Romaindjé 16 - Mbede Lə Luba Kone Gə Sigi

Tar ndəjije gə ko naa

¹ M-ula ko̰ nan-sijee gə ri-a na Pəybe mə ji-si gə, n-to diyakərə gə jene gə mə Mbo̰ naa lə Njetakagəje gə mə ɓe gə Sa̰kəre,

² mba kar uwa-aje gə rɔ-si gə maj-ɛ gə ri Mbayɓe gə pa kuwa gə asə kuwa ne mba njerɔsangəje, ngaɓa may kar-si ꞌlaje sə-a ar-je ninga ne tɔ̰y gə n-aw ndoo-e, mba ꞌne ja kara n-la gə dəwje bula, ngaɓa ꞌma ja kara n-la sə-m nəm.

³ Oje Pirisika je Akilas ar-mje, ꞌto nje baa kulaje lə-m gə mə Kirisi Jeju gə,

⁴ ꞌjejee gə d-unda dɔ-je kede ꞌta ne yo dɔ-m gə, ɗaa ꞌma gə kar-m baa ɓa m-ɗa-je oyo ang, ngaa Mbo̰ naa lə njetakagəje tɔ̰y gə ɓə lə dəwje gə ꞌto Jiibije ang kara ɗa-je oyo tɔ;

⁵ oje Mbo̰ naa lə njetakagəje gə mə kəy lə-je ar-mje. Oje Epayned gə m-njig-e ya̰ ngaɓa to dɔngɔr dəw gə takagə Kirisi dɔ nangə gə Aji gə.

⁶ Oje Məri ar-mje, ꞌne gə n-ula rɔ-ɛ ndubu ya̰ mba tar lə-sisəy.

⁷ Oje Andoronikus je gə Juniyas ar-mje, ꞌjejee gə to njenujije lə-m ngaɓa ꞌto njebakuwaje lə-m, gə ꞌto njeriɓarje gə may horo njeka̰ykulaje gə, ngaɓa ꞌto nje kar Kirisije kede no-m ꞌma gə.

⁸ Oje Aməpiliyatus ar-mje, ꞌne gə m-njig-e gə maj-ɛ mə Mbayɓe.

⁹ Oje Urəbɛ̰ ar-mje, ꞌne gə n-to gə nje baa kula lə-si gə mə Kirisi gə, ngaɓa Sətakys gə m-njig-e gə maj-ɛ.

¹⁰ Oje Apelɛs ar-mje, ꞌne gə n-tɔji kula takagə lə-a dɔ Kirisi gə. Oje nje gə kəy lə Arisətobulə ar-mje.

¹¹ Oje Erɔdiyo̰ ar-mje, n-to njenuji lə-m. Oje nje gə kəy lə Narəsis gə to nje kar Mbayɓe ar-mje.

¹² Oje Tiripɛn je gə Tiripose ar-mje, ꞌjejee gə d-ula rɔ-je ndubu mba Mbayɓe. Oje Pɛrəsidə gə m-njig-e ya̰ gə ɗa kula ya̰ mba Mbayɓe

¹³ Oje Rupus ar-mje, ꞌne gə Mbayɓe mbər-e, ngaɓa ko̰-ɛje gə to nje kar-m ꞌma nəm tɔ.

¹⁴ Oje Asɛ̰kirid, gə Pilego̰, gə Ɛrəmɛs, gə Patorobas, gə Ɛrəmas, ar-mje, ngaɓa ngan ko̰ naaje tɔ̰y gə ꞌga̰ gə je naa gə.

¹⁵ Oje Pilologə je gə Juli, Nere je gə ko̰ nan-ɛ ar-mje, ngaɓa Olɛmpas je gə njerɔsangəje tɔ̰y gə ꞌga̰ gə je.

¹⁶ Oje naa gə yo gə nee ꞌtoje ne mbi naa pu-pu gə maj-ɛ. Mbo̰ naaje lə njetakagəje lə Luba tɔ̰y gə gəl Kirisi gə ja na m-o-si m-ar-je.

¹⁷ Ngan ko̰-mje, m-ndəji-si mba kar undaje kəm karə dɔ rɔ-si gə, mba nje kɔsə kudu kay naaje ngaɓa ꞌpa tar ꞌtuji ne neje gə ꞌtɔji-si d-ar njetakagəje d-uba ne netɔji nee le d-ḭya̰. May kar ɔrəje rɔ-si rɔ-je gə gugu.

¹⁸ Mba dəwje gə to gə be le ꞌɗa kula lə Kirisi Mbayɓe lə-sijee ang, ngaa d-aw ɗa kula mba mə-je ja baa; ɗaa gə go tarje gə may-may gə ta-je gə ngaɓa gə mba kərə ne dəwje gə kəji lə-je uru ang.

¹⁹ Ngaa sisəy le ɗaa dəwje tɔ̰y ja ꞌgərə kila kuji lə-si, m-uwa-si m-unda ne kar-m, ngaɓa m-njigi mba kar-si undaje kəm karə dɔ rɔ-si gə ɔji dɔ ɗa may, ngaɓa kar ɔsəje ɗa kṵra̰y ngərəng tɔ.

²⁰ Be ɓa Luba gə to ngira ɗɛgɛgɛ le, a tɔ dɔ ꞌSu ɓisine baa kar ꞌnjaje dɔ-ɛ gə. May kar mənuji lə Mbayɓe lə-sijee Jeju nay gə si!

²¹ Timoce gə to nje baa kula lə-m, na m-o-si m-ar ne, ngaɓa Lusiyus, Jaso̰ je gə Sosipatɛr, gə to njenujije lə-m kara na m-o-si tɔ.

²² ꞌMa Tɛrətiyus gə ꞌndəy-m d-ar-m m-ɗa mbede nee ɗəw gə lə Mbayɓe kara m-o-si tɔ.

²³ Gayus gə to njekəy mba lə-m ngaɓa to nje kar Mbo̰ naa lə Njetakagəje tɔ̰y le, na m-o-si m-ar ꞌne tɔ. Erasətə gə to njengom nekinga lə ɓebo kara na m-o-si m-ar ꞌne ngaɓa ngon ko̰-si Karətus kara nəm tɔ.

²⁴ May kar mənuji lə Mbayɓe lə-sijee Jeju Kirisi nay gə si tɔ̰y! Oyo.

²⁵ Dəw gə asə kar-sisəy singa gə go Tar gə May lə-m ngaɓa gə go tar lə Jeju Kirisi gə m-ila mbər-e, ngaɓa gə go ne gə to lokiya gə ləw baa gə ꞌkila gə ɗaga,

²⁶ ngaa ɓisine kila rɔ-ɛ gə ɗaga gə go mbedeje gə pajambərəje ꞌɗa, gə go ndu Luba gə nje kisi saar-saar gə no le, ꞌkila d-ar gəl kujije tɔ̰y ꞌgərə mba kar d-ila ne kɔji gə go takagə,

²⁷ May kar rɔnduba to kar Luba gə nje kəm karə gə kar-ɛ baa ja gə ɓal-ɓal ɗəw gə lə Jeju Kirisi! Oyo!