wa?

³ ꞌGərə-je ang wa? Sijee tɔ̰y gə ꞌɗa-si batɛm ɗəw gə lə Kirisi Jeju le, j-uy sə-a naa gə kara baa ɗəw batɛm gə.

⁴ ꞌDubu-si sə-a naa gə kara baa ɗəw batɛm gə, mba kar to gə Kirisi uy ɓa ndol ne horo nje gə d-uy gə ɗəw rɔnduba gə lə Bɔ dəwje le, ɗəw kara baa kar-sijee kara j-a nja ne ɗəw kisi kəm baa gə sigi tɔ.

⁵ Mba to gə ɓo ja ta sə-a naa gə ɗəw kuy gə lə-a nama ja ta sə-a naa gə ɗəw kuy ɓa ndol gə lə-a tɔ;

⁶ j-a gərə-je to gə pa nja lə-si gə ləw le ꞌɓər-e sə-a kagə dəsə gə, mba kar darɔ gə neɗa gə kṵra̰y kəne nee le tuji ne ngaɓa mba kar j-a to ne ɓərəje lə neɗa gə kṵra̰y ang ngaa;

⁷ mba dəw gə uy le d-ɔr kula ɓərə lə neɗa gə kṵra̰y gɔb-e gə ngaa.

⁸ Ngaa to gə ɓo j-uy gə Kirisi nama j-a ta kagə to gə j-a kisi sə-a kəm baa tɔ,

⁹ mba j-a gərə to gə Kirisi gə ꞌndol-e horo nje gə d-uy gə le a kuy ang, yo o̰ ɓe dɔ-ɛ gə ang.

¹⁰ Mba kuy gə n-uy le, n-uy mba neɗa gə kṵra̰y gɔl kara ja gə dɔbo̰, ngaɓa ɓisine gə n-isi kəm baa kara, n-isi kəm baa ɔji dɔ Luba.

¹¹ Be ɓa, sisəy ja kara, may kar oje rɔ-si to gə uyje ɗəw neɗa gə kṵra̰y gə, ɗaa isije kəm baa ɔji dɔ Luba ɗəw gə lə Kirisi Jeju.

¹² Ar-je neɗa gə kṵra̰y o̰ ɓe dɔ darɔ-si gə a kuy le ang ngaa mba a ɗa kar ilaje ne kɔji dɔ kəm kə̰y gə lə-a ang.

¹³ Uwaje bar kəm rɔ-sijee ꞌɗa-je ne neɗa gə kṵra̰y ang, gə ne ɗɔ gə kar neɗa gə dɔ buguru ang; ngaa unje darɔ-sisəy ja ar-je Luba, to gə nje gə d-uy ɓa ꞌtəl d-isi kəm baa be, unje bar kəm rɔ-sijee ar-je Luba, gə ne ɗɔ kar neɗa gə gadə-gadə.

¹⁴ Neɗa gə kṵra̰y a dum dɔ-si ang, mba isije gəl torondu gə ang, ngaa gəl mənuji gə.

¹⁵ Ɗi cibi wa! J-a ɗa-je neɗa gə kṵra̰y mba kisi gə j-isije gəl torondu gə ang ngaa j-isi gəl mənuji gə wa? Jagə ang!

¹⁶ ꞌGərəje ang wa? Logə unje rɔ-si ilaje mə ji dəw gə gə ɓərə lə-a mba kila ne kɔji dɔ-ɛ gə nama, ꞌtoje ɓərəje lə dəw gə ilaje kuji dɔ-ɛ gə nee le, gə kar neɗa gə kṵra̰y gə ce yo, ose kila kuji gə ce neɗa gə gadə-gadə gə.

¹⁷ Ngaa, oyo ar Luba, kede le ꞌtoje ɓərəje lə neɗa gə kṵra̰y ja ngaa ilaje kuji gə dɔ ɓəngərə-si ja tɔ̰y ngaɓa ꞌnjaje ne gə go ji ne gə ꞌtɔji-si le ja tɔ.

¹⁸ D-ɔr sisəy ji neɗa gə kṵra̰y gə le ɗaa, ꞌtəl ꞌtoje ɓərəje lə neɗa gə gadə-gadə ngaa.

¹⁹ M-pa tar ji dəwje mba darɔ-si mbɔr-ɛ gə mbɔr-ɛ. Ɗəw kara baa to gə unje bar kəm rɔ-sijee gə ɓərə lə ne gə mina gə neɗa gə dɔ buguru saar ꞌce-je ne dɔ ngang gə, be ɓa ɓisine ɗaa may kar unje bar kəm rɔ-sijee gə ɓərə lə neɗa gə gadə-gadə, mba ce ne dɔ sangə rɔ gə.

²⁰ Mba, logə ꞌtoje ɓərəje lə neɗa gə kṵra̰y le, dɔ-si to doy no neɗa gə gadə-gadə gə.

²¹ Kula ɗa sisəy le ɗi ɓa ingaje kəne wa? Ɓisine ɗaa kula ɗa si to ne rɔ kul, mba a tɔl t-ɛ dɔ yo gə.

²² Ngaa ɓisine, d-ɔr-si ji neɗa gə kṵra̰y gə ɗaa ꞌtoje ɓərəje lə Luba, kula ɗa sisəy ce gə sangə rɔ ngaɓa a ce dɔ təbə gə gə ndɔ gə ndɔ gə.

²³ Mba kuga lə neɗa gə kṵra̰y to yo; ngaa nekarə baa lə Luba to təbə gə gə ndɔ gə ndɔ ɗəw gə lə Mbayɓe lə-sijee Kirisi Jeju.