Romaindjé 15 - Mbede Lə Luba Kone Gə Sigi

¹ Ngaa sijee gə j-uba singa le, to tar lə-si kar j-a la gə njembɔrɛje, ngaɓa j-a sangə ne gə ləl-si ang.

² May kar na-na kara horo-si gə ləl njemar-ɛ mba ne gə may mba kar singa ɔsə ne dɔ mar-ɛ.

³ Mba Kirisi sangə ne gə ləl-e ang baa, ngaa to gə ꞌɗa ne mə mbede gə na: Taji kil lə nje taji-i je le oso dɔ-m gə.

⁴ Be ɓa neje gə ꞌɗa mbede gə kede ləw le, ꞌɗa mba tɔji-si ne ne, mba kar ɗəw gə lə kuwa gədərə gə kul-mə gə mbede lə Luba a tɔji-si le, j-a kisi nee gə məkunda.

⁵ May kar Luba gə nje gəl kuwa gədərə gə njekul mə dəwje le, ar kəji lə-si to kara baa dɔ naa gə gə yo gə nee to to gə kar Kirisi Jeju be,

⁶ mba kar gə go mə kasə naa, gə ndu gɔsə gə kara baa ja, ulaje rɔnduba dɔ Luba gə Bɔ Mbayɓe lə-si Jeju Kirisi.

⁷ Uwaje naa gə rɔ naa gə gə maj-ɛ gə yo gə nee, to to gə Kirisi uwa ne si gə rɔ-ɛ gə, mba rɔnduba lə Luba.

Kirisi to kar dəwje tɔ̰y

⁸ Mba m-pa na Kirisi təl njekula lə njekunja bərəje mba tɔji ne to gə Luba pa tar gə tɔgərɔ, ngaɓa mba tɔji ne to gə n-ar njang dɔ neje gə n-uwa dɔ gɔl-ɛ n-ar ka-sijee,

⁹ ngaa dəwje gə ꞌto Jiibije ang ɗaa ꞌpidi Luba mba məmay lə-a, to gə ꞌɗa ne mə mbede gə na: Gəl-e gə nee ɓa m-a pa tar lə-i ɓolong horo gəl kuji dəwje gə, Ngaɓa m-a kɔsə pa ɗɔy ne ri.

¹⁰ Təl ꞌpa ja cibi na: Gəl kuji dəwje, ꞌɗaje rɔləl gə dəw mə ɓeje lə-a!

¹¹ Cibi na: Sisəy gəl kuji dəwje tɔ̰y, ꞌpidije Mbayɓe Ngaɓa kar dəw mə ɓeje tɔ̰y ꞌpid-e!

¹² Ejay kara pa tɔ, na: Ngira Jese le, a kuba, ꞌNe gə n-a kuba nangə kḭ mba kɔr no gəl kuji dəwje; Gəl kuji dəwje d-a kunda mə-je dɔ-ɛ gə.

¹³ May kar Luba gə to gəl məkunda, ar rɔləl gə ɔr njal ɗusu mə-si ngaɓa ar-si ɗɛgɛgɛ gə uy bɛm ɗəw takagə gə, mba kar məkunda lə-si ɓar ne mii, ɗəw singamongə gə lə Njil Njerɔsangə!

Kulaje lə Pɔl gə kaw mba lə-a

¹⁴ Ngan ko̰-mje, tar gə ɔji dɔ sisəy le ɗaa, ꞌma ja kara m-gərə gə maj-ɛ to gə məmay ɗusu mə-si, negərə ɗusu mə-si ngaɓa asəje mba ndəji-je naa gə yo gə nee.

¹⁵ Be ja kara m-ɗa mbede m-pa ne gə si mə loje gə kɛm gə ndum gə mongə ɓəəl, ɗəw kara baa to gə m-ole ne mə-si, mba nuji gə Luba uwa sə-m,

¹⁶ ar m-to njekula lə Kirisi Jeju horo dəwje gə ꞌgərə Luba ang gə; kula gə to gə losang-ɛ gə to kila mbərə Tar gə May lə Luba le m-ɗa, mba kar dəwje gə ꞌgərə Luba ang le ꞌto ne nenuji gə Njil Njerɔsangə unda gə losang-ɛ gə may ta kəm Luba gə.

¹⁷ Kum naa gə lə-m gə Kirisi Jeju le to ne rɔləl lə-m ɔji dɔ kula lə Luba.

¹⁸ Mba ne gə Kirisi un-m ɗa ne ja ɓa m-a pa tar-ɛ mba kar dəwje gə ꞌgərə Luba ang d-ila ne kɔji ɗəw tar pa gə gə ɗəw kula ɗa gə,

¹⁹ ɗəw singamongə netɔjije gə neje dang-dang gə kəm dəw o ndɔ kara ang, ɗəw singamongə Njil, un kud-e Jerujalɛm saar ce ne Iliri ja m-ila mbərə Tar gə May lə Kirisi m-ar ta lo ya̰-ya̰.

²⁰ Ngaa lo gə d-ila mbərə Tar gə May kəne ang ja m-un rɔ-m mba kila mbərə lə Kirisi kəne, be ɓa gə mba kar-m m-unda kəy dɔ gɔl kəy gə nje gə kɛm d-ɔsə nangə kede ang, to gə ꞌɗa ne mə mbede gə na:

²¹ Nje gə d-ila mbərə lə-a d-ar-je ang ja d-a ko-e, Ngaɓa nje gə d-o tar lə-a gə mbi-je ang ja d-a ko gərə.

²² Ye ja ɓa to ne gə ɔgə-m gɔl bula kar m-aw ɓə lə-si.

²³ Ngaa ɓisine ɗaa, logə m-a ɗa kula kəne gə go lo gə nee le godo ngaa, ngaɓa ləw baa asə ɓal bula ja m-njigi kaw ɓə lə-si,

²⁴ logə kaw lə-m gə Ɛsəpa̰y ɗaa m-unda mə-m mba ko-si taar baa ngaa ɓo m-isi ɓə lə-si asə-m mbagə ɗaa m-a kar-si a ꞌla-je sə-m kar m-aw.

²⁵ Ɓisine m-aw gə Jerujalɛm mba ɗa kula mba njerɔsangəje.

²⁶ Mba nje gə Masedowan gə Akayi ꞌnjigi gə maj-ɛ ja mba mbo̰ ne la ne gə njendooje gə horo njerɔsangəje gə d-isi Jerujalɛm.

²⁷ Nje gə Masedowan gə Akayi nee le ꞌnjigi gə maj-ɛ ja, mba d-o kula gə nee le to to gə ɓangə ɓa to dɔ-je gə be, mba to gə ɓo mbɔr dɔ sijee ɓa dəwje gə ꞌgərə Luba ang d-uba ne may ɗəw njil gə nama, may kar dəwje gə ꞌgərə Luba ang le ꞌla gə sijee nee le gə nemayje gə dɔ nangə nee tɔ.

²⁸ Be ɓa ɓo ꞌɗa tɔ̰y, ngaɓa ɓo m-aw gə nembo̰je nee m-ar-je kəm naa gə tɔ̰y ɗaa ye ɓa m-a nday gə ɗəw gə ɓe lə-si kaw ɛsəpa̰y.

²⁹ M-gərə to gə Kirisi a tɔr ndu dɔ-m gə gə maj-ɛ mba kar m-aw ɓə lə-si.

³⁰ Ngan ko̰-m, m-ndəji-si gə ri Mbayɓe lə-si Jeju Kirisi ngaɓa gə go njigi lə Njil, kar ilaje dər mar-ɛ gə ar-mje, ɗəw dəji gə a dəjije Luba gə mba-m,

³¹ mba kar-m m-ce ne ta nje məkədərəje gə Jude, ngaɓa kar nekarə baaje gə m-aw Jerujalɛm nee le, njerɔsangəje ꞌta ji-m gə gə maj-ɛ,

³² be ɓa m-a kaw ɓə lə-si gə rɔləl, to gə Luba njigi, ngaɓa m-a kuwa ne kɔrə-m ɓəəl ɓə lə-si.

³³ May kar Luba gə nje gəl ɗɛgɛgɛ nay gə si tɔ̰y! Oyo!