Romaindjé 5 - Mbede Lə Luba Kone Gə Sigi

Neje gə tɔji to gadə-gadə ɗəw takagə gə

¹ Mba ꞌtura si gə dəwje gə gadə-gadə ɗəw takagə gə le ɗaa, ɗɛgɛgɛ to horo-sijee gə gə Luba ɗəw gə lə Mbayɓe lə-si Jeju Kirisi;

² mbɔr dɔ-ɛ ꞌne ɓa gə go takagə ɗaa j-inga ne mənuji gə j-ar kəne njang, ngaɓa j-unda mə-si dɔ rɔnduba gə Luba a kar-si j-inga sə-a gə gə rɔləl.

³ Cibi ɓa, le dan ꞌməsərəje gə ja kara sijee j-a ɗa rɔləl, mba j-a gərə to gə ꞌməsərə uji kuwa gədərə,

⁴ kuwa gədərə uji kar njang dan nena gə, ngaɓa kar njang dan nena gə uji kunda mə,

⁵ ngaɓa, kunda mə ɗa nerɔkul ang, mba Njil Njerɔsangə gə d-ar-si le, ar njigi lə Luba ta mə-si ya̰-ya̰.

⁶ Mba, logə sijee j-a to nje tɔgə godoje ɓi ja, dɔ kar asə ɗaa Kirisi uy mba nje ɓəəl Luba angje.

⁷ To kədərə ya̰ kar dəw a kuy mba dəw gə gadə-gadə; bayɛ̰ dəw a kuwa rɔ-ɛ gə jingaw kuy mba dəw gə may.

⁸ Ngaa, ɗəb-e gə nee ɓa Luba tɔji ne njigi gə n-njigi sijee, logə j-a to njeneɗaje gə kṵra̰y baa ɓi ja, Kirisi uy mba-si.

⁹ Ngaɓa mba ɓisine ꞌtura sijee gə dəwje gadə-gadə ɗəw məs-e gə le ɗaa, n-a ta-sijee ta wungu gə lə Luba ja tɔ.

¹⁰ Mba to gə ɓo, j-a to njeba̰a̰je lə Luba ɓa ɓo j-a təl j-um sə-a naa gə ɗəw kuy gə lə Ngon-e nama, ɗəw gə j-um ne sə-a naa gə le ja tɔ j-a kinga ne kaji ɗəw təbə gə lə-a.

¹¹ Cibi ɓa, sijee j-uwa Luba j-ɔsə ne rɔ-si ɗəw gə lə Mbayɓe lə-sijee Jeju Kirisi, gə mbɔr dɔ-ɛ ɓa j-um ne naa gə gə Luba.

Adam je gə Jeju

¹² Gəl-e gə nee ɓa, ɗəw kara baa to gə neɗa gə kṵra̰y andə dɔ nangə nee ɗəw gə lə dəw kara baa, ngaɓa ar neɗa gə kṵra̰y ɗe gə yo, ɗaa to gə be ja tɔ ɓa yo o̰ ne ɓe dɔ dəwje gə tɔ̰y, mba dəwje tɔ̰y ja ꞌɗa neɗa gə kṵra̰y,

¹³ mba saar ɓa kar torondu ɗe le, neɗa gə kṵra̰y andə dɔ nangə nee nam ngaɓa torondu ga̰ ja ɓa d-a gangə ne tar dɔ neɗa gə kṵra̰y ang.

¹⁴ Ngaa, yo un kud-e dɔ Adam gə nu ja o̰ ɓe saar ce ne dɔ Moyiji gə, ce ne dɔ nje gə ꞌɗa neɗa gə kṵra̰y to to gə kar Adam gə to gə kal tar le ang. Adam gə to ndaji dəw gə a ɗe le.

¹⁵ Ngaa, ne mənuji gə d-ar baa le asə naa gə kal tar ang, mba to gə ɓo kal tar lə dəw kara baa ɓa dəwje d-uy ne nama mənuji lə Luba bo unda kal tar, ngaɓa nekarə baa gə ɗe ɗəw gə lə dəw kara baa, Jeju Kirisi mba dəwje bula le to ɓəəl ya̰ ja cibi.

¹⁶ Nekarə baa gə nee le asə naa gə neɗa gə kṵra̰y gə dəw kara baa ɗa le ang. Mba gangə tar gə ore go kal tar gə gɔl kara le ɗa ar tar uwa dɔ dəw, ngaa ne mənuji gə ore go kal tarje bula ɗa ar ꞌtura ne dəw gə dəw gə gadə-gadə.

¹⁷ To gə ɓo mba kal tar lə dəw kara baa ɓa yo o̰ ne ɓe ɗəw gə lə-a, ngaa ɓədə ɓa nje gə d-inga mənuji gə nekarə baa kar gadə-gadə gə al dɔ lo d-a ko̰ ɓe dan təbə gə ɗəw gə lə Jeju Kirisi gə gə kar-e ne wa?

¹⁸ Be ɓa, kal tar gə kara ja tar uwa ne dɔ dəwje tɔ̰y, ɗəw kara baa ja tɔ ɓa neɗa gə gadə-gadə kara baa ja tura dəwje tɔ̰y gə dəwje gə gadə-gadə ngaɓa ar dəwje tɔ̰y d-aw ne kəm baa.

¹⁹ Mba to gə kal tar lə dəw kara baa ja ɗa ar dəwje bula ꞌto ne njeneɗaje gə kṵra̰y le, ɗəw kara baa kila kuji lə dəw kara baa ja ɗa ar dəwje bula d-a təl to ne dəwje gə gadə-gadə.

²⁰ Torondu ce mba kar kal tar ba̰y ne gə kede, ngaa lo gə neɗa gə kṵra̰y ba̰y kəne nama mənuji bula kəne al dɔ lo.

²¹ Be ɓa mba, to gə neɗa gə kṵra̰y o̰ ɓe ɗəw gə lə yo le, to gə be ja tɔ ɓa mənuji o̰ ɓe ɗəw gə lə neɗa gə gadə-gadə mba təbə gə gə ndɔ gə ndɔ ɗəw gə lə Mbayɓe lə-sijee Jeju Kirisi tɔ.