Romaindjé 3 - Mbede Lə Luba Kone Gə Sigi

Nokarə lə Jiibije

¹ Ɗi ja ɓa Jiibi nday ne nje gə kɛm wa? Ose ɗi ja to may lə kunja bərə wa?

² To gə ban-ban kara may lə-a to ja tɔ̰y. Mba Jiibije ja ɓa Luba um tar lə-a ji-je gə.

³ Ngaa, ɗi ja wa? To gə ɓo nje gə kɛm ꞌto njeməkədərəje le, məkədərə lə-je a tuji to dana gadə-gadə lə Luba wa?

⁴ Be ang baa! May gərə ngadə to gə Luba ɗa ne gə tɔgərɔ, ngaa dəw gə ɗa-ɗa kara to nje ɗəgərə, to gə ꞌɗa ne mə mbede gə na: Mba kar d-o-i ne gə dəw gə gadə-gadə gə go tarje gə ce ta-i gə, ngaɓa gə kar tar uwa-i ne lo gangə tar gə ang.

⁵ Ngaa to gə ɓo neɗa gə dɔ buguru lə-si tɔji gadə-gadə lə Luba gə ɗaga le se, j-a pa na ɗi ngaa wa? Luba tuji ꞌjejee gə wungu lə-a ɗaa, ɗa gə dɔ gɔl-ɛ ang wa? M-pa tar gə go ji neɗa lə dəwje.

⁶ Be ang baa! A ɓo be ang nama Luba a gangə tar dɔ dəwje gə to gə ban wa?

⁷ Ngaɓa to gə ɓo gə go tar gə ɗəgərə lə-m ɓa tar gə tɔgərɔ lə Luba kila ne rɔ-ɛ gə kede-kede mba riɓar lə-a ɗaa mba ɗi cibi ɓa ꞌgangə ne tar dɔ-m gə gə njeneɗa gə kṵra̰y wa?

⁸ Ngaɓa, to gə nje gə kɛm ꞌgangə tar d-unda ta-sijee gə na: Mba ɗi ɓa j-a kṵra̰y j-ar ne gə may aw ne gə kede ang wa ɗaa, dəwje gə to gə be le, kəm kar tar uwa dɔ-je.

Neɗa gə kṵra̰y ta dɔ nangə

⁹ Ɗi cibi wa? Sijee j-a to ɓəəl j-unda na wa? Ɗɔgə ang. Mba sijee tɔ̰y j-a tɔji to gə neɗa gə kṵra̰y ɔ̰ ɓe dɔ-si gə, Jiibije gə dəwje gə to Jiibije ang naa gə kara baa.

¹⁰ Gə go p-ɛ gə ꞌpa mə mbede gə na: Dəw gə gadə-gadə godo, Kara baa be kara godo;

¹¹ Dəw gə nje kəji negərə kara be ja godo, Dəw kara baa be gə nje sangə Luba kara godo. Tɔ̰y ja ꞌndəm, ꞌto neje gə baa ja,

¹² Dəw kara gə nje ɗa ne gə may kara godo, Dəw kara baa be kara godo.

¹³ Tar paje to gə buwa yo, Tar gə ta-je gə to tar kərə dəwje dɔro, Tar paje to gə tər lə kondɔtɔl.

¹⁴ Ta-je to yo kɔr ngaɓa ləl ang.

¹⁵ Gɔl-je ɔlɛ pɛl-pɛl gə lo kum məsə nangə gə,

¹⁶ Tuji gə nekəmandoo to ɗəw kaw-je gə,

¹⁷ Gərə ɗəw ɗɛgɛgɛ ang.

¹⁸ Ɓəəl Luba godo ta kəm-je gə.

¹⁹ Ngaɓa ja gərə to gə tar gə torondu pa le, pa ar nje gə d-isi gəl torondu gə, mba kar dəw kara kara cɛ̰ ne t-ɛ ngo ang, ngaɓa mba kar tar uwa ne dɔ dɔ nangə ne tɔ̰y no Luba gə ang.

²⁰ Mba dəw kara ja gə a to gadə-gadə no Luba gə go kila kuji dɔ torondu gə ang, mba torondu le ɔr ta ɗəw ar dəwje ꞌgərə ne neɗa gə kṵra̰y.

KO DƏW GƏ DƏW GƏ GADƏ-GADƏ To gadə-gadə gə go takagə Jeju Kirisi

²¹ Ngaa ɓisine ɗaa Luba kila gadə-gadə lə-a gə ɗaga lal torondu to gə ꞌpa ne mə torondu ngaɓa pajambərəje kara ꞌpa ne nəm,

²² gadə-gadə lə Luba gə ɗe gə go takagə Jeju Kirisi le, to mba dəwje gə ꞌta kagə, mba kɔr kəm dəw godo.

²³ Mba dəwje tɔ̰y ja ꞌɗa neɗa gə kṵra̰y ngaɓa ꞌlal ne rɔnduba lə Luba,

²⁴ ngaa Luba oje gə dəwje gə gadə-gadə ta kəm-e gə gə go mənuji lə-a ye ja, mba Kirisi Jeju gə ta dɔ-je.

²⁵ ꞌNe gə Luba un-e gə nepolo, ɔji dɔ dəwje gə ꞌta kagə məs-e mba tɔji ne gadə-gadə lə-a. Mba kede ləw ja kara n-ila m-e dɔ mar-ɛ gə lal gangə tar dɔ neɗaje gə kṵra̰y gə lə dəwje,

²⁶ ɓogəne kara n-njigi mba tɔji gadə-gadə lə-a mba to ne gadə-gadə ngaɓa gə mba kar dəw gə ta kagə Jeju nama n-o-ɛ ne gadə-gadə tɔ.

²⁷ Ɗi ɓa to ne kunda kar wa? Ne kara godo. Gə go torondu gə ɗa wa? Ɔji dɔ kula ɗaje wa? Be ang baa, ngaa gə go torondu takagə.

²⁸ Mba sijee j-əji to gə d-o dəw gə dəw gə gadə-gadə gə go takagə, lal kula ɗaje gə gə go torondu.

²⁹ Ose, Luba le to Luba lə Jiibije ja gə kar je baa wa? Ɓo nje gə to Jiibije ang ɗaa n-to Luba lə-je ja tɔ ang wa? Be ɓa dəwje gə ꞌgərə Luba ang kara n-to Luba lə-je tɔ,

³⁰ mba Luba gə gə kar-ɛ baa ɗəgədə nee ja a ko nje gə unja bərəje gə dəwje gə gadə-gadə gə go takagə, ngaɓa nje gə unja bərəje ang kara n-a koje gə dəwje gadə-gadə gə go takagə tɔ.

³¹ To gə be le se, j-un takagə j-ɔr ne singa torondu ngaa kən wa? Be ang baa, ngaa j-ɔsə kudu torondu gə kɔsə.