Romaindjé 14 - Mbede Lə Luba Kone Gə Sigi

Njesingaje gə njembɔrɛje

¹ Uwaje njembɔrɛ gə ɗəw takagə gə gə rɔ-si gə maj-ɛ, ꞌpaje sə-a mba kəji lə-a ang.

² Dəw gə nee asə kusa neje tɔ̰y gə go takagə lə-a, dəw gə kən gə takagə lə-a mbɔr-ɛ ɗaa, ye usa kam ne.

³ May kar dəw gə njekusa-a le dabə njekusa-a ang dasəra ang, ngaɓa dəw gə usa ang kara may kar ila tar dɔ njekusa-a gə ang tɔ, mba Luba uwa-a gə rɔ-ɛ gə tɔ.

⁴ ꞌI ꞌto na ɓa ꞌgangə tar dɔ ngon lokisi gə lə dəw wa? N-ar taar, ose n-oso kara to tar lə ꞌɓəə-eje. Ngaa n-a kar taar ja, mba singa Mbayɓe asə mba gəd-e.

⁵ Dəw gə nee, na ndɔ gə to ɓəəl unda mar-ɛje ga̰, dəw gə kən na ndɔje d-asə naa tɔ̰y. May kar na-na kara gərə go kəji lə-a gə pa ne le gə maj-ɛ.

⁶ Dəw gə nje kɔr kəm ndɔje, ɔr kəm-je mba Mbayɓe. Dəw gə njekusa ne kara, usa mba Mbayɓe, mba n-ɗa Luba oyo, dəw gə usa ang kara, usa ang mba Mbayɓe tɔ; ꞌne kara n-ɗa Luba oyo tɔ.

⁷ Mba dəw kara ja horo-sijee gə aw kəm baa mba darɔ-ɛ ye ja godo, ngaɓa dəw gə uy mba darɔ-ɛ ye ja le godo tɔ.

⁸ Mba to gə ɓo j-awje kəm baa nama j-awje kəm baa mba Mbayɓe, ngaɓa to gə ɓo j-uyje kara j-uyje mba Mbayɓe, le j-awje ne kəm baa ose j-uyje ne kara j-a toje kar Mbayɓe.

⁹ Mba Kirisi uy ɓa təl aw kəm baa mba to Mbayɓe lə nje gə d-uy gə nje gə d-aw kəm baa.

¹⁰ Ngaa ꞌi, ꞌi to na ɓa ꞌgangə tar dɔ ngon ko̰-i gə wa? Ose ꞌi, mba ɗi ja ɓa ꞌdabə ne ngon ko̰-i dasəra wa? J-a kar no ngɔ gangə tar gə lə Luba ja tɔ̰y.

¹¹ Mba ꞌɗa mə mbede gə na: M-aw kəm baa, Mbayɓe be, Takəji gə ɗa-ɗa kara a kɔsə nangə no-m gə, Ngaɓa ndo̰ tar gə ɗa-ɗa kara a pa tar ɓar ne ri Luba ɓolong.

¹² Be ɓa na-na kara horo-sijee gə le, a kɔr go kula ɗ-ɛ no Luba gə ɔji dɔ-ɛ ye ja.

¹³ J-a gangəje tar dɔ naa gə gə yo gə nee ang; ngaa may kar j-ar-je gangə tar lə-si təl to jigi no ngon ko̰-si gə ose təl to ɗəw koso lə-a ang.

¹⁴ M-gərə ngaɓa m-gərə gə maj-ɛ ɗəw gə lə Mbayɓe Jeju, to gə ne kara gə mina gə dɔ rɔ-ɛ le godo; ngaa to gə ɓo dəw o ne gə ne gə mina nama, to ne gə mina ta kəm-e ye gə ja.

¹⁵ To gə ɓo mba nekusa ɓa kəm ngon ko̰-i ɗa ne ndoo nama njigi godo mə-i gə. Dəw gə Kirisi uy mba tar lə-a le, ar-ɛ tuji mba nekusa baa ang.

¹⁶ May kar ne gə to gə may lə-sisəy le ɔr ɗəw ar ꞌpa ne gə si ang.

¹⁷ Mba ɓeko̰ lə Luba le to nekusa ose nekay ang, ngaa to neɗa gə gadə-gadə, gə ɗɛgɛgɛ ngaɓa rɔləl ɗəw gə lə Njil Njerɔsangə.

¹⁸ Dəw gə ɗa kula lə Kirisi to gə be le ta kəm Luba nəm ngaɓa may ta kəm dəwje nəm tɔ.

¹⁹ Be ɓa may kar-si ja sangəje ne gə ɔsə kudu ɗɛgɛgɛ gə ne gə a kar-si singa gə yo gə nee.

²⁰ ꞌTuji kula lə Luba mba nekusa ang. Tɔgərɔ, ne tɔ̰y arə ngadə ja, ngaa logə dəw usa ɓa ɓo təl to jigi tuga nama may ang.

²¹ May mba kusa da ang nəm kay kodo ang nəm, ngaɓa kɔgə rɔ-i dɔ ne gə a təl to jigi tuga no ngon ko̰-i gə kar oso ne ose mbɔr-ɛ ne.

²² Takagə lə-i ꞌi ja, ꞌngom gə kar-i ja no Luba gə. Nokarə to kar dəw gə ila tar dɔ darɔ-ɛ ye gə ja ang, ɔji dɔ ne gə ye ja o gə ne gə may ta kəm-e gə!

²³ Ngaa dəw gə ɗəgə tar dɔ ne gə usa gə nama ye ja tar uwa dɔ-ɛ, mba n-nja gə go takagə ang. Be ɓa ne tɔ̰y gə ɗe gə go takagə ang le to neɗa gə kṵra̰y.