Romaindjé 2 - Mbede Lə Luba Kone Gə Sigi

Tar uwa dɔ nje gangə tar dɔ ngan mar-jejee gə

¹ Gəl-e gə nee ɓa, ɗəw gə tar a kuwa ne dɔ-i ang godo, ꞌi gə ꞌto na-na ja gə ꞌgangə tar, tar gə ꞌgangə dɔ njemar-i gə le, ꞌi ja uwa darɔ-i gə tar, mba ꞌi gə nje gangə tar dɔ ngan mar-ije gə le, ꞌI kara kula ɗa-i to to gə kar-jejee be ja tɔ.

² Ngaa, ja gərə to gə gangə tar lə Luba dɔ nje ɗa neje gə to gə bənəng gə le, to gə go tar gə tɔgərɔ.

³ ꞌI le, ꞌi gə nje gangə tar dɔ nje ɗa neje gə to gə benəng gə, neje gə ꞌi kara ꞌto njeɗa-ɛ nəm tɔ le, o to gə a ce ta gangə tar gə lə Luba wa?

⁴ Ose məmay lə-a gə boy, gə kila mə dɔ mar-ɛ gə lə-a ngaɓa kore ur lə-a le ꞌi o gə neje gə baa, lal kar-i ꞌgərə to gə məmay lə Luba ɔs-i ngug-ngug kar-i ꞌturu ne kəji lə-i wa?

⁵ Ngaa gə go məkədərə lə-i ngaɓa ꞌnjigi mbəl kəji lə-i ang, ar ɔsə ne kɔr wungu ɔji dɔ-i, ɔji ne dɔ ndɔ wungu gə gangə tar gadə-gadə lə Luba a kila ne gə ɗaga,

⁶ ꞌne gə n-a kuga na-na kara gə go kula ɗ-ɛje:

⁷ n-a kar təbə gə gə ndɔ gə ndɔ nje gə d-uwa gədərə ɗəw ɗa may gə, ꞌsangə ne rɔɓila, ɗɔy ngaɓa ne gə a ndum ang;

⁸ ngaa wungu gə məko̰ lə-a a ɓugu dɔ nje gə ꞌmbadə kila kuji dɔ tar gə tɔgərɔ gə go kəji mə bo ɗaa neɗa gə dɔ buguru ɓa d-ila kuji kəne.

⁹ Neməko̰ gə nekarə gədə a ɗe dɔ dəw ɗa-ɗa gə nje ɗa məyɛr gə, dɔ Jiibi gə ja dɔngɔr, ngaɓa dɔ dəw gə to Jiibi ang gə ɓi!

¹⁰ Ngaa rɔɓila, ɗɔy gə ɗɛgɛgɛ a to mba dəw gə ɗa-ɗa gə ɗa ne gə may, mba Jiibi ja dɔngɔr ngaɓa mba Dəw gə to Jiibi ang ɓi!

¹¹ Mba no Luba gə le kɔr kəm dəw godo.

Neɗa gə kṵra̰y lə nje gə gərə torondu

¹² Dəwje tɔ̰y gə ꞌɗa neɗa gə kṵra̰y lal torondu le, d-a tuji lal torondu ja tɔ, ɗaa dəwje tɔ̰y gə ꞌgərə ꞌɗa neɗa gə kṵra̰y gəl torondu gə le, d-a gangə tar dɔ-je gə gə go torondu ja tɔ.

¹³ Mba dəwje gə ꞌtuga mbi-je d-o ne torondu ɓa to dəwje gə gadə-gadə ta kəm Luba gə ang ngaa nje gə ꞌɗa ne kula ɓa d-o-je gə dəwje gə gadə-gadə.

¹⁴ Logə dəwje gə ꞌgərə Luba ang, gə ꞌgərə torondu ang ja, d-ḭ gə dɔ rɔ-je baa ja ꞌɗa ne gə torondu pa, ꞌjejee gə torondu godo ji-je gə nee le, ꞌjejee ja ꞌto torondu gə ɔji dɔ rɔ-jejee ja;

¹⁵ ꞌtɔji-je ɗəw kula ɗa-je to gə torondu le d-unja dɔ ɓəngərə-je gə kəy; kəji lə-je kara ɗa tar naj-ɛ tɔ, ngaɓa kəji tar lə-je ila tar dɔ-je gə ose ɔr tar dɔ-je gə ore go na-na.

¹⁶ Ye ɓa to ne gə a ce dɔ ndɔ gə go Tar gə May gə m-ila mbər-e ɗəw gə lə Jeju Kirisi le, Luba a gangə ne tar dɔ neje gə dəwje ꞌɗa lo kiya gə.

¹⁷ Ngaa, ꞌi gə un ri Jiibi unda dɔ-i gə, gə unda mə-i dɔ torondu gə, ngaɓa uwa Luba ɔsə ne rɔ-i,

¹⁸ ꞌi gə ꞌgərə mə njigi lə-a, ꞌi gə torondu ndo-i ne, ꞌgərə kɔr kəm ne gə may,

¹⁹ ꞌi gə o rɔ-i gə njekila kagə ji nje kəm tɔje gə, gə lokarə lə nje gə d-isi dan cil ciməri gə,

²⁰ gə nje siri mbəje, njenetɔji lə nganje, mba ɗəw negərə gə tar gə tɔgərɔ gə inga mə torondu gə;

²¹ ꞌi gə aw tɔji ngan mar-ije ne ngaa darɔ-i ꞌi ja ꞌtɔj-ɛ ne ang! ꞌTo nje pa kar dəwje na ꞌɓogo ang, ngaa ꞌi ꞌɓogo!

²² ꞌI gə ꞌpa na dəw ɓogo lo to ang ngaa ꞌi ɓogo lo to, ꞌi gə ꞌyiɛm magəje gə yiɛm, ngaa ɓogo neje gə kəy polo-je gə!

²³ ꞌI gə uwa torondu gə ne riɓar lə-i, ngaa ꞌɗɔy Luba ang gə go kal dɔ torondu!

²⁴ Mba ꞌtaji ri Luba horo dəwje gə ꞌgərə Luba ang gə mba sisəy, to to gə ɗa ne mə mbede gə.

Kunja bərə gə tɔgərɔ

²⁵ Tɔgərɔ ja, to gə ɓo ila kuji dɔ torondu gə nama kunja bərə lə-i le to ne gə may ja; ngaa to gə ɓo al dɔ torondu nama kunja bərə lə-i le təl to gə kunja bərə ang baa.

²⁶ To gə ɓo dəw gə unja bərə ang ila kuji dɔ torondu gə le se d-a tura-a gə njekunja bərə ang wa?

²⁷ ꞌNe gə n-to njekunja bərə ang ja, n-ila kuji dɔ torondu gə le se, n-gangə ne tar dɔ-i ꞌi gə ang wa? ꞌI gə torondu to ji-i gə ngaɓa unja bərə ja cibi ɓa al dɔ torondu le.

²⁸ Mba, ne gə kəm o ɓa tɔji dəw gə Jiibi ang nəm, ngaɓa ndaji gə d-o darɔ dəw gə nda̰-nda̰ ɓa to gə kunja bərə ang baa,

²⁹ ngaa dəw gə to Jiibi le, to Jiibi m-e gə kəy, ngaɓa kunja bərə gə tɔgərɔ le to dɔ ɓəngərə gə, gə go njil ɓo mbede torondu ang baa. Dəw gə to gə be le Luba ja ɔsə gaji-ɛ ɓo dəwje baa ang.