Romaindjé 4 - Mbede Lə Luba Kone Gə Sigi

To gadə-gadə gə ɗəw takagə to to gə mbede pa

¹ Ɗi ngaa j-a pa ɔji dɔ Abəraham, ka-sijee gə ləw ɗəw darɔ gə le wa? Ne gə ban ɓa n-inga wa?

² To gə ɓo d-o Abəraham gə dəw gə gadə-gadə gə kula ɗ-ɛje nama, to ne kɔsə rɔ lə-a ja. Ngaa, no Luba gə le, to gə bənəng ang baa.

³ Mba, mbede pa na ɗi wa? Abəraham ta kagə Luba, ɗaa ye ja ꞌtura-a ne gə dəw gə gadə-gadə.

⁴ Be ɓa dəw gə ɗa kula le d-o lar kuga-a gə ne mənuji ang baa, ngaa to ne gə ɔji dɔ-ɛ.

⁵ Kar dəw gə kula ɗ-ɛ godo ngaa takagə Luba gə o dəw gə ɓəəl-e ang gə dəw gə gadə-gadə nama gə go takagə lə-a ja d-a tura ne gə dəw gə gadə-gadə.

⁶ Ɗəw kara baa to gə Dabidi pa ne tar nokarə gə ɔji dɔ dəw gə Luba o-e gə dəw gə gadə-gadə lal kula ɗaje na:

⁷ Nokarə to kar nje gə d-ɔr tar neɗa gə dɔ buguru dɔ-je gə, Ngaɓa ꞌdəbə ne dɔ neɗaje gə kṵra̰y gə lə-je!

⁸ Nokarə to kar dəw gə Mbayɓe tura go neɗa gə kṵra̰y lə-a ang!

⁹ Kuba may gə nee le to ɔji dɔ nje gə unja bərəje ja baa ose ɔji dɔ nje gə unja bərəje ang tɔ wa? Mba j-a paje na: ꞌTura Abəraham gə dəw gə gadə-gadə ɗəw gə lə takagə.

¹⁰ Logə ꞌtura-a gə dəw gə gadə-gadə le se n-to to gə ban wa? Kede no kunja bərə gə ose go kunja bərə gə wa? Ə̰ə̰ə̰, kede no kunja bərə gə ɓo go kunja bərə gə ang.

¹¹ Be ɓa d-ar-ɛ ndaji kunja bərə le gə bəngə ji gadə-gadə lə-a ɗəw takagə gə, ɗaa go-e gə ngaɓa d-unja bər-e ɓi. To gə be ɓa n-təl to ne bɔ ꞌjejee tɔ̰y gə ꞌta kagə, ngaɓa d-unja bərə-je ang ja ngaa ꞌtura-je gə dəwje gə gadə-gadə,

¹² ngaɓa n-to ka njekunja bərəje, gə to gə dəwje gə njekunja bərəje go kara baa ang ngaa nja-je dɔ gɔl ka-sijee Abəraham le ɗəw takagə gə kede nam ɓa unja bərə ɓi le.

Takagə lə Abəraham

¹³ Mba gə go ɗəw gə lə torondu ang, ngaa gə go ɗəw gə to gadə-gadə ɗəw takagə gə ɓa d-uwa ne dɔ gɔl dɔ nangə ja tɔ̰y gə nenduba d-ar Abəraham ose d-ar gəl kuji lə-a.

¹⁴ To gə ɓo gə go torondu ɓa dəwje ꞌto ne njekuwa ne nendubaje nama, takagə to ne gə baa ngaɓa dɔ gɔl ne gə d-uwa le kara ꞌtuji pugudu tɔ.

¹⁵ Mba torondu uji wungu ngaɓa logə torondu godo kəne ɗaa kal tar godo kəne tɔ.

¹⁶ Gəl-e gə nee ɓa gə go takagə, mba ɔji dɔ mənuji ɓa mba kar ne gə d-uwa dɔ gɔl-ɛ le to ne gə singa-a ɔji dɔ gəl kuji ja tɔ̰y, ɓo gə go torondu ɓa mba kar ɔji ne dɔ nje gə ꞌgərə ja baa ang, ngaa ɔji ne dɔ nje gə ꞌta kagə ɗəw kara baa to gə Abəraham gə to ka-sijee tɔ̰y.

¹⁷ Be ɓa ꞌɗa mbede gə na: M-unda-i gə bɔ Gəl kuji dəwje gə bula, n-to ka-sijee no-gɔl dəw gə n-ta kag-ɛ gə, Luba gə nje kar nje gə d-uy təbə ngaɓa ne gə ga̰ ang kara n-ɓar-ɛ n-ar-ɛ ga̰.

¹⁸ Abəraham ar dɔ kunda mə gə lə-a gə ngɔ ja, n-ta kagə ngaɓa n-təl to ne bɔ gəl kuji dəwje bula, to to gə ꞌpa nena: Gəl kuji lə-i le a to to gə be,

¹⁹ ngaɓa n-a lo gə dɔ darɔ-ɛ gə n-mbɔrɛ ne ɗəw takagə gə ang, mba ɓal-ɛ asə tɔl ja ngaa ɗaa n-uwa takagə gədərə ja, ngaɓa mba jene lə-a Sara kara ɓuga ngaɓa aw kadə,

²⁰ ngaɓa, m-e bər ɔji dɔ ne gə Luba uwa dɔ gɔl-ɛ gə məkədərə ang, ngaa n-uwa takagə gədərə gə singa n-ula ne rɔnduba dɔ Luba gə,

²¹ n-gərə ne gə nee ngadə ja to gə: ne gə Luba uwa dɔ gɔl-ɛ le, a tɔl t-ɛ gə singamongə lə-a ja tɔ.

²² Gəl-e gə nee ɓa ꞌtura-a ne gə dəw gə gadə-gadə le.

²³ Ngaa ɔji dɔ-ɛ ꞌne gə kar-ɛ baa ɓa ꞌɗa ne tar gə nee mə mbede gə ang, tar gə na: Ye gə nee ɓa ꞌtura-a gə dəw gə gadə-gadə,

²⁴ ɔji dɔ sijee tɔ, gə d-a tura si, sijee gə j-a takagə nje ndol Mbayɓe lə-si Jeju horo nje gə d-uy gə,

²⁵ d-un-e d-uga ne dɔ kal tarje lə-si, ngaɓa n-uy ɓa ꞌndol-e mba kar j-a to ne dəwje gə gadə-gadə.